Apocalipsis

8 Séptimo sellota Malta Oveja pascajpica jahua pachapica media hora shinatami chulunlla tucurca. 2 Chaipimi Diospaj ñaupajpi canchis angelcuna shayacujta ricurcani. Paicunaca canchis trompetacunatami chasquircacuna.

3 Shujtaj angelca inciensota rupachingapajmi oro braserillohuan chayamushpa altar cꞌuchupi shayarirca. Chai angelca jucha illajcunapaj mañaicuna uyaricujpi, jatun tiyarinapaj ñaupajpi caj oro altarpi rupachingapajmi achca inciensota chasquirca. 4 Chai angelpaj maquimantami incienciota rupachishca cushnica jucha illajcunapaj mañaicunandij Diospaj ñaupajman huichiyarca. 5 Shinapish chai ratomi angelca braserillota japirca. Chai braserillopi altarmanta nina carbonta jundachishpami allpaman shitarca. Chaipimi cꞌulun nishcacunapish, rimashcacunapish, relampagocunapish, shuj terremotopish tiyarca. 6 Chai canchis angelcunaca canchis trompetacunata tocangapajmi allichirircacuna.

7 Primer ángel paipaj trompetata tocajpica yahuarhuan chagrushca rundupish, ninapishmi cai allpaman urmarca. Chaimi quimsapi chaupishca shuj parte allpapish, quimsapi chaupishca shuj parte yuracunapish, tucui verde qꞌuihuacunapish ruparca.

8 Segundo ángel paipaj trompetata tocajpica ninahuan rupacuj shuj jatun urcu shinami mama cuchaman urmarca. Chaipimi quimsapi chaupishca shuj parte mama cucha yacuca yahuar tucurca. 9 Chashna tucujpimi quimsapi chaupishca shuj parte mama cucha yacupi causaj animalcuna huañurca. Quimsapi chaupishca shuj parte barcocunapish ñuturishpami chingarirca.

10 Tercer ángel paipaj trompetata tocajpica jahua pachamantami nina lunyacuj shina shuj jatun estrella urmarca. Chai estrellaca quimsapi chaupishca shuj parte jatun yacucunapipish, pugyu yacucunapipishmi urmarca. 11 Chai estrellaca Ajenjo shutimi carca. Quimsapi chaupishca shuj parte yacucunami ajenjo shina tucurca. Yacucuna jayajyashcamantami achca gentecuna huañurca.

12 Cuarto ángel paipaj trompetata tocajpica quimsapi chaupishca shuj parte intipish, quimsapi chaupishca shuj parte lunapish, quimsapi chaupishca shuj parte estrellacunapishmi amsayarca. Shinallataj quimsapi chaupishca shuj parte punllapish, quimsapi chaupishca shuj parte tutapish amsami tucurca.

13 Shinallataj jahuajta shuj águila volacujtami ricurcani. Chai águila sinchita caparishcatapishmi uyarcani. Paica: “¡Aij! ¡Aij! ¡Aij! ¡Quimsa angelcunapaj trompeta tocashca uyarijpica cai pachapi causaj gentecunaca imachari tucunga. Chai angelcunaca ñallami paicunapaj trompetacunataca tocangacuna!” nircami.