Hechos
6 Chai punllacunapica Jesusta catijcunaca ashtahuan ashtahuanmi mirashpa caticurcacuna. Griego shimita parlaj judiocunaca ñucanchijpura viudacunaca punllanta paicuna chasquina micunataca mana chasquicuncunachu nishpami hebreo shimita parlaj judiocunamanta quejarircacuna. 2 Chaimi 12 apostolcunaca Jesusta catijcunata tucuicunata tandachishpa cashna nircacuna: “Micunata ñucanchijllataj carangapaj Diospaj shimita yachachinata saquinaca mana allichu. 3 Chaimanta huauquicuna, cancunapuramanta alli nishca canchis runacunata agllaichij. Paicunaca Diospaj espirituhuan junda, alli yachajcunami cana can. Cai trabajota paicunaman mingangapaj pushamuichij. 4 Cutin ñucanchijca punllantami Diosta mañashpa, paipaj shimimanta yachachishpa catigrinchij” nircacunami. 5 Paicuna chashna nishcataca tucuicunami alli chasquircacuna. Chaimantami sinchi feta charij, espíritu santohuanpish junda caj Estebanta agllarcacuna. Shinallataj Felipeta, Procorota, Nicanorta, Timonta, Parmenasta, Antioquiamanta Nicolastapishmi agllarcacuna. Nicolasca judiocuna yachachishcata catijmi tucushca carca. 6 Paicunatami apostolcunapajman pusharcacuna. Apostolcunaca Diosta mañashca qꞌuipami paicunapaj uma jahuapi maquicunata churarcacuna.
7 Chashna tucushcamantami Diospaj shimitaca shujtaj ladocunapipish huillashpa catircacuna. Jesusta catijcunapish ashtahuan ashtahuanmi Jerusalenpica mirarishpa catircacuna. Shinallataj achca sacerdotecunapishmi Jesusta catijcuna tucurca.
8 Estebanca Diospaj ñaupajpi alli ricurishcamanta, Diospaj poderta charishcamantapishmi jatun milagrocunata, mancharina ruraicunatapish gentecunapurapi ruracurca. 9 Ashtahuanpish Libertos nishca sinagogapi tandanacushcacunamanta,* Cirenemanta, Alejandriamanta, Ciliciamanta, Asiamantapish huaquin runacunami Estebanhuan pꞌiñanacushpa rimanacunaman chayarcacuna. 10 Shinapish Estebanca alli yachaita charishcamanta, Diospaj espirituta charishcamantami alli parlarca. Chaimi paicunaca imata mana ni tucurcacuna. 11 Chaimantami paicunaca huaquin runacunata pacalla cayashpa: “Ñucanchijca cai runataca Diospaj contra, Moisespaj contra cꞌamicujtami uyarcanchij” nichun yachachircacuna. 12 Chashnami gentecunatapish, autoridadcunatapish,* mandashcacunata quillcajcunatapish bullata rurachun jatarichircacuna. Shina jatarichishpami Esteban maipi cashcamanca mana yuyashcapi chayarcacuna. Chaimi paita japishpaca mana nicujta mandaj juezcunapajman* pusharcacuna. 13 Shinallataj llullashpa huillajcunatapishmi chaimanca pushamurcacuna. Chashna pushamujpimi llullaj runacunaca cashna nircacuna: “Cai runaca Diospaj huasitapish, Moisesman cushca leytapish cꞌaminataca mana saquinchu. 14 Nazaretmanta Jesusmi cai huasitaca urmachinga, Moisés yachachishca costumbrecunatapishmi cambianga nicujtami uyarcanchij” nircacunami.
15 Mandaj juezcuna tandanacuna ucupi tiyacujcunaca tucuicunami Estebanta ricushpaca paipaj ñahui shuj angelpaj ñahui shina cajta ricurcacuna.