1 Reyes
6 Salomonca israelitacuna* Egipto llajtamanta llujshishca 480 huatacuna qꞌuipa, Israel llajtata chuscu huatacunata mandacushpami ziv* quillapi Jehová* Diospaj huasita shayachi callarirca (ziv quillaca segundo quillami carca). 2 Jehová Diospaj cachun rey Salomón shayachishca huasica largomanca 26 metrocuna yallita,* anchomanca casi iscun* metrocunata,* altomanca 13 metrocunatami* charirca. 3 Diospaj huasiman yaicuna corredorca anchomanca chai huasi midishca shinallatajmi casi iscun metrocunata charirca. Huasi ñaupajmanta midijpica chai corredorca largomanca chuscu metrocuna yallitami* charirca.
4 Salomonca Diospaj huasipi churangapajmi ventanacunata rurarca. Chai ventana marcocunaca canlla ladomanca angosto, ucu ladomanca anchomi carca. 5 Diospaj huasi pircacunapi pegachishpami shuj huasita rurarca. Chai huasica Diospajlla chꞌicanyachishca cuarto lado muyundijtapish, Diospajlla ashtahuan chꞌicanyachishca cuarto lado muyundijtapishmi rurashca carca. Chai muyundijpimi cuartocunatapish rurarca. 6 Primer piso cuartocunaca anchomanca ishqui metrocuna yallitami* midirca. Segundo piso cuartocunaca casi quimsa metrocunatami* midirca. Tercer piso cuartocunaca quimsa metrocuna yallitami* midirca. Diospaj huasi muyundij pircacunata jutcushpa vigacunata ama churangapajmi cada piso pircacunataca gradacunata shina rurarca.
7 Diospaj huasitaca minamanta* apamushca labrashca rumicunahuanmi rurarca. Chaimantami huasichicujpica martillocunahuan, hachacunahuan, ima shujtaj fierro herramientacunahuan tacashcapish ima mana uyarirca. 8 Primer piso cuartocunaman yaicuna punguca Diospaj huasi ura ladomanmi* carca. Primer pisomanta segundo pisocama, segundo pisomanta tercer pisocama huichiyangapajca muyushpa llujshina gradacunami tiyarca. 9 Salomonca Diospaj huasita rurashpami catirca. Ña tucuchishpaca techopica cedro vigacunatami churarca. Shinallataj cedro tablacunatami filapi churarca. 10 Diospaj huasi muyundijtaca cuartocunatami rurarca. Cada cuartomi altomanca ishqui metrocuna yallita midirca. Chai cuartocunaca Diospaj huasi pircacunapimi cedro caspicunahuan charichishca carca.
11 Chai tiempopimi Jehová Diosca Salomonmanca cashna nirca: 12 “Ñuca leycunata cazujpi, ñuca imallata rurachun nishcacunata pajtachijpi, tucui ñuca mandamientocunata cazujpi, chaicunapi nishca shina causajpica cambaj yaya Davidman ñuca ari nishcata canhuan pajtachishpami can shayachicuj huasipi causasha. 13 Ñucaca israelitacunapaj chaupipimi causasha. Ñuca pueblo Israeltaca mana shitashpa saquishachu” nircami.
14 Salomonca Diospaj huasitaca tucuchingacamami rurashpa catirca. 15 Diospaj huasi ucu pata quinricunataca pambamanta callarishpami techocama cedro tablacunahuan jahuata churarca.* Cutin chai huasi pambataca enebro tablacunahuanmi entablarca. 16 Chai huasi huashamanca casi iscun metrocunata charij shuj cuartotami rurarca. Chai cuartotaca pambamanta callarishpami techocama cedro tablacunahuan jahuata churarca. Chashnami ashtahuan ucujman caj cuartota rurarca. Chai cuartoca Diospajlla ashtahuan chꞌicanyachishca ucumi* can. 17 Diospajlla chꞌicanyachishca ucuca casi 18 metrocunatami* charirca. Chai ucuca Diospajlla ashtahuan chꞌicanyachishca ucu ñaupajpimi carca. 18 Diospaj huasi ucu patacuna jahuata churashca cedro tablacunapica calabazacunata, pascaricuj sisacunata labrashcami carca. Tucui patacuna cedro tablacunahuan jahuata churashca cashcamantami rumicunaca mana ricurirca.
19 Jehová Dioshuan ari ninacushca arcata* huaquichingapajmi Diospaj huasi ucupica ashtahuan ucujman caj cuartota allichirca. 20 Ashtahuan ucujman caj cuartoca largomanca casi iscun metrocunatami midirca. Anchomanca casi iscun metrocunatami midirca. Altomanpish casi iscun metrocunatami midirca. Chai cuartotaca Salomonca oro purohuanmi jahuata churarca. Cutin altartaca* cedro tablacunahuanmi jahuata churarca. 21 Salomonca Diospaj huasi ucutaca oro purohuanmi jahuata churarca. Orohuan jahuata churashca ashtahuan ucujman caj cuarto ñaupajpica oro cadenacunatami huarcurca. 22 Diospaj huasitaca tucuitami orohuan jahuata churarca. Shinallataj ashtahuan ucujman caj cuarto cꞌuchullapi tiyaj altartapish tucuitami orohuan jahuata churarca.
23 Ashtahuan ucujman caj cuartopica pino caspimantami ishqui querubincunata rurarca. Cada querubinmi altomanca chuscu metrocuna yallita midirca. 24 Querubinpaj shuj alasca ishqui metrocuna yallitami midirca, cutin caishuj alaspish ishqui metrocuna yallitami midirca. Shuj alas puntamanta caishuj alas puntacamaca chuscu metrocuna yallitami midirca. 25 Caishuj querubinpish chuscu metrocuna yallitami midirca. Ishquindij querubincunami chai shinallataj, chai valillataj carcacuna. 26 Shuj querubinca altomanca chuscu metrocuna yallitami midirca. Caishuj querubinpish chaillatatajmi midirca. 27 Chai querubincunataca ashtahuan ucujman caj ucupimi* churarca. Querubincunapaj alascuna pascashca cashcamantami shuj querubinpaj alasca shuj patacama tuparca, cutin caishuj querubinpaj alasca caishuj lado patacama tuparca. Cutin caishuj ishqui alascunaca cuarto chaupicama pascashca cashcamantami paicunapura tupacurca. 28 Querubincunatapish orohuanmi jahuata churarca.
29 Diospaj huasi tucui patacunapica ashtahuan ucujman caj cuarto patacunapipish, canlla ladoman caj cuarto patacunapipish* querubincunata, palmeracunata, pascaricuj sisacunatami labrarca. 30 Huasi ucu pambataca orohuanmi jahuata churarca. Ashtahuan ucujman caj cuarto pambatapish, canlla ladoman caj cuarto pambatapishmi chashna rurarca. 31 Ashtahuan ucujman caj cuartoman yaicungapajca pino caspihuanmi pungucunata rurarca. Ladocunamanpish pilarcunata, pungucunapaj caspicunatami rurarca. Chaica pichcapi chaupishca shuj parte shinami carca.* 32 Ishquindij pungucunami pino caspimanta rurashca carca. Chai pungucunapica querubincunata, palmeracunata, pascaricuj sisacunatami labrarca. Shinallataj chai pungucunataca orohuanmi jahuata churarca. Querubincuna jahuapi, palmeracuna jahuapica orotami martillohuan tacashpa churarca. 33 Diospaj huasiman* yaicuna pungu caspicunatapish chashnallatajmi pino caspicunahuan rurarca. Chaica chuscupi chaupishca shuj partemi carca.* 34 Enebro caspihuanmi ishqui pungucunata rurarca. Cada pungumi chaupipi doblarishpa caspicuna jahuapi pascarijlla carca. 35 Chai pungucunapica querubincunata, palmeracunata, pascaricuj sisacunata labrashpami oro laminahuan jahuata churarca.
36 Ucu patio pircataca labrashca rumicunahuanmi quimsa filata rurarca. Chai pircapica shuj filatami cedro vigacunata churarca.
37 Rey Salomonca chuscu huatacunata mandacushpami ziv* quillapi Jehová Diospaj huasita rurangapaj cimientocunata churarca. 38 Cutin 11 huatacunata mandacushpami bul* quillapi, planocunapi rurashca shinallataj Diospaj huasitaca tucuita tucuchirca (bul quillaca octavo quillami carca). Canchis huatacunapimi tucuchirca.