Jonás

4 Pero Jonasca chaitaca manataj munarcachu. Chaimantami yallitaj pꞌiñarirca. 2 Chaimi Jehová Diosta mañashpaca: “Aij Jehová Dioslla, ñuca llajtapi cashpaca cashna tucunataca yacharcanimi. Chaimantami Tarsis llajtamanraj miticushpa rircani. Canca alli shungu, llaquij, pacienciata charij,* achcata cꞌuyaj,* llaquichinatapish mana munaj Diosmi cangui. Chaitaca yacharcanimi. 3 Aij Jehová Dioslla, ñucataca huañuchun saquihuailla. Causashpa catinapaj randica huañusha ninimi” nircami.

4 Chashna nijpimi Jehová Diosca: “¿Chashna yallitaj pꞌiñarinaca alli cashcatachu yuyangui?” nishpa tapurca.

5 Chaimi Jonasca chai llajtamanta llujshishpaca inti llujshin ladoman rishpa tiyarirca. Chaipimi shuj chugllata rurashpa, chai llajtahuan ima tucugrijta ricungapaj chai chuglla llandu ucupi tiyarirca. 6 Jehová Diosca Jonaspaj llaquita aliviangapajmi paita llanduchunca shuj calabaza yurata huiñachirca. Chai calabaza yurata ricushpami Jonasca cushicurca.

7 Pero Diosca cayandij tutamantaca calabaza yurata micuchunmi shuj cꞌuruta cacharca. Chaimi chai yuraca chaquirirca. 8 Ña inti llujshi callarijpimi Diosca inti llujshin ladomanta rupachij huairata cacharca. Inti yallitaj rupachijpimi Jonasca ña desmayacurca. Paica huañunata munashpami cutin cutin: “Causashpa catinapaj randica huañusha ninimi” nishpa catirca.

9 Diosca Jonastaca: “¿Calabaza yuramanta yallitaj pꞌiñarinaca alli cashcatachu yuyangui?” nishpami tapurca.

Chashna tapujpimi Jonasca: “Ari, pꞌiñarishca cangapajca derechota charinimi. Ñucaca yallitaj pꞌiñarishcami cani. Huañusha ninimi” nirca. 10 Chashna nijpimi Jehová Diosca: “Can mana tarpushca, can mana huiñachishca calabaza yuramantami llaquirishcangui. Chai yuraca shuj tutallapimi huiñarca, shuj tutallapimi chaquirirca. 11 ¿Manachu ñucapish Nínive jatun llajtapi causaj gentecunamanta, chaipi tiyaj achca animalcunamantapish llaquirina cani? Chai llajtapica 120.000 yalli gentecunami causan. Paicunaca ima alli cashcata, ima mana alli cashcatapish* mana yachancunachu” nircami.