Ezequiel

9 Chai qꞌuipami ñuca rinrincunahuanca: “¡Chai llajtata tucuchigrij runacunata tandachi. Paicunaca cada unomi tucuchina macanacunacunata maquipi apashca canga!” nishpa ñucata sinchita caparijta uyarcani.

2 Janaj ladopi saquirij ashtahuan jahuaman caj punguman rina ñanmantami sujta runacuna shamucujta ricurcani. Cada unomi paicunapaj maquipica tucuchina macanacunahuan carca. Paicunahuanca lino churanata churarishca, secretariopaj tintata huaquichina estucheta cinturapi charicuj shuj runapishmi carca. Paicuna yaicushpaca cobre altar ladopimi shayarishca saquirircacuna.

3 Chaimi israelitacunapaj Diospaj sumaj achijnicujca querubincunapaj jahuamanta huichiyai callarirca. Chaimanta huichiyashpaca Diospaj huasi pungu umbralcamami rirca. Shinallataj paica* lino churanata churarishca, secretariopaj tintata huaquichina estucheta cinturapi charij runatami cayai callarirca. 4 Jehová Diosca paimanca: “Tucui Jerusalén llajtata pasai. Chai llajtapi tucui laya millanana ruraicunata ruracushcata ricushpa sufrijcunapaj, huacacujcunapaj frentepi señalta churai” nircami.

5 Ñuca uyacujpimi caishujcunamanca cashna nirca: “Gentecunata huañuchishpa paipaj huashata catishpa chai llajtata richij. Paicunataca ama llaquichijchu, cꞌuyaitapish paicunamanca ama ricuchichijchu. 6 Yuyajcunatapish, jovencunatapish, cꞌarihuan manaraj chayarishca huarmicunatapish, huahuacunatapish, huarmicunatapish tucuicunata tucuchichij. Pero señalta charijcunapajmanca ni maijanpajman ama cꞌuchuyaichijchu. Diospaj huasimanta callarishpa tucuchichij” nircami. Chaimi Diospaj huasi ñaupajpi caj pushajcunata* huañuchi callarircacuna. 7 Qꞌuipaca paica: “¡Richij! Diospaj huasita mapayachichij, Diospaj huasi patiocunapipish huañushcacunata jundachichij” nircami. Chashna nijpimi chaimanta llujshishpa paicunaca chai llajtapi causaj gentecunata huañuchircacuna.

8 Paicuna gentecunata huañuchicujpica ñucallami saquirircani. Chaimi ñucaca pambacama cumurishpaca: “¡Aij Tucuita Mandaj Amito Jehová Dioslla! ¿Canca yallitaj pꞌiñarishpachu Jerusalenta llaquichishpa tucui saquirij israelitacunataca tucuchigringui?” nishpa caparircani.

9 Chaimi paica cashna nirca: “Israelmanta, Judamanta gentecunaca yallitaj jatun juchatamari rurashcacuna. Cai llajtaca yahuarhuan jundamari. Cai llajtapi causajcunapish cashcata mana rurashpamari causacuncuna. Paicunaca, ‘Jehová Diosca cai llajtataca cungarishcamari, Jehová Diosca imata mana ricunchu’ nincunami. 10 Pero ñucaca caitami rurasha. Ñuca ñahuicunaca paicunataca mana llaquingachu, cꞌuyaitapish paicunamanca mana ricuchishachu. Paicuna ima shina causashcamantapish castigashami” nircami.

11 Chaimi lino churanata churarishca, secretariopaj tintata huaquichina estucheta cinturapi charij runa pai imata rurashcata huillangapaj tigrajta ricurcani. Chai runaca: “Can imata rurachun mandashca shinallatajmi rurashcani” nircami.