Josué

24 Chaimi Josueca Israelpaj tucui familiacunata Siquem llajtapi tandachirca. Chaipimi israelitacunapaj ancianocunata, pushajcunata, juezcunata, autoridadta charijcunata cayarca. Chaimi paicunaca Diospaj ñaupajpi tandanacurcacuna. 2 Josueca tucui israelitacunamanca cashnami nirca: “Israelitacunapaj Jehová Diosca caitami nin: ‘Éufrates jatun yacu caishuj ladopica achca huatacuna huashamanca cancunapaj yayacunami causarcacuna. Abrahanpaj, Nacorpaj yaya Tarepishmi chaipi causarca. Paicunaca shujtaj dioscunatami sirvircacuna.

3 Tiempo qꞌuipaca Éufrates jatun yacu caishuj ladomantami cancunapaj ñaupa yaya Abrahanta pusharcani. Paitaca Canaanpi saquirij tucui allpacunatami purichircani. Abrahanmanca Isaacta cushpami paipaj huahua huahuacunataca achcata mirachircani. 4 Cutin Isaacmanca Jacobta, Esautami curcani. Chai huashaca Esaumanmi Seír urcuta paipaj cachun curcani. Shinapish Jacobca paipaj churicunahuanmi Egiptoman uriyarcacuna. 5 Chai qꞌuipaca Moisesta, Aarontami cancunata ayudachun cacharcani. Egipto llajtamanca llaquicunatami cacharcani. Chai huashami cancunataca chai llajtamanta llujshichircani. 6 Cancunapaj yayacunata Egipto llajtamanta ñuca llujshichicujpica cancunaca mama cuchamanmi chayarcanguichij. Egipciocunaca cancunapaj yayacunataca macanacuna carretacunahuan, caballopi purijcunahuanmi Puca mama cuchacama catishpa rircacuna. 7 Chaimi cancunapaj yayacunaca Jehová Diosta ayudachun mañai callarircacuna. Chashna mañajpimi ñucaca cancunapaj yayacunapaj, egipciocunapaj chaupipica shuj amsa pꞌuyuta churarcani. Ñucaca mama cucha yacuhuanmi egipciocunataca pambarcani. Cancunapaj propio ñahuicunahuanmi Egipto llajtapi imalla rurashcata ricurcanguichij. Chai qꞌuipaca cancunaca chaquishca pambapimi achca huatacunata* causarcanguichij.

8 Cancunataca Jordán caishuj ladopi* causaj amorreocunapaj allpamanmi pusharcani. Paicunaca cancunahuanmi macanacurcacuna. Pero paicunapaj allpacunata japichun, paicunatapish tucuchichunmi cancunapaj maquipi paicunataca entregarcani. 9 Chaipimi Moab llajtamanta rey Balacca israelitacunapaj contra macanacurca. Paica Ziporpaj churimi can. Balacca Beorpaj churi Balaamtami cancunata maldicichun cayaj cacharca. 10 Pero ñucaca Balaamtaca mana uyasha nircanichu. Ashtahuanpish Balaamca achca cutinmi cancunataca bendiciarca. Paipaj maquicunamantaca ñucami cancunataca quishpichircani.

11 Chai qꞌuipaca cancunaca Jordán jatun yacuta pasashpami Jericoman chayarcanguichij. Chaipimi Jericota pushajcuna, amorreocuna, perizitacuna, cananeocuna, hititacuna, guirgaseocuna, heveocuna, jebuseocunapish cancunahuan macanacungapaj llujshircacuna. Shinapish ñucami cancunapaj maquipi paicunataca entregarcani. 12 Cancuna manaraj chayajpimi paicunataca desanimachircani.* Chaimi paicunaca amorreocunapaj ishqui reycuna shinallataj cancunamanta miticushpa rircacuna. Mana cancunapaj espadahuan, arcohuanchu paicunataca misharcanguichij. 13 Allpata japingapaj cancuna mana trabajajpipish allpatami curcani. Shinallataj cancuna mana shayachishca llajtacunatapishmi curcani. Chaipimi cancunaca causai callarircanguichij. Cunanca uva chagracunata, olivo chagracunata mana tarpushca cashpapish chaimantami micucunguichij’ ninmi.

14 Chaimanta Jehová Diosta manchaichij. Paillata tucui shunguhuan* sirvichij. Shinallataj Éufrates jatun yacu caishuj ladopi, Egipto llajtapi cancunapaj ñaupa yayacuna sirvishca dioscunatapish anchuchishpa Jehová Diosta sirvichij. 15 Cancunapaj Jehová Diosta sirvina mana alli cajpica cunanllataj pita sirvinata agllaichij. Shinaca ¿Éufrates jatun yacu caishuj ladopi cancunapaj ñaupa yayacuna sirvishca dioscunatachu sirvisha ninguichij? Mana cashpaca ¿amorreocunapaj dioscunatachu sirvisha ninguichij? Cancuna causacushca allpapica amorreocunami causarcacuna. Pero ñucapish, ñuca familiapish tucuicunami Jehová Diosta sirvishun” nircami.

16 Chaimi israelitacunaca cashna cutichircacuna: “Ñucanchijca shujtaj dioscunata sirvingapajca maitataj Jehová Diosta saquishunyari. 17 Ñucanchij Jehová Diosca ñucanchijtapish, ñucanchij yayacunatapish Egipto llajtamantami llujshichirca. Chai llajtapica esclavo shinami carcanchij. Jatun milagrocunata* Dios rurashcatapish ñucanchij ñahuicunahuanmi ricurcanchij. Diosca tucui ñancunapi, tucui llajtacunapimi maita purijpipish ñucanchijta cuidarca. 18 Jehová Diosca tucui llajtacunata, amorreocunatapishmi llujshichishpa cacharca. Amorreocunaca ñucanchij causan llajtapimi ñaupaca causarcacuna. Chaimanta Jehová Dios, ñucanchij Dios cashcamantami paillata sirvishun” nircacunami.

19 Chaimi Josueca paicunamanca cashna nirca: “Jehová Diosca jucha illajmi can. Paica paillata adorachunmi munan. Shinaca ¿cancunaca Diosta sirvishpa cati tucunguichijchu? Diosca cancuna paita mana cazujpi, juchacunata rurajpica mana perdonangachu. 20 Jehová Diosca cancunapajca siempremi allicunallata rurashca. Pero paita saquishpa, shujtaj llajtamanta dioscunata sirvijpica Diosca cancunapaj contra jatarishpami cancunata tucuchinga” nircami.

21 Pero israelitacunaca Josuemanca: “¡Chaitaca mana rurashunchu, ñucanchijca Jehová Diosllatamari sirvishun!” nircacunami. 22 Chaimi Josueca israelitacunamanca: “Cancunapaj munaillamantatajmi Jehová Diosta sirvinataca agllashcanguichij. Chaita agllashcamantaca cancunallatajmi testigocuna canguichij” nirca. Chashna nijpimi israelitacunaca: “Ñucanchijllatajmi testigocuna canchij” nircacuna.

23 Chaimi Josueca: “Cancunapuramantaca shujtaj llajtamanta dioscunata anchuchichij. Cancunapaj tucui shunguhuan israelitacunapaj Jehová Diosta sirvichij” nirca. 24 Chaimi israelitacunaca Josuemanca: “¡Ñucanchij Jehová Diostami sirvishun, paitami cazushun!” nircacuna.

25 Chai punllami Josueca israelitacunahuanca shuj ari ninacuita rurarca. Shinallataj paicunamanca shuj leyta pajtachichunmi Siquem llajtapi churarca. 26 Chaimantami Josueca cai shimicunataca Diospaj Leyta quillcashca libropi escribirca. Shinallataj jatun yura ucupica shuj jatun rumitami churarca. Chai yuraca Jehová Diospajlla chꞌicanyachishca lugar cꞌuchupimi carca.

27 Ashtahuanpish Josueca israelitacunamanca: “¡Ricuichij! Cai rumica Jehová Dios ñucanchijman tucui imalla nishcatami uyashca. Chaimantami cai rumica ñucanchijpaj testigo canga. Cancuna Diosta mana rijsinchijchu nijpica cai rumimi cancunapaj contra testigo canga” nircami. 28 Josué israelitacunata minchacama nishpa cachajpica cada unomi paicunapaj herencia allpaman tigrarcacuna.

29 Asha tiempo qꞌuipami Jehová Diosta sirvij Nunpaj churi Josueca 110 huatacunata charishpa huañurca. 30 Josuetaca Timnat-Sérah llajtapi, pai japishca allpapimi pambarcacuna. Timnat-Sérah llajtaca Efraín urcucunapimi can. Timnat-Sérah llajtaca Gaas nishca urcu janaj ladopimi carca. 31 Israelitacunaca Josué causashca tucui punllacunapipish, Josué huañushca qꞌuipa israelitacunata pushajcuna causashca tucui punllacunapipishmi Jehová Diosta sirvishpa catircacuna. Paicunaca Israelmanta Jehová Dios tucui imalla rurashcatami alli yacharcacuna.

32 Israelitacunaca Josepaj tullucunatami Egiptomanta apamushcacuna carca. Chai tullucunataca Siquem llajtapimi pambarcacuna. Hamor runapaj churicunaman 100 cullquipi Jacob randishca allpapimi pambarcacuna. Hamor runaca Siquempaj yayami carca. Chai allpataca Josepaj churicunami herenciata shina japircacuna.

33 Aaronpaj churi Eleazarpishmi huañurca. Paitaca Eleazarpaj churi Finehaspaj lomapimi pambarcacuna. Finehasmanca Efraín urcucunapimi herenciata cushcacuna carca.