1 Juan

1 Callarimanta tiyajmantami quillcanchij. Paitami uyashcanchij. Ñucanchij ñahuicunahuanmi paitaca ricushcanchij. Pai imata rurashcatami alli ricushcanchij. Ñucanchij maquicunahuanmi paitaca tuparishcanchij. Paica causaita cuj shimita apamujmi. 2 (Yaya cushca huiñai causaimantami yachaj chayashcanchij, intindishcanchijpish. Chai causaimantami cancunaman huillacunchij, cancunaman parlacunchij). 3 Cancunapish ñucanchijhuan shuj shinalla cachunmi imata ricushcata, imata uyashcata cancunamanpish parlacunchij. Ñucanchijca Yayahuanpish, paipaj Churi Jesucristohuanpishmi shuj shinalla canchij. 4 Tucuipi cushilla cangapajmi caicunataca quillcanchij.

5 Ñucanchijman pai huillashcatami cancunaman huillasha ninchij: Diosca luzmi can. Paipica ima amsapish mana tiyanchu. 6 “Paihuanmi shuj shinalla canchij” nishpapish amsapi purinata mana saquishpaca llullacunchijmanmi. Mana llullapi nishca shinapish mana causacunchijmanchu. 7 Diosca luzpimi causan. Ñucanchijpish pai shinallataj luzpi purishpaca tucuicunami shuj shinalla cashun. Diospaj Churi Jesuspaj yahuarpish tucui ñucanchij juchacunatami chuyayachinga.

8 “Ñucanchijca mana juchayujchu canchij” nishpaca ñucanchijllatajmi umaricunchijman. Mana llulla yachachishcacunatapish mana crishcatami ricuchicunchijman. 9 Shinapish ñucanchij juchacunata huillajpica paica pajtachij cashcamanta, cashcata ruraj cashcamantami ñucanchij juchacunata perdonanga. Tucui ñucanchij millai ruraicunamantapishmi chuyayachinga. 10 Shinallataj “Ñucanchijca mana juchayujchu canchij” nishpaca “Diosca llullami can” nicunchijmanmi, paipaj shimicunatapish mana crishcatami ricuchicunchijman.