2 Crónicas
6 Chaimi Salomonca cashna nirca: “Jehová Diosca yana amsa pꞌuyu chaupipimi causasha nirca. 2 Cunanca cambajmi shuj sumaj huasita rurashcani. Chaipi huiñaita causachunmi rurashcani” nircami.
3 Chai qꞌuipami reyca tigrarishpa, chaipi shayacuj tucui tandanacushca israelitacunataca bendiciarca. 4 Salomonca cashnami nirca: “Israelitacunapaj Jehová Diosca alabashca cachun. Ñuca yaya Davidman paipaj shimihuan ari nishcatami paipaj maquicunahuan pajtachishca. 5 Paica: ‘Egipto llajtamanta ñuca pueblota llujshichishca punllamantami shuj huasita shayachishpa, chaipi ñuca shutita jatunyachichunca israelitacunapaj tucui familiacunamantaca ni shuj llajtata mana agllarcani. Shinallataj ñuca pueblo Israelta pushachunca shuj runallatapish mana agllashcanichu. 6 Pero cunanca ñuca shuti jatunyachishca cachunmi Jerusalén llajtata agllashcani. Shinallataj ñuca pueblo Israelta mandachunca Davidtami agllashcani’ nircami. 7 Ñuca yaya Davidca israelitacunapaj Jehová Diospaj shutita jatunyachingapajmi shuj huasita shayachinata tucui shunguhuan munarca. 8 Pero Jehová Diosca ñuca yaya Davidtaca cashnami nirca: ‘Canca ñuca shutita jatunyachingapajmi shuj huasita ruranata tucui shunguhuan munarcangui. Cambaj shungupi chaita munanaca allimi carca. 9 Chashnapish cai huasitaca canca mana shayachinguichu. Ashtahuanpish can charigrishca churimi ñuca shutita jatunyachingapaj shuj huasita shayachinga’ nircami. 10 Jehová Diosca pai ari nishcatami pajtachishca. Jehová Dios ari nishca shinami ñuca yaya Davidpaj randi rey tucushcani. Israel llajtata mandana jatun tiyarinapipishmi tiyarishcani. Shinallataj israelitacunapaj Jehová Diospaj shutita jatunyachingapajmi shuj huasita shayachishcani. 11 Chaipimi Arcata churashcani. Chai Arcapica israelitacuna Jehová Dioshuan ari nishca tabla rumicunami tiyacun” nircami.
12 Chai qꞌuipami Salomonca tucui tandanacushca israelitacunapaj ñaupajpi, Jehová Diospaj altar chꞌimbapurapi shayarishpa paipaj maquicunatapish jahua cieloman chutarca. 13 (Salomonca pai shayaringapajmi cobremanta shuj cajata shina rurarca. Chaitaca patio chaupipimi churarca. Chai cajaca largomanca ishqui metrocuna yallita,* anchomanpish ishqui metrocuna yallita, altomanca shuj metro yallitami* midirca). Tucui tandanacushca israelitacunapaj ñaupajpi cungurishpami maquicunata jahua cieloman chutashpaca 14 cashna nirca: “Israelitacunapaj Jehová Dioslla cielopipish, allpapipish can shina Diosca pi mana tiyanchu. Canca can ari nishcataca pajtachinguimi. Canta sirvijcunamanpish cambaj mana tucurij cꞌuyaitami ricuchingui. Paicunaca tucui shunguhuanmi canta sirvicuncuna. 15 Canta sirvij ñuca yaya Davidman ari nishcatami pajtachishcangui. Cambaj shimihuanmi ari nircangui, chaitaca cunanmi cambaj maquihuan pajtachishcangui. 16 Cunanca israelitacunapaj Jehová Dioslla, canta sirvij ñuca yaya Davidman ari nishcata pajtachihuai. Canca: ‘Cambaj huahuacuna ñuca leypi nishca shina causashpa, can rurashca shinallataj ñuca ñancunapi catijpica, cambaj huahua huahuacunamanta shujmi ñuca ñaupajpica siempre Israel llajtata mandangapaj tiyarinapi tiyaringa’ nircanguimi. 17 Cunanca israelitacunapaj Jehová Dioslla, canta sirvij Davidman ari nishcata pajtachihuai.
18 Pero ¿Diosca cai allpapi causaj gentecunahuanca causangachari? Jahua pachapish, jahua pachamanta jahuaman caj jahua pachacunapish can causachunca mana pajtanchu. ¡Ñuca shayachishca huasicarin maitashi pajtanga! 19 Cunanca ñuca mañashcata, ñuca rogarishcata alli uyahuai. Ñuca Jehová Dioslla, ayudachun rogarishcata uyahuai. Cambaj ñaupajpi canta sirvij mañacushcatapish uyahuai. 20 Canta sirvij cai huasita ricushpa mañajpi uyangapajca punllapish, tutapish cai huasita ricunataca ama saquihuanguichu. Canmi cai huasipica cambaj shutita churagrishcata huillarcangui. 21 Canta sirvij ayudachun rogarishpa mañashcacunatapish uyahuayari. Cambaj pueblo Israel cai huasita ricushpa rogarishpa mañashcatapish uyahuayari. Can causacushca jahua cielomanta uyahuai. Uyashpa ñucanchijta perdonahuai.
22 Maijanpish shuj runata shujtaj runatami llaquichishca nishpa juchachijpica, chai juchachishca runaca chaita mana rurashcatachari juranga.* Pai jurashcata mana pajtachishpaca llaquipimi urmanga. Chashna jurashpa cai huasipi cambaj altar ñaupajman shamujpica 23 jahua cielomanta paita uyapangui, paita juzgapangui. Canta sirvijcunata juzgashpaca mana allita rurajtaca pai rurashcamanta castigangui, pai mana allita rurashcaca paipaj jahuallapitaj urmachun. Cutin cashcata rurajtaca ima culpayuj mana cashcata ricuchingui, paitaca cashcata ruraj cashcamanta bendiciapangui.
24 Shinallataj cambaj pueblo Israel cambaj ñaupajpi juchata rurashpa catishcamanta contracunapaj maquipi urmashpa cutin tigrarijpi, cambaj shutita jatunyachijpi, cai huasipi cambaj ñaupajpi mañajpi, rogarijpica 25 jahua pachamanta uyapangui, cambaj pueblo Israelpaj juchacunata perdonapangui, paicunataca paicunaman, paicunapaj ñaupa yayacunaman can cushca allpaman cutinllataj tigrachimupangui.
26 Paicuna cambaj ñaupajpi juchata rurashpa catishcamanta jahua pacha huichcarishpa mana tamyajpi, paicuna cai huasita ricushpa canta mañajpi, cambaj shutita jatunyachijpi, humilde cachun can yachachishcamanta paicunapaj juchacunata saquijpica 27 jahua pachamanta uyapangui. Canta sirvijcunapaj juchata, cambaj pueblo Israelpaj juchata perdonapangui. Cambaj puebloman herenciata cushca allpapi tamyachipangui. Canmi paicunataca alli ñanpi catichun yachachingui.
28 Paicunapaj llajtapi yaricai tiyajpi, tucui laya ungüicuna tiyajpi, rupachij huaira tiyajpi, chagracuna chaquirijpi,* tucuita tucuchij achca langostacuna* tiyajpi, paicunapaj llajtacunapi contracuna muyundijta jarcajpi, ima shujtaj laya llaquicuna tiyajpi, ungüicuna tiyajpi, 29 shuj runallapish o tucui cambaj pueblo Israel cai huasiman paicunapaj maquicunata chutashpa imata mañajpi, imata rogarijpica (cada unomi paicunapaj problemacunata, ima llaquita apacushcatapish yachan) 30 can causacushca jahua pachamanta paicunata uyapangui, paicunata perdonapangui. Canca paicunapaj shungutami alli rijsingui. Chaimanta cada uno rurashca shinallataj cungui. (Canllami gentecunapaj shungu ima shina cashcataca alli yachangui). 31 Chashnami paicunaca ñucanchij ñaupa yayacunaman can cushca allpapi causangacuna. Cambaj cashcata rurana ñancunapi purishpami tucui punllacuna canta manchangacuna.
32 Shinallataj cambaj pueblo Israelpuramanta mana cashpapish shujtaj llajtamanta gentecuna carumanta shamushpa paicuna cambaj jatun shutimanta, cambaj poderyuj maquimanta, cambaj poderyuj rigramanta cai huasita ricushpa canta mañajpica 33 can causacushca jahua pachamanta uyapangui. Shujtaj llajtamanta gentecuna mañashcataca tucuita rurapangui. Chashnami cambaj pueblo Israel rurashca shinallataj cai allpapi tiyaj tucui llajta gentecunaca cambaj shutita rijsishpa canta manchangacuna. Ñuca shayachishca cai huasi cambaj shutita jatunyachingapaj shayachishca cashcatapishmi yachangacuna.
34 Cambaj pueblo paipaj contracunahuan macanacunaman can cachashca ñanta rishpa, can agllashca llajtata, cambaj shutita jatunyachingapaj shayachishca huasita ricushpa canta mañajpica 35 paicuna mañashcata, paicuna rogarishcataca jahua cielomanta uyapangui, paicunata ayudapangui.
36 Cambaj pueblo Israel cambaj ñaupajpi juchata rurajpi (juchata mana rurajca ni pi mana tiyanchu) can paicunahuan pꞌiñarishpa contracunapaj maquipi entregajpi, paicunata mishajcuna caruman cashpapish, cꞌuchullaman cashpapish shujtaj llajtaman prezuta shina apajpi, 37 shinapish prezuta shina apashca llajtapi cashpa yuyaita japishpa, cambajman cutin tigrarishpa, prezu shina cashca llajtapi cashpa ‘Juchatamari rurashcanchij, mana allitamari rurashcanchij, millaitamari rurashcanchij’ nishpa rogarishpa mañajpi, 38 shinallataj paicunata prezuta shina apashca llajtapi cashpa tucui shunguhuan, tucui almahuan* cambajman cutin tigrarijpi, paicunapaj ñaupa yayacunaman can cushca allpata, can agllashca llajtata, cambaj shutita jatunyachingapaj ñuca shayachishca huasitapish ricushpa canta mañajpica 39 paicuna mañashcata, paicuna rogarishcata can causacushca jahua cielomanta uyapangui, paicunata ayudapangui. Shinallataj cambaj ñaupajpi cambaj pueblo rurashca juchata perdonapangui.
40 Cunanca ñuca Dioslla, cai huasimanta canta mañajpica ñucanchijta ricushpa uyahuayari. 41 Cunanca ñuca Jehová Dioslla, canpish, cambaj poderta ricuchij Arcandij can samarina lugarman huichiyai. Jehová Dioslla, cambaj sacerdotecunallataj quishpirinaca canmanta shamuj cashcata ricuchichun. Shinallataj canta tucui shunguhuan sirvijcunapish can tucuita allita rurashcamanta cushicuchun. 42 Jehová Dioslla, can agllashca reytaca ama saquipangui. Canta sirvij David alli cosascunata rurashcata yuyaripangui” nircami.