Jueces

8 Efrainpaj familiamanta runacunaca Gedeontaca: “¿Imatataj rurarcangui? ¿Canca madianitacunahuan macanacunaman rishpaca imamantataj mana ñucanchijman huillarcangui?” nishpami tapurcacuna. Chashnami paicunaca pꞌiñarishpa Gedeontaca sinchita rimarcacuna. 2 Pero Gedeonca cashnami cutichirca: “¿Cancuna rurashcahuan chꞌimbapurajpica ñucaca imatataj rurashcaniyari? ¿Abí-Ezerpaj tucui uvata cosechashcahuan chꞌimbapurajpica manachu Efrainpaj cosechamanta chꞌalashca ashtahuan alli can? 3 Diosmi Madián llajtamanta mandaj Orebta, mandaj Zeebtapish cancunapaj maquipi cushca. ¿Cancuna rurashcahuan chꞌimbapurajpica ñucaca imatataj rurashcaniyari?” nircami. Gedeón chashna nijpimi paicunaca pꞌiñarishpa rimanata saquircacuna.

4 Qꞌuipaca Gedeonca Jordán jatun yacuman chayashpami chai jatun yacuta chꞌimbarca. Paipish, paihuan caj 300 cꞌaricunapish shaicushcami carcacuna. Paicuna chashna shaicushca cashpapish paicunapaj contracunata catinataca mana saquircacunachu. 5 Sucot llajtamanta cꞌaricunamanca Gedeonca: “Ñucahuan caj runacunaca shaicushcami can. Chaimanta paicunaman tandata carahuaichij. Ñucanchijca Madián llajtamanta rey Zebahta, rey Zalmunatami catishpa ricunchij” nircami. 6 Pero Sucot llajtamanta mandajcunaca: “¿Ñucanchijca imamantataj cambaj soldadocunamanca tandata cushunyari? ¿Ñachari canca rey Zebahta, rey Zalmunata japishpa apamurcangui?” nircacunami. 7 Chashna nijpimi Gedeonca: “Chaita nishcamantami rey Zebahta, rey Zalmunata Jehová Dios ñuca maquipi entregajpica cancunapaj cuerpotaca chaquishca pambapi tiyaj cashacunahuan tujsisha” nishpa cutichirca. 8 Chaimantaca Penuel llajtamanmi huichiyarca. Penuel llajta runacunatapish chashnallatajmi tandata mañarca. Pero paicunaca Sucot llajtapi cajcuna shinallatajmi cutichircacuna. 9 Chaimi Gedeonca Penuelpi caj runacunamanca: “Ñuca mishashpa tigramushpaca cai torretami urmachisha” nirca.

10 Rey Zebahpish, rey Zalmunapish Carcor lugarpimi paicunapaj soldadocunahuan carca. Inti llujshin ladopi causaj soldadocunamantaca 15.000 cꞌaricunallami saquirirca. Soldadocunapuramantaca 120.000 macanacuj cꞌaricunami huañushcacuna carca. 11 Gedeonca carpa huasicunapi causajcunapaj ñanta huichiyashpami catirca. (Chai ñanca Nóbah lugar inti llujshin ladoman, Jogbehá llajta inti llujshin ladomanmi saquirij carca). Chashnami paica contra soldadocunataca paicuna mana yuyashcapi llaquichirca. 12 Pero Madián llajtamanta rey Zebahpish, rey Zalmunapish miticushpami rircacuna. Chashna rijpimi Gedeonca paicunata catishpa japirca. Chaita ricushpami contra soldadocunaca achca manchaita charircacuna.

13 Qꞌuipaca Joaspaj churi Gedeonca macanacuimantami Heres lugarman huichiyana quichqui ñanta tigramurca. 14 Paica chai ñanta ricushpami Sucot llajtamanta shuj joventa japishpa tapuicunata rurarca. Chashna tapujpimi chai jovenca Sucot llajtamanta mandajcunapaj, autoridadcunapaj* shuticunata anotashpa curca. Tucuica 77 cꞌaricunami carca. 15 Chaimi Gedeonca Sucot llajtamanta cꞌaricunata ricunaman rishpaca: “Caipimi rey Zebahtapish, rey Zalmunatapish charinguichij. Cai runacunamantami cancunaca ñucamanta burlarircanguichij. Shinallataj cancunaca: ‘¿Imamantataj cambaj shaicushca cꞌaricunamanca tandata cushunyari? ¿Canca rey Zebahtapish, rey Zalmunatapish ñachari japishpa apamurcangui?’ nircanguichijmi” nirca. 16 Qꞌuipamanca Gedeonca Sucot llajtamanta mandajcunata, autoridadcunatami japirca. Paicunatami chaquishca pambapi tiyaj cashacunahuan castigarca. 17 Penuel llajtapi tiyaj torretapishmi urmachirca. Shinallataj chai llajtapi causaj runacunatapishmi huañuchirca.

18 Gedeonca rey Zebahta, rey Zalmunataca: “¿Tabor urcupi cancuna huañuchishca runacunaca ima shinataj carca?” nishpami tapurca. Chaimi paicunaca: “Can shinami carca. Paicunamantaca cada unomi shuj reypaj churi shina carca” nishpa cutichircacuna. 19 Chashna nijpimi Gedeonca: “Paicunaca ñuca huauquicuna, ñuca mamapaj churicunami carca. Causaj Jehová Diospaj shutipimi jurani, cancuna paicunata mana huañuchishca cajpica cancunataca mana huañuchimanchu carcani” nirca. 20 Chaimi Gedeonca paipaj punta churi Jetertaca: “¡Jatari, paicunata huañuchi!” nishpa mandarca. Pero chai jovenca paipaj espadataca mana llujshichircachu. Paica jovenraj cashcamantami manchaita charirca. 21 Chaimi rey Zebahpish, rey Zalmunapish Gedeontaca: “Can cꞌaritaj cashpaca canllataj ñucanchijta huañuchi” nircacuna. Chaimi Gedeonca paillataj rey Zebahta, rey Zalmunataca huañuchirca. Paicunapaj camellocunaca luna shina adornocunatami cungapi charirca. Chai adornocunatami paica apashpa rirca.

22 Qꞌuipaca Israelmanta runacunaca Gedeonmanca: “Cancunaca Madianpaj maquimantami ñucanchijtaca quishpichishcanguichij. Chaimanta canpish, cambaj churipish, cambaj nietopish ñucanchijta mandaichij” nircacunami. 23 Pero Gedeonca: “Ñucapish, ñuca churipish cancunataca mana mandashunchu. Jehová Diosmi cancunataca mandanga” nircami. 24 Shinallataj Gedeonca: “Caita mañachun saquichij: cancuna quichushca cosascunamanta cada uno singapi churarina shuj argollata cuichij” nircami. (Contracuna ismaelitacuna cashcamantami singapi churarina oro argollacunata charijcuna carca). 25 Paicunaca: “Ari, ñucanchijca canman cushunmi” nishpami cutichircacuna. Chashnami jahua churanata tindishpa quichushca cosascunamanta singapi churarina argollata cada uno shitarcacuna. 26 Singapi churana oro argollacunata Gedeón mañashcaca 1.700 siclotami* pesarca. Pero luna shina adornocunata, aretescunata, Madián llajtamanta reycuna morado millmahuan rurashca churana churashcacunata, paicunapaj camellocunapaj cungapi aparishca huallcacunatapish mana pesarcachu.

27 Gedeonca chai orohuanca shuj efodtami rurarca. Qꞌuipamanca paipaj llajta Ofrapimi gentecuna ricuchun churarca. Chaipica tucui israelitacunami efodta adorarcacuna.* Chai efodca Gedeonpajpish, paipaj familiapajpish shuj trampami carca.

28 Chashnami israelitacunaca madianitacunata misharcacuna. Chaimi madianitacunaca israelitacunata cutinca ña mana llaquichi tucurcacuna.* Shinallataj Gedeón causashca punllacunapica 40 huatacunatami chai llajtapica tranquilo causai tiyarca.*

29 Joaspaj churi Jerubaalca* paipaj huasiman tigrashpami chaipi saquirirca.

30 Gedeonca 70 churicunapaj yayami* carca. Paica achca huarmicunatami charirca. 31 Paica Siquem llajtapimi caishuj huarmihuan* shuj churita charirca. Chai churitaca Abimélec nishpami shutichirca. 32 Joaspaj churi Gedeonca yuyajyangacama* alli causashpami huañurca. Paitaca paipaj yaya Joasta pambashcallapitajmi pambarcacuna. Chaica abí-ezritacunapaj Ofrá llajtapimi carca.

33 Gedeón huañujpica israelitacunaca cutinllatajmi Baal dioscunata adorarcacuna.* Paicunaca Baal-Berit diostami paicunapaj dios cachun agllarcacuna. 34 Israelitacunaca paicunapaj muyundijpi caj tucui contracunapaj maquimanta paicunapaj Jehová Dios quishpichishcataca mana yuyarircacunachu. 35 Gedeón israelitacunapaj allicunata rurashca cajpipish paicunaca Jerubaal nishca Gedeonpaj familiamanpish mana tucurij cꞌuyaitaca mana ricuchircacunachu.