Éxodo
19 Israelitacunaca Egipto llajtamanta llujshishca huashami tercer quillapi Sinaí chaquishca pambaman chai punllallataj* chayarcacuna. 2 Paicunaca Refidimmanta llujshishpaca Sinaí chaquishca pambamanmi chayarcacuna. Chaipimi urcu chꞌimbapurapi carpa huasicunapi saquirircacuna.
3 Chai qꞌuipami Moisesca Diospaj ñaupajpi ricuringapaj huichiyarca. Chaimi Jehová Diosca urcumanta cayashpa cashna nirca: “Jacobpaj huahua huahuacunamanca caitami nina cangui, israelitacunamanca caitami intindichina cangui: 4 ‘Egipciocunata imata rurashcataca cancunapaj propio ñahuicunahuanmi ricushcanguichij. Cancunataca aguilacunapaj alas jahuapi churashpa ñucapajman pushamungapajmi chashna rurarcani. 5 Ñuca nishcata tucuipi cazushpa, ñucahuan ari ninacushcata pajtachishpaca ñucapajca tucui caishuj pueblocunamanta yalli valishca pueblomi tucunguichij. Tucui allpami ñucapaj can. 6 Cancunaca ñucapajca reycuna shina mandaj sacerdotecuna, shuj jucha illaj* llajtami tucunguichij’. Tucui caicunatami israelitacunamanca nina cangui” nircami.
7 Chaimi Moisesca urcumanta uriyashpa israelitacunata pushajcunata* tandachishpaca Jehová Dios tucui imalla mandashcata huillarca. 8 Chai qꞌuipami tucui israelitacunaca: “Ñucanchijca Jehová Dios tucui imalla nishcatami pajtachishun” nircacuna. Shina nijpimi Moisesca chai rato israelitacuna imata nishcata Jehová Diosman huillanaman rirca. 9 Chaimi Jehová Diosca Moisestaca: “Ricui, cambajmanca shuj amsa pꞌuyupimi shamusha. Canhuan ñuca parlajta israelitacuna uyachun, canpipish siempre feta churachunmi chashna shamusha” nirca. Chai qꞌuipami Moisesca israelitacuna imata nishcata Jehová Diosman huillarca.
10 Chai qꞌuipaca Jehová Diosca cashnami nirca: “Israelitacuna maipi cashcaman ri. Paicunataca cunanpish, cayapish chuyayarichun mandai. Paicunaca paicunapaj ropacunatapish tajshanami can. 11 Tercer punllapica paicunaca allichirishcami cana can. Chai punllapimi Jehová Diosca tucuicuna ricucujpi Sinaí urcu jahuaman uriyamunga. 12 Israelitacuna urcuman ama huichiyachunmi urcu muyundijpica señalcunata churana cangui. Paicunataca cashnami nina cangui: ‘Ñataj urcuman huichiyanguichijman, urcu chaquillatapish sarunguichijman. Maijanpish urcupi chaquita churajca huañungatajmi. 13 Chashna ruraj runataca mana tuparinachu canguichij. Ashtahuanpish rumicunahuan shitashpa o flechata shitashpami huañuchina canguichij. Animal cashpapish o gente cashpapish mana causashpa catingachu’ ningui. Shinapish carnero gachupi tocashcata uyashpaca urcumanca cꞌuchuyai tucungacunami” nircami.
14 Chai qꞌuipaca Moisesca urcumanta uriyashpami israelitacunataca chuyayarichun mandarca. Israelitacunaca paicunapaj ropacunatami tajsharcacuna. 15 Moisesca paicunataca: “Tercer punllapaj allichiringuichij. Shinallataj cancunapaj huarmihuanca ama chayarinacunguichijchu”* nircami.
16 Ña tercer punlla tucujpica tutamanta ladoca cꞌulun nishcami uyarirca, achij nishcapishmi ricurirca. Urcu jahuapica yana amsa pꞌuyumi tiyarca. Shinallataj gachupi sinchita tocashcami uyarirca. Carpa huasicunapi caj tucui gentecunami chujchui callarircacuna. 17 Chai huashami Moisesca Dioshuan tupangapaj israelitacunataca carpa huasicunamanta llujshichun mandarca. Chaimi paicunaca urcu chaquipi shayari callarircacuna. 18 Jehová Diosca nina chaupipimi Sinaí urcumanca uriyashca carca. Chaimantami chai urcupica tucui ladocunamanta cushni llujshicurca. Chai cushnica shuj hornomanta llujshij cushni shinami llujshicurca. Tucui urcumi sinchita chujchucurca. 19 Gachupi tocashcaca ashtahuan ashtahuan sinchitami uyarirca. Chaimi Moisesca Dioshuan parlarca. Diospish paihuan parlashpami cutichirca.
20 Chai qꞌuipaca Jehová Diosca Sinaí urcu jahuamanmi uriyarca. Paica urcu puntamanmi uriyarca. Chai huashami Jehová Diosca Moisestaca chai urcu puntaman huichiyachun mandarca. Shina mandajpimi Moisesca huichiyarca. 21 Jehová Diosca Moisestaca cashna nishpami mandarca: “Caimanta uriyashpa, israelitacunataca Jehová Diosta ricungapaj maicama señalashcata ama pasachun advirtigri. Mana cazushpaca achcacunami huañunga. 22 Shinallataj punllanta Jehová Diospajman cꞌuchuyaj sacerdotecunaca paicunata Jehová Dios ama huañuchichunmi chuyayarina can” nircami. 23 Chaimi Moisesca Jehová Diostaca: “Israelitacunaca Sinaí urcumanca mana huichiyai tucuncunachu. Canllatajmi ñucamanca: ‘Urcu muyundijpica señalcunata churai. Chai urcutaca ñucapajlla cachun chꞌicanyachi’ nishpa ñucanchijta advirtircangui” nirca. 24 Shinapish Jehová Diosca: “Ri, caimanta uriyashpa Aaronta pushashpa tigramugri. Pero Jehová Dios maipi cashcamanca sacerdotecunapish, caishuj israelitacunapish can churashca señalta pasashpa huichiyachunca ama saquinguichu. Chashnami paicunataca Diosca mana huañuchinga” nircami. 25 Shina nijpimi Moisesca israelitacuna maipi cashcaman uriyashpa Dios ima nishcata huillarca.