INTERNETPI BIBLIOTECA Watchtower
Watchtower
INTERNETPI BIBLIOTECA
quichua (chimborazo)
ꞌ
  • Cꞌ
  • cꞌ
  • CHꞌ
  • chꞌ
  • Pꞌ
  • pꞌ
  • Qꞌ
  • qꞌ
  • Tꞌ
  • tꞌ
  • BIBLIA
  • PUBLICACIONCUNA
  • TANDANACUICUNA
  • 1 Reyes 7
  • Biblia. Diospaj Shimi

Can mashcacushcaca mana tiyanchu.

Quishpichihuai, videoca mana ricurinchu.

Caicunamantami parlan

      • Salomonpaj palaciomanta (1-12)

      • Hiramca trabajocunata alli rurajmi carca. Paimi Salomonta ayudarca (13-47)

        • Cobremanta ishqui pilarcuna (15-22)

        • Cobremanta jatun tanque (23-26)

        • Chunga uchilla carretacuna, cobremanta tanquecuna (27-39)

      • Orohuan tucui laya cosascunata rurashpa tucuchishcamanta (48-51)

1 Reyes 7:1

Notacuna

  • *

    O “palaciota”.

1 Reyes 7:2

Notacuna

  • *

    Hebreo rimaipica: “100 codos” ninmi. Shuj codoca 44.5 centimetrocunatami charirca. Ayuda B14-ta ricui.

  • *

    Hebreo rimaipica: “50 codos” ninmi.

  • *

    Hebreo rimaipica: “30 codos” ninmi.

1 Reyes 7:3

Notacuna

  • *

    O “vigacuna”.

1 Reyes 7:6

Notacuna

  • *

    O “Salatapishmi”.

1 Reyes 7:10

Notacuna

  • *

    Hebreo rimaipica: “10 codos” ninmi.

  • *

    Hebreo rimaipica: “8 codos” ninmi.

1 Reyes 7:12

Notacuna

  • *

    “Patio” shimita huasha diccionariopi ricui.

1 Reyes 7:14

Notacuna

  • *

    O “broncemanta”. Cai versopipish, catij versocunapipish broncellamantatajmi parlacun.

1 Reyes 7:15

Notacuna

  • *

    O “ocho”.

  • *

    Hebreo rimaipica: “18 codos” ninmi.

  • *

    O “cinco”.

  • *

    Hebreo rimaipica: “12 codos” ninmi.

1 Reyes 7:16

Notacuna

  • *

    Capitel nishcaca pilar jahuapi allichishca sumaj adornomi carca. “Capitel” shimita huasha diccionariopi ricui.

  • *

    Hebreo rimaipica: “5 codos” ninmi.

1 Reyes 7:18

Notacuna

  • *

    “Granada” shimita huasha diccionariopi ricui.

1 Reyes 7:19

Notacuna

  • *

    Hebreo rimaipica: “4 codos” ninmi.

1 Reyes 7:21

Notacuna

  • *

    “Pilar” shimita huasha diccionariopi ricui.

  • *

    Caipica Diospajlla chꞌicanyachishca ucumantami parlacun.

  • *

    O “Ura ladoman”.

  • *

    “Jakín” shutica ‘Jehová Dios sinchita shayachichun’ nisha ninmi.

  • *

    O “janaj ladoman”.

  • *

    “Boaz” shutica ‘fuerzahuan’ cashcatami nisha nicuj yuyachin.

1 Reyes 7:23

Notacuna

  • *

    Hebreo rimaipica: “Mama cuchata” ninmi.

  • *

    Hebreo rimaipica: “10 codos” ninmi.

  • *

    Hebreo rimaipica: “5 codos” ninmi.

  • *

    Hebreo rimaipica: “30 codos” ninmi.

1 Reyes 7:24

Notacuna

  • *

    Hebreo rimaipica: “shuj codo” ninmi.

1 Reyes 7:26

Notacuna

  • *

    Hebreo rimaipica: “shuj palmo menor” ninmi.

  • *

    Hebreo rimaipica: “2.000 batos” ninmi. Shuj batoca 22 litrocunatami charirca. “Bato” shimita huasha diccionariopi ricui.

1 Reyes 7:27

Notacuna

  • *

    O “yacuta apana uchilla carretacunatami”.

  • *

    Hebreo rimaipica: “4 codos” ninmi.

  • *

    Hebreo rimaipica: “3 codos” ninmi.

1 Reyes 7:31

Notacuna

  • *

    Hebreo rimaipica: “shuj codo” ninmi.

  • *

    Hebreo rimaipica: “shuj codo chaupi” ninmi.

1 Reyes 7:33

Notacuna

  • *

    O “llantacunapish”.

  • *

    O “radiocunapish”.

1 Reyes 7:35

Notacuna

  • *

    Hebreo rimaipica: “medio codo” ninmi.

1 Reyes 7:38

Notacuna

  • *

    Hebreo rimaipica: “40 batos” ninmi.

  • Biblia. Diospaj Shimi
  • 1
  • 2
  • 3
  • 4
  • 5
  • 6
  • 7
  • 8
  • 9
  • 10
  • 11
  • 12
  • 13
  • 14
  • 15
  • 16
  • 17
  • 18
  • 19
  • 20
  • 21
  • 22
  • 23
  • 24
  • 25
  • 26
  • 27
  • 28
  • 29
  • 30
  • 31
  • 32
  • 33
  • 34
  • 35
  • 36
  • 37
  • 38
  • 39
  • 40
  • 41
  • 42
  • 43
  • 44
  • 45
  • 46
  • 47
  • 48
  • 49
  • 50
  • 51
Biblia. Diospaj Shimi
1 Reyes 7:1-51

1 Reyes

7 Salomonca 13 huatacunapimi paipaj propio huasita* shayachinata tucuchirca.

2 Salomonca Líbano Bosque nishca Huasitami shayachirca. Chai huasica largomanca 44 metrocuna yallitami* charirca, anchomanca 22 metrocunatami* charirca, altomanca 13 metrocunatami* charirca. Chai huasitaca chuscu fila cedro caspi pilarcuna jahuapimi shayachirca. Chai pilarcuna jahuapica cedro caspi vigacunatami churarca. 3 Pilarcunapi churashca vigacuna jahuataca cedro tablacunatami churarca. Cada filapimi 15 pilarcuna* tiyarca. Totalca 45-mi carca. 4 Chai huasipica marcocunayuj quimsa fila ventanacunami tiyarca. Quimsandij filapimi cada ventanaca caishuj ventanahuan chꞌimbapura carca. 5 Quimsa filapi chꞌimbapura caj ventanacuna shinallatajmi tucui yaicunacunapish, pungu caspicunapish cuadrado marcocunayuj carca.

6 Pilarcunahuan charichishca Corredortapishmi* rurarca. Chai Corredorca largomanca 22 metrocunatami charirca, anchomanca 13 metrocunatami charirca. Chai Corredor ñaupajpica pilarcunayuj, techoyuj shuj corredorpishmi tiyarca.

7 Shinallataj Juzgana Corredortami rurarca. Chaipimi paipaj jatun tiyarinapi tiyarishpa juzgaj carca. Chai Corredortaca pambamanta callarishpami vigacunacama cedro tablacunahuan jahuata churarca.

8 Salomón causagrishca huasica caishuj patiopimi carca. Juzgana Corredormantaca separadomi carca, pero chai layallataj rurashcami carca. Salomonca faraonpaj ushushihuanmi cazarashca carca. Chai huarmipajpishmi Juzgana Corredorta rurashca shinallataj shuj huasita shayachirca.

