1 Reyes
18 Asha tiempo qꞌuipami ña quimsa huata tucujpi Jehová Diosca Eliastaca: “Acabpaj ñaupajpi ricurigri. Ñucaca cai llajtapica ñami tamyachigrini” nirca. 2 Chaimi Eliasca Acabpaj ñaupajpi ricurigrirca. Samaria llajtapica jatun yaricaimi tiyarca.
3 Acabca reypaj huasipi sirvij mayordomo Abdiastami cayarca. (Abdiasca Jehová Diostaca achcatami manchaj carca. 4 Jehová Diospaj profetacunata Jezabel huarmi huañuchicujpica Abdiasca 100 profetacunatami jutcucunapi pacarca. 50 profetacunataca shuj jutcupi, caishuj 50 profetacunataca shujtaj jutcupimi churarca. Chaipimi paica tandata, yacuta paicunaman curca). 5 Acabca Abdiastaca: “Tucui cai llajtata rishpa tucui pugyucunaman, tucui pugru pambacunaman* ri. Ñucanchij tucui animalcuna ama huañuchun, caballocunapish, mulacunapish causashpa catichunca suficiente qꞌuihuata japishunpishchari” nircami. 6 Chaimantami mai lugarcunallata rinata yuyarinacushpa chꞌicanyarircacuna. Acabca paillami shuj ladota rirca, Abdiaspish paillami caishuj ladota rirca.
7 Abdías ñanta ricujpimi Eliasca paita tupanaman shamurca. Chaimi Abdiasca Elías cashcata cuentata cushpa pambacama cumurishpaca: “Ñuca amito Elías, ¿canchu cangui?” nirca. 8 Chaimi Eliasca: “Ari, ñucami cani. Cambaj amopajman rishpa: ‘Eliasca caipimi’ nishpa huillagri” nirca. 9 Pero Abdiasca Eliastaca cashnami nirca: “¿Acabpaj maquipi churashpa ñucata huañuchichunca canta sirvijca ima juchatataj rurashcari? 10 Causaj cambaj Jehová Diospaj shutipimi jurani. Ñuca amoca tucui llajtacunapi, tucui mandajcunapajmanmi canta mashcanaman cacharca. Paicuna cutin cutin ‘Mana caipichu’ nijpica reyca chai llajtatapish o mandajcunatapishmi canta mana japi tucushcata jurachij carca. 11 Cunan can shamushpaca: ‘Cambaj amopajman rishpa: “Eliasca caipimi can” nishpa huillagri’ ninguimari. 12 Ñuca rijpica Jehová Diospaj espirituca cantaca maitapishchari pushanga. Acabman ñuca huillajpi pai canta mana japishpaca ñucataca huañuchingatajmi. Pero canta sirvij ñucaca jovenmantami Jehová Diosta manchashpa causashcani. 13 Ñuca amitolla, ¿Jehová Diospaj profetacunata Jezabel huañuchicujpi ñuca imata rurashcataca manachu parlarcacuna? ¿Jehová Diospaj 100 profetacunata ishqui grupopi chꞌicanyachishpa, cada grupopi 50 profetacunata jutcucunapi pacashcata, paicunaman tandata carashcata, yacutapish cushcataca manachu parlarcacuna? 14 Cunan can shamushpaca: ‘Cambaj amopajman rishpa: “Eliasca caipimi can” nishpa huillagri’ ninguimari. Chashna huillajpica ñucataca huañuchingatajmi” nircami. 15 Shinapish Eliasca: “Jahua pacha soldadocunata mandaj causaj Jehová Diospaj shutipimi jurani. Ñucaca paitami sirvini.* Cunanmi Acabpaj ñaupajpi ricurisha” nircami.
16 Chaimi Abdiasca Acabta ricunaman rishpa paiman huillarca. Qꞌuipaca Acabca Eliastami tupanaman rirca.
17 Acab Eliasta ricushpaca: “¡Caipimari cangui! ¡Canmi Israel llajtataca achcata llaquichicungui!” nircami.
18 Chaimi Eliasca cashna cutichirca: “Ñucaca Israel llajtataca mana llaquichishcanichu. Canhuan, cambaj yayapaj familiacunahuanmi llaquichishcanguichij. Cancunaca Jehová Diospaj mandamientocunata mana cazushpami Baal dioscunata adorarcanguichij. 19 Cunanca tucui israelitacunata tandachi. Shinallataj Jezabelpaj mesapi micucuj Baalpaj 450 profetacunata, adorana posteta adoracuj 400 profetacunatapish ñucahuan Carmelo urcupi tandanacuchun cayai” nircami. 20 Chaimi Acabca tucui israelitacunapajman huillajcunata cacharca. Chashnami Carmelo urcupi profetacunata tandachirca.
21 Eliasca tucui tandanacushca gentecunapajman cꞌuchuyashpami: “¿Ima horacamataj cancunaca ishqui yuyai tucushpa puringuichijyari? ¡Jehová, Dios verdadero cajpica paita catichijyari! ¡Pero Baal,* Dios verdadero cajpica paita catichijyari!” nirca. Chashna nijpica ni maijan mana shimi llujshircachu. 22 Chai qꞌuipami Eliasca gentecunamanca: “Jehová Diospaj profetacunamantaca ñucallamari saquirini. Cutin Baalpaj profetacunaca 450 profetacunamari. 23 Cunanca ishqui malta huagracunata ñucanchijman cuchun. Paicuna shuj malta huagrata japishpaca mirga mirgata pꞌitishpa yanta jahuapi churachuncuna. Pero ninataca ama japichichuncuna. Ñucapish caishuj malta huagrata allichishpami ninata mana japichishpa yanta jahuapi churasha. 24 Chai qꞌuipami cancunapaj diostaca paipaj shutipi cayanguichij. Ñucapish Jehová Diostaca paipaj shutipimi cayasha. Ninata cachashpa cutichij Diosmi, Dios verdadero cashcata ricuchinga” nircami. Chashna nijpimi tucui gentecunaca: “Allimi” nircacuna.
25 Chaimi Eliasca Baalpaj profetacunataca: “Cancuna achcacuna cashcamantaca shuj malta huagrata agllashpa cancunaraj allichichij. Chaimantaca cancunapaj diostaca paipaj shutipi cayaichij. Shinapish ninataca ama japichinguichijchu” nirca. 26 Chaimi paicunaman cushca malta huagrata japishpa, allichishpaca tutamanta ladomantaca chaupi punllacama Baalpaj shutipi cayacurcallacuna. Paicunaca: “¡Baal, cutichihuai!” nicurcacunami. Shinapish pi rimashca mana uyarircachu, mana pi cutichircachu. Paicunaca paicuna rurashca altar muyundijtami cojeashpa cojeashpa bailacurcacuna. 27 Ña chaupi punlla shinatami Eliasca paicunamanta burlarishpaca: “¡Ashtahuan sinchita caparichijyari, paica shuj diosmari! Paica imatamari alli yuyaricunga o bañomanmari rishcanga.* ¡Mana cashpaca dormirishcangamari, pi paita rijchachichunmari minishtinga!” nirca. 28 Paicunaca ashtahuan sinchitami caparircacuna. Paicunapaj costumbrecunata catishpami paicunapaj tucui cuerpomanta yahuar shutungacama cuchillocunahuan, lanzacunahuan cuchurircacuna. 29 Chaupi punlla qꞌuipapish chishi lado grano ofrendata cuna horascamami locoyashpa catircacuna. Pero pi rimashca mana uyarircachu, mana pi cutichircachu. Paicunataca mana pi uyarcachu.
30 Chai qꞌuipaca Eliasca tucui gentecunatami: “Ñucapajman cꞌuchuyaichij” nirca. Chaimi tucui gentecuna paipajman cꞌuchuyarcacuna. Eliasca Jehová Diospaj altarta urmachishcatami cutin allichirