2 Pedro
3 Cꞌuyashca huauquicuna, qꞌuipaman alli yuyashpa catichunmi primera cartata quillcashpa cancunata yuyachishca shinallataj cai segunda cartatapish quillcani. 2 Caitaca jucha illaj profetacuna ñaupaman ima nishcata yuyarichun, Quishpichij Amito mandashcatapish yuyarichunmi chashna yuyachini. Caicunataca cancunapaj apostolcunamantami uyarcanguichij. 3 Tucuimanta yallica, caitami yachana canguichij. Tucuri punllacunapica burlarij gentecunami ricuringa. Paicunaca alli ruraicunamantami burlaringacuna. Paicuna munashca shinami mana allicunata rurangacuna. 4 Paicunaca: “¿Pai tigramushami nishcaca maipitajyari? Ñucanchij ñaupa yayacuna huañushca* pachamantami tucui imalla tiyashcacunaca cai pachata Dios rurashca punllamanta cunancama chashnallataj catin” ningacunami.
5 Paicunapaj munaimantami ñaupa tiempomanta jahua pacha tiyashcataca mana yuyarisha nincuna. Shinallataj Dios rimashcamanta allpapish yacumanta chꞌicanyachishca cashcata, cai allpa yacu chaupipi cashcatapish mana yuyarisha nincuna. 6 Caicunami chai tiempopi causaj gentecunataca tucuchirca. Allpata yacu tucui tapajpimi chashna tucurirca. 7 Chai rimashca shimillamantatajmi cunan tiyashca jahua pachapish, cai pachapish ninahuan tucuchishca cangapaj huaquichishca can. Millai gentecunata juzgana punllacamami chashna huaquichishca canga. Chai juicio punllapimi millai gentecunaca tucuchishca cangacuna.
8 Shinapish cꞌuyashca huauquicuna, caitaca amataj cungaringuichijchu: Jehová* Diospajca shuj punllaca 1.000 huatacuna shinami. Shinallataj 1.000 huatacunaca shuj punlla shinallami. 9 Maijan gentecuna yuyashca shinaca Jehová* Diosca pai cusha nishcata pajtachingapajca mana uniyanchu. Paica shujllapish ama chingarichun, ashtahuanpish tucuicuna arrepintirichunmi cancunamanca pacienciata ricuchin. 10 Shinapish Jehová* Diospaj punllaca shuhua shinami shamunga. Chai punllami jahua pachaca jatunta cꞌulun nishpa ratito chingaringa. Jahua pachapi, cai pachapi imalla tiyashcacunapish yallitaj rupaj cashcamantami yacuyanga. Cai pachapish, cai pachapi imalla tiyajcunapish rupachishcami canga.
11 Tucui chaicuna chashna yacuyana cashcamantaca, ¡ima laya gentecuna cana cashcata yuyarichij! Cancunaca jucha illajmi cana canguichij. Diosta tucui shunguhuan adoracushcatapish ruraicunahuanmi ricuchina canguichij. 12 Jehová* Diospaj punlla shamunata* shuyashpa chai yuyailla catichij. Chai punllaca jahua pachaca ninahuanmi tucuchishca canga. Shinallataj jahua pachapi, cai pachapi imalla tiyashcacunapish yallitaj rupai tiyashcamantami yacuyangacuna. 13 Shinapish pai cusha nishca shinaca mushuj jahua pachacunata, mushuj cai pachatami shuyacunchij. Chaicunapica cashcata ruranallami tiyanga.*
14 Shinaca cꞌuyashca huauquicuna, chaicunata shuyacushcamantaca Diospaj ñaupajpi alli ricuringapaj, ima mapa illajlla cangapaj, tucuipi alli cangapaj tucui ima pudishcata ruraichij. 15 Ashtahuanpish ñucanchij Amito pacienciata ricuchishcamanta quishpirina cashcata yuyarichij. Chashnallatajmi ñucanchij cꞌuyashca huauqui Pablopish Dios alli yachaita paiman cujpi cancunamanca chashna quillcarca. 16 Pabloca paipaj tucui cartacunapimi caimanta parlarca. Shinapish chai cartacunamanta huaquin yuyaicunata intindinaca sinchimi can. Chai yuyaicunatami imata mana yachajcunapish, crishcapi mana sinchi cajcunapish Dios quillcachishca shujtaj partecunata cambiaj shinallataj cambiancuna. Chaitaca paicunallataj tucuchishca cangapajmi chashna rurancuna.
17 Chaimanta cꞌuyashca huauquicuna, caicunata ña yachashcamantaca rijcharishca caichij. Chashnami millai runacunapaj llulla yachachishcacunahuanca mana paicuna shina urmanguichij, crishcapipish sinchi catinguichij. 18 Dios yallitaj llaquij cashcata cancunaman ashtahuan ricuchichun. Ñucanchijta Quishpichij Amito Jesucristomantapish ashtahuan yachashpa catichij. Paica cunanpish, huiñai huiñaipajpish jatunyachishca cachun. Chashna cachun.*