9 Tucui cai huasicunataca ucu ladotapish canlla ladotapish achcata valij labrashca rumicunahuanmi rurarca. Chai rumicunataca utuna sierracunahuanmi uturca. Cimientocunamanta callarishpami jatun pircacunacama, canlla ladotapish jatun patioman chayangacama chashna rurarca. 10 Cimientocunaca achcata valij jatun rumicunahuan rurashcami carca. Huaquin rumicunaca chuscu metrocuna yallitami* midirca, caishuj rumicunaca casi chuscu metrocunatami* midirca. 11 Chai jahuapica medidapi labrashca achcata valij rumicunami tiyarca. Shinallataj cedro caspicunami tiyarca. 12 Jatun patio* muyundij pircaca Jehová Diospaj huasi ucu patiota rurashca shinallataj, Diospaj huasi corredorta rurashca shinallatajmi labrashca rumicunahuan quimsa filata rurashca carca. Chai pircapica shuj fila cedro vigacunata churashcami carca.

13 Rey Salomonca Tiro llajtamanta Hiram runata pushamuchunmi cacharca. 14 Hiramca Neftalipaj familiamanta shuj viuda huarmipaj churimi carca. Paipaj yayaca Tiro llajtamantami carca. Shinallataj cobremanta* artesaniacunata rurajmi carca. Hirampish cobremanta tucui laya cosascunata ruranata alli yachaj, experienciata charijmi carca. Chaimantami rey Salomonpaj ñaupajman shamushpa paiman tucui imalla mingashcata rurai callarirca.

15 Hiramca cobreta yacuyachishpami ishqui pilarcunata rurarca. Cada pilarmi altomanca pusaj* metrocunata* charirca. Ishqui pilarcunamanta cada pilarta muyuchishpa midingapajpish pichca* metrocuna yallita* charij huascami minishtirirca. 16 Pilarcuna jahuapi churangapajpish cobreta yacuyachishpami ishqui capitelcunata* rurarca. Shuj capitelca altomanca ishqui metrocuna yallitami* charirca, caishujpish altomanca ishqui metrocuna yallitami charirca. 17 Pilarcuna jahuapi caj capitelcunapica uchilla cadenacunahuan caupushca shuj mallami tiyarca. Shuj capitelpica canchis uchilla cadenacuna, caishuj capitelpipish canchis uchilla cadenacunami tiyarca. 18 Pilarcuna jahuapi caj capitelcunata pilluchingapajca cada malla muyundijpimi ishqui fila granadacunata* rurarca. Ishquindij capitelcunapimi chashnallataj rurarca. 19 Diospaj huasiman yaicuna corredorpi caj pilarcuna jahuapi tiyaj capitelcunaca lirio sisa shinami carca. Chaicunaca altomanca casi ishqui metrocunatami* charirca. 20 Capitelcunaca ishqui pilarcuna jahuapimi carca. Mallahuan pilluchishca ashtahuan ancho jahuapimi carca. Cada capitel muyundijtaca 200 granadacunata filapi churashcami carca.

21 Chai ishqui pilarcunataca* Diospaj huasiman* yaicuna corredorpimi shayachirca. Alli ladoman* shayachishca pilartaca Jakintami* shutichirca. Cutin lluqui ladoman* shayachishca pilartaca Boaztami* shutichirca. 22 Pilarcuna jahua ladoca lirio sisa shinata rurashcami carca. Chashnami pilarcunata shayachinata tucuchirca.

23 Chai qꞌuipaca cobreta yacuyachishpami shuj jatun tanqueta* rurarca. Chai tanqueca redondomi carca. Shuj filomanta caishuj filocamaca chuscu metrocuna yallitami* midirca. Altomanca ishqui metrocuna yallitami* midirca. Tanque muyundijta midingapajpish 13 metrocunata* charij huascami minishtirirca. 24 Jatun tanque shimi uripica muyundijtami calabazacunahuan adornashca carca. Tucui muyundijtami cada 44 centimetrocuna yallipi* chunga calabazacuna tiyarca. Ishqui fila calabazacunaca chai tanquellahuantaj shujllata rurashcami carca. 25 Jatun tanqueca cobremanta rurashca 12 torocuna jahuapimi carca. Quimsa torocunaca janaj ladotami ricucurcacuna. Quimsa torocunaca inti huashicun ladotami ricucurcacuna. Quimsa torocunaca ura ladotami ricucurcacuna. Cutin quimsa torocunaca inti llujshin ladotami ricucurcacuna. Jatun tanqueca torocunapaj jahuapimi carca. Torocunapaj huashaca tanque ucu ladomanmi carca. 26 Jatun tanqueca canchis centimetrocuna yalli* racumi carca. Filoca copa filo shina, lirio sisa shinami carca. Chai tanqueca 44.000 litrocuna* yacutami apaj carca.

27 Shinallataj cobremanta chunga uchilla carretacunatami* rurarca. Cada carretami largomanpish, anchomanpish casi ishqui metrocunata* midirca. Altomanca shuj metro yallitami* midirca. 28 Chai uchilla carretacunaca cashnami rurashca carca: cada ladomanmi planchacunahuan tapachishca carca. Chai planchacunaca marcocuna ucupi churashcami carca. 29 Marcocuna ucupi caj planchacunapica leoncunata, torocunata, querubincunata labrashcami carca. Marcocunapipish chashnallatajmi rurashca carca. Leoncunapaj, torocunapaj jahua ladomanpish, ucu ladomanpish guirnaldacunata rurashcami tiyarca. 30 Cada uchilla carretami cobremanta rurashca chuscu ruedacunata charirca. Chai ruedacunaca cobremanta rurashca ishqui ejecunapimi churashca carca. Esquinacunapica chuscu charichinacunami tiyarca. Chai charichinacuna jahuapica shuj tanquemi tiyarca. Chai charichinacuna ladocunapica guirnaldacunahuan sumajta adornashcami carca. 31 Tanque shimica carreta jahua lado ucupimi carca. Chai parteca redondomi carca. Altomanca 44 centimetrocuna yallitami* charirca. Carreta jahua ladomanca labrashca dibujocunami tiyarca. Ladoman caj planchacunaca mana redondochu carca, cuadradomi carca. Carreta jahua ladopish, carretata charichinacunapish casi 67 centimetrocunatami* midirca. 32 Uchilla carretapaj chuscu ruedacunaca ladoman caj planchacuna ucumanmi carca. Ruedacunata charicuj ejecunapish carretallapitaj charichishcami carca. Cada ruedami altomanca casi 67 centimetrocunata midirca. 33 Ruedacunaca shuj jatun carretapaj ruedacuna shinami carca. Charichinacunapish, arocunapish,* rayocunapish,* cubocunapish cobreta yacuyachishpa rurashcami carca. 34 Cada uchilla carretacunapaj chuscu esquinacunapica chuscu charichinacunami tiyarca. Chai charichinacunaca uchilla carretahuanmi shuj shinallata rurashca carca. 35 Uchilla carreta jahuaman caj bandaca redondomi carca. Altomanca 22 centimetrocunatami* midirca. Marcocunapish, carreta jahuaman caj planchacunapish chai bandahuanmi shuj shinallata rurashca carca. 36 Marcocuna jahuapi, planchacuna jahuapica querubincunata, leoncunata, palmeracunatami labrarca. Cada espaciopimi chashna rurarca. Muyundijtaca guirnaldacunahuanmi adornarca. 37 Chashnami chunga uchilla carretacunataca rurarca. Tucui uchilla carretacunami chai shinallataj rurashca carca. Chai shinallataj, chai medidallatajmi carca.

38 Shinallataj cobremanta chunga tanquecunatami rurarca. Cada tanquemi 880 litrocunata* apaj carca. Casi ishqui metrocunatami midirca. Chunga uchilla carretacunapajca shuj shuj tanquemi tiyarca. 39 Chai qꞌuipaca pichca uchilla carretacunataca Diospaj huasi alli ladomanmi churarca. Cutin pichca uchilla carretacunataca lluqui ladomanmi churarca. Jatun tanquetaca Diospaj huasi alli ladoman, inti llujshin ladomanmi churarca.

40 Ashtahuanpish Hiramca lavacaracunata, palacunata, tazoncunatami rurarca.

Chashnami Hiramca rey Salomón mingashca shina Jehová Diospaj huasipica tucui trabajocunata tucuchirca. 41 Paica ishqui pilarcunatami rurarca. Shinallataj pilarcuna jahuapi tazón shina ishqui capitelcunatami rurarca. Pilarcuna jahuapi tazón shina ishqui capitelcunata pilluchingapaj ishqui mallacunatapishmi rurarca. 42 Shinallataj ishqui mallacunapaj 400 granadacunatami rurarca. Cada mallapimi ishqui fila granadacunata churarca. Chai mallacunaca ishqui pilarcuna jahuapi caj tazón shina ishqui capitelcunata pilluchingapajmi carca. 43 Shinallataj chunga uchilla carretacunatami rurarca. Chai uchilla carretacuna jahuapi churangapajpish chunga tanquecunatami rurarca. 44 Jatun tanquetapishmi rurarca. Chai tanqueca 12 torocuna jahuapimi carca. 45 Hiramca rey Salomón mingashca shinami Jehová Diospaj huasipajca baldecunata, palacunata, tazoncunata, tucui laya shujtaj cosascunatapish achijnicuj cobremanta rurarca. 46 Rey Salomonca Jordán jatun yacu cꞌuchullapi caj pugru pambapimi chai cosascunataca arcilla moldecunapi rurachun mandarca. Chai pugru pambaca Sucot, Zaretán llajtacuna chaupipimi carca.

47 Salomonca chai cosascuna yallitaj achca cashcamantami chaicunataca mana pesarca. Cobre mashna pesashcaca mana yacharircachu. 48 Salomonca Jehová Diospaj huasipajca tucui laya cosascunatami rurarca: oro altarta, Diosman cushca tandata churana oro mesatami rurarca. 49 Shinallataj candelerocunataca oro purohuanmi rurarca. Chai candelerocunataca pichcataca alli ladoman, pichcataca lluqui ladomanmi ashtahuan ucujman caj cuarto ñaupajpi churarca. Sisacunata, lamparacunata, pinzacunatapish orohuanmi rurarca. 50 Lavacaracunata, ninata huañuchinacunata, tazoncunata, copacunata, braserillocunatapish oro purohuanmi rurarca. Diospaj huasi ucu pungu basecunatapish orohuanmi rurarca. Chai ucuca Diospajlla ashtahuan chꞌicanyachishca ucumi carca. Shinallataj Diospaj huasi pungu basecunatapish orohuanmi rurarca.

51 Chashnami rey Salomonca Jehová Diospaj huasipaj rurana cashca tucui trabajota tucuchirca. Shinallataj paipaj yaya David Diospajlla chꞌicanyachishca cosascunatami apamurca. Cullquita, orota, shujtaj cosascunatapish Jehová Diospaj huasipimi achca valij cosascunata huaquichina cuartocunapi churarca.

Quichua Chimborazo Publicacioncuna (2008-2026)
Llujshingapaj
Yaicungapaj
  • quichua (chimborazo)
  • Shujtajcunaman cachai
  • Configuración
  • Copyright © 2025 Watch Tower Bible and Tract Society of Pennsylvania
  • Caita Yuyari
  • Huaquichishca Datocuna
  • Can nishca shina configurai
  • JW.ORG
  • Yaicungapaj
Shujtajcunaman cachai