1 Crónicas
29 Rey Davidca tucui tandanacushca gentecunamanmi cashna nirca: “Ñuca churi Salomontami Diosca cai trabajota rurachun agllashca. Paica jovenrajmi, ima experienciatapish mana charinchu. Cai obrata shayachinaca yallitaj jatunmi can. Diospaj huasica* mana runacunapajchu can, ashtahuanpish Jehová Diospajmi can. 2 Ñuca Diospaj huasita shayachingapajca tucuita allichishpa saquingapajmi achca esfuerzota rurashcani. Orohuan trabajocunata rurangapajca orota, cullquihuan trabajocunata rurangapajca cullquita, cobrehuan trabajocunata rurangapajca cobreta, fierrohuan trabajocunata rurangapajca fierrota, maderahuan trabajocunata rurangapajca maderacunatapishmi tucuita tandachishcani. Shinallataj ónice* rumicunata, rumicunata tandachingapaj mezclacunata, chꞌican chꞌican colorta charij uchilla rumicunata, tucui laya sumaj rumicunata, achca alabastro rumicunatapishmi tandachishcani. 3 Jucha illaj huasipaj tucuita allichishpa listo saquishca cashpapish, ñuca Diospaj huasita cꞌuyashcamantami tucui ñuca charishcacunamantaca orotapish, cullquitapish ñuca Diospaj huasipaj cuni. 4 Ofirmanta 3.000 talento* orotapishmi cuni. Chꞌican chꞌican cuartocunapaj* patacunata cullquihuan jahuata churangapajpish 7.000 talento cullquitami cuni. 5 Shinallataj orohuan trabajota rurangapaj, cullquihuan trabajota rurangapaj, artesanocunapish tucui laya trabajocunata rurachunmi tucuita cuni. ¿Cunanca Jehová Diosmanca pitaj imallatapish shungumanta cusha nin?” nircami.
6 Chaimi yayacunapaj familiacunata mandajcunapish, Israelpaj familiacunata mandajcunapish, 1.000 gentecunata pushajcunapish, 100 gentecunata pushajcunapish, reypaj trabajocunata rurangapaj encargadocunapish shungumanta cushun nircacuna. 7 Paicunaca Diospaj huasita rurangapajca 5.000 talento orota, 10.000 dárico* cullquita, 10.000 talento cullquita, 18.000 talento cobreta, 100.000 talento fierrotapishmi curcacuna. 8 Shinallataj sumaj rumicunata charijcunaca chai sumaj rumicunatami curcacuna. Chaicunataca Jehová Diospaj huasipi achca valij cosascunahuan huaquichingapajmi curcacuna. Cai huasita cuidajca guersonitacunapuramanta Jehielmi carca. 9 Gentecunaca tucui shunguhuanmi Jehová Diosman shungumanta cushca ofrendacunata curcacuna. Chashna shungumanta cushca ofrendacunata cushcamantami gentecunaca cushilla carcacuna. Rey Davidpish yallitaj cushillami carca.
10 Davidca tucui gentecunapaj ñaupajpimi Jehová Diosta alabarca. Davidca cashnami nirca: “Ñucanchij yaya Israelpaj Jehová Diosca huiñai huiñaipaj* alabashca cachun. 11 Jehová Dioslla jatun canapish, poderpish, sumaj canapish, achijnicuj canapish, yallitaj jatun canapish cambajmi can. Jahua pachapi imalla tiyajcunapish, cai pachapi imalla tiyajcunapish cambajmi can. Jehová Dioslla mandanapish, tucuicunapaj jahuapi pushaj canapish cambajmi can. 12 Charij canapish, sumaj canapish canmantami shamun, canmi tucuita mandangui. Cambaj maquipica fuerzapish, poderpishmi tiyan. Cambaj maquicunahuanmi jatunyachingui, tucuicunata sinchiyachingui. 13 Chaimantami ñucanchij Dioslla, cunanca canta pagui ninchij, cambaj sumaj shutitapish alabanchij.
14 Shinapish ¿ñucapish, ñuca llajtapi causajcunapish cashna laya shungumanta cushca ofrendacunata cungapajca imataj canchijyari? Tucui ñucanchij charishcacunaca canmantami shamun, canman cushcacunapish can cushcallatajmi can. 15 Cambaj ñaupajpica ñucanchij ñaupa yayacuna shinallatajmi shujtaj llajtamanta shamushca runacuna shina, caru llajtamanta shamushca runacuna shinalla canchij. Ñucanchij causaica cai allpapica shuj llandu shinallami can. Caipi causashpa catingapajca ima esperanza mana tiyanchu. 16 Ñucanchij Jehová Dioslla, cambaj shutita jatunyachingapajmi cai huasita shayachingapaj tucui cai achca charinacunata tandachishcanchij. Tucui caica cambaj maquimantami shamun, tucui caica cambajmi can. 17 Ñuca Dioslla, canca shunguta alli ricuj cashcataca allimi yachani. Canca cashcata ruraj cachunmi munangui. Ñucaca cashcata ruraj shunguhuanmi tucui caicunataca shungumanta cushcani. Cambaj pueblopish shungumanta cushca ofrendacunata caipi cucujta ricushpami cushilla sintirini. 18 Ñucanchij ñaupa yaya Abrahanpaj, yaya Isaacpaj, yaya Israelpaj Jehová Dioslla, cai llajtapi causajcunataca shungumanta cuna yuyaita charishpa catichun, cantapish tucui shunguhuan sirvishpa catichun ayudapai. 19 Cambaj mandashcacunata, advertenciacunata, leycunata tucui shunguhuan ñuca churi Salomón cazuchun ayudapai. Tucui caicunata rurachun ayudapai. Shinallataj tucui ñuca allichishcacunahuan cai jatun huasita pai shayachichun ayudapai” nircami.
20 Chaimi Davidca chaipi caj tandanacushca gentecunamanca: “Cunanca ñucanchij Jehová Diosta alabaichij” nirca. Tucui chaipi caj tandanacushca gentecunami paicunapaj ñaupa yayacunapaj Jehová Diosta alabarcacuna. Chashnami paicunaca Jehová Diospaj ñaupajpipish, reypaj ñaupajpipish cumurishpa cungurircacuna. 21 Paicunaca chai punllapish, cayandij punllapish Jehová Diosmanmi sacrificiota cushpa catircacuna. Shinallataj rupachishca ofrendacunatapishmi Jehová Diosman cushpa catircacuna. Chaipajca: 1.000 malta huagracunata, 1.000 carnerocunata, 1.000 malta ovejacunatami vino ofrendacunahuan curcacuna. Chashnami tucui israelitacunamantaca achca sacrificiocunata curcacuna. 22 Chai punllaca Jehová Diospaj ñaupajpimi yallitaj cushicushpa micurcacuna, ubyarcacuna. Davidpaj churi Salomontapish cutinllatajmi rey cachun agllarcacuna. Shinallataj Salomontaca Jehová Diospaj ñaupajpi pushaj cachunmi agllarcacuna, Sadoctapish sacerdote cachunmi agllarcacuna. 23 Salomonca paipaj yaya Davidpaj randimi Jehová Diospaj jatun tiyarinapi mandangapaj rey shina tiyarirca. Paipaj mandanaca tucuipimi alli llujshirca. Tucui israelitacunapishmi paitaca cazurcacuna. 24 Tucui mandajcunapish, sinchi macanacujcunapish, rey Davidpaj tucui churicunapishmi rey Salomontaca cazurcacuna. 25 Jehová Diosca Salomontaca tucui israelitacunapaj ñaupajpimi jatunyachirca. Israel llajtapica paita shinaca shujtaj reytaca manataj chashna jatunyachircacunachu.
26 Jesepaj churi Davidca tucui Israel llajtatami mandarca. 27 Davidca Israel llajtapica 40 huatacunatami mandarca. Hebrón llajtapica canchis huatacunatami mandarca. Cutin Jerusalén llajtapica 33 huatacunatami mandarca. 28 Davidca achca huatacunata alli causashcamanta, achcata charijyashcamanta, jatunyachishca cashcamantami cushicurca. Chashnami Davidca yuyajyangacama alli causashpa huañurca. Qꞌuipaca paipaj churi Salomonmi mushuj rey tucurca. 29 Rey Davidpaj causaimantaca callarimanta tucuringacamami Dios ricuchishcata huillaj Samuelpaj quillcashcapi, profeta Natanpaj quillcashcapi, muscuipi shina ricushcacunata huillaj Gad runapaj quillcashcapi tiyacun. 30 Rey ima shina mandashcata, paipaj poderta ima shina ricuchishcata, chai tiempopi paihuan ima tucushcata, Israel llajtahuan ima tucushcata, chai muyundij llajtacunapi mandajcunahuanpish ima tucushcatami chaipica huillacun.