1 Corintios
9 ¿Ñucaca manachu cacharichishca cani? ¿Manachu apóstol cani? ¿Manachu ñucanchij Amito Jesusta ricushcani? ¿Manachu cancunaca Amito Jesuspajta ñuca ruracushcata ricuchijcuna canguichij? 2 Shujtajcunapaj apóstol mana cashpapish, cancunapajca apostolmi cani. Cancunami ñucaca Amito Jesuspaj apóstol cashcata ricuchij sello canguichij.
3 Ñucata juchachijcunamanca cashnami cutichini. 4 ¿Manachu ñucanchijca shujtajcuna cushcata micungapaj, ubyangapaj derechota charinchij? 5 ¿Manachu ñucanchijpish caishuj apostolcuna shinallataj, Amito Jesuspaj huauquicuna shinallataj, Cefas* shinallataj Diosta sirvij huarmihuan cazarashpa ñucanchijhuan pushai tucunchij? 6 ¿Bernabehuan, ñucallahuanchu causangapajca trabajanata mana saquina canchij? 7 ¿Maijan runataj quiquin cullquillahuantaj soldado shina sirvin? ¿Uvata tarpujpish uva pꞌucujpica manachu chaita japishpa micun? ¿Animalcunata michijpish manachu asha lecheta capishpa ubyan?
8 Ñuca nishcacunaca mana gentecuna yuyashcallachu. ¿Moisesman cushca leypica manachu chaillatataj nin? 9 Moisesman cushca leypica: “Granota trillacushpaca huagrapi bozalta ama churangui” ninmi. ¿Diosca huagracunallamantachu sustarin? 10 ¿O ñucanchijmantachu chashna nin? Ari, ñucanchijmantami quillcarca. Yapuj runapish, trillaj runapish imallatapish japinata shuyashpami trabajana can.
11 Cancunapaj shungupimi Diospaj shimita tarpushcanchij. Shinaca ¿ñucanchij minishtirishcacunapaj imallatapish cancunamanta chasquinaca manachu alli? 12 Cancunaca shujtaj runacunatapishmi ayudanguichij, ¿manachu ñucanchijcarin cancunapaj ayudata chasquina derechota charinchij? Chai derechota charishpapish cancunataca imata mana mañashcanchijchu. Ashtahuanpish Cristomanta alli huillaicunata huillangapaj imapish ama jarcachunmi tucuita ahuantanchij. 13 ¿Manachu Diospajta rurajcunaca Diospaj huasipi tiyashcata micuncuna? ¿Manachu altarpi sirvijcunapish altarpi sacrificiocunata rurashcata ashata japincuna? ¿Chaitaca manachu yachanguichij? 14 Chashnallatajmi Amito Jesuspish alli huillaicunata huillajcunaca alli huillaicunamanta causachun mandarca.
15 Shinapish ñucaca cancunataca imata mana mañashcanichu. Ñucata ayudachun nishpapish cancunamanca mana quillcanichu. Ñucaca alli huillaicunata mana cobrashpa yachachishcamantami jatunyarini. ¡Chashnami ñuca jatunyarinataca pi mana quichunga! 16 Shinaca alli huillaicunata huillashpaca imamantapish mana jatun tucunachu cani. Chaitaca pajtachinatajmi cani. ¡Aij ñucalla, alli huillaicunata mana huillashpaca imachari tucuiman! 17 Caita tucui shunguhuan rurashpaca japina cashcatami japisha. Chaita rurana cashcallamanta rurana cashpapish, Diosmi chaita rurachun mingarca. 18 ¿Ñucaca imatataj japishari? Ñuca japina cashcaca alli huillaicunata mana cobrashpa huillanami. Chashnami alli huillaicunata huillangapaj mañana derechota charishpapish imata mana mañani.
19 Cacharichishca runa cashpapish tucuicunapajmi shuj sirvij runa shina tucushcani. Achca gentecunata ayudangapajmi chashna tucushcani. 20 Judiocunahuanca paicunata ayudangapajmi judío shina tucurcani. Ñucaca leyta mana catishpapish, leyta catijcunahuanca paicunata ayudangapajmi leyta catij shina tucurcani. 21 Leyta mana catijcunahuanca paicunata ayudangapajmi leyta mana catij shina tucurcani. Shinapish Diospaj ñaupajpica ley illajllaca mana canichu. Ashtahuanpish Cristopaj leytami catini. 22 Irquicunahuanca paicunata ayudangapajmi irqui shina tucurcani. Tucui laya gentecunata ayudangapajmi ñucaca imalla rurai tucushcata rurashcani. Shujllatapish quishpichingapajmi chashna tucuita rurashcani. 23 Shinapish tucui caicunataca alli huillaicunata shujtajcunaman huillangapajmi chashna rurani.
24 Shuj carrerapica tucui runacuna callpashpapish shujllami premiotaca chasquin, ¿chaitaca manachu yachanguichij? Shinaca chai premiota chasquingapaj callpaichij. 25 Shuj competenciapi participajcunaca tucuipi jarcarij cashcatami ricuchincuna. Paicunaca chingarijlla coronata japingapajmi chashna rurancuna. Shinapish ñucanchijca mana tucuri coronata japingapajmi chashna ruranchij. 26 Chaimantami ñucapish maiman chayana cashcata yachashpa callpacuni. Shinallataj huairata huajtacuj shinaca mana macanacunichu. 27 Ashtahuanpish ñuca cuerpotaca sinchita macashpami ñucata sirvij cachun rurani. Mana chashna rurajpica shujtajcunaman huillajpipish Diosca manachari ñucataca chasquinga.