Tito
2 Shinapish canca alli yachachishcapi nishca shina yachachishpa cati. 2 Ñaupa huiñai cꞌaricunaca tucuipi jarcarij, alli pajtachij,* alli yuyaiyuj, sinchi feta charij, achcata cꞌuyaj, llaquicunata ahuantajmi cana can. 3 Shinallataj ñaupa huiñai huarmicunaca Dios munashca shina causaj, yangamanta mana juchachij, vinota mana yalli ubyaj, allita yachachijmi cana can. 4 Chashna cashpami qꞌuipa huiñai huarmicunataca paicunapaj cusacunata, paicunapaj huahuacunatapish cꞌuyachun yachachingacuna.* 5 Shinallataj alli yuyaiyuj cachun, chuya causaita charichun, huasipi trabajaj cachun,* allicuna cachun, paicunapaj cusacunata cazuchunmi yachachingacuna. Chashnami Diospaj shimimantaca ima mana allita mana rimangacuna.
6 Shinallataj joven cꞌaricunatapish alli yuyaita charichun aconsejashpa cati. 7 Alli ruraicunata ruranapica canllataj tucuipi alli ejemplo cai. Mana llullatapish alli yuyaihuan yachachi. 8 Pipish yangamanta canta ama juchachichunca alli shimicunahuan yachachi. Chashnami contracunaca ñucanchijmanta ima mana allita mana ni tucushpa pingai saquiringacuna. 9 Sirvij runacunapish paicunapaj amocunataca tucuipi cazuchun. Paicunata cushichina yuyailla cachun. Ima mana allita nishpapish ama cutichichun, 10 ama shuhuachun. Ashtahuanpish paicunapi confiai tucushcata ricuchichuncuna. Chashnami ñucanchijta Quishpichij Diospaj yachachishcacunata tucuipi jatunyachingacuna.
11 Diosca tucui laya gentecunata quishpichingapajmi yallitaj llaquij cashcata ricuchishca. 12 Dios yallitaj llaquij cashcata ricuchishcamantami ñucanchijca millai ruraicunamanta, cai pachapaj munaicunamanta caruyana cashcata yachanchij. Shinallataj cai pacha* gentecunapurapi cashpapish alli yuyaihuan causanata, cashcata ruranata, Diosta tucui shunguhuan adoranatami yachanchij. 13 Ñucanchij cushicushpa shuyacushca pajtaringacama shuyashpa catishunchij. Ñucanchij jatun Diospish, ñucanchijta Quishpichij Jesucristopish jatunyachishca cashcata ricuchingacama shuyashpa catishunchij. 14 Jesucristoca ñucanchijmantami paipaj causaita curca. Chashnami tucui laya millai ruraicunamanta quishpichirca. Shinallataj tucui shunguhuan alli ruraicunata rurachun, paipajlla pueblo cachunmi ñucanchijtaca chuyayachirca.
15 Caicunata yachachishpa cati. Tucui autoridadta charishcamanta aconsejashpa,* sinchita cunashpa cati. Maijanpish canta yangapi churachunca ama saquingui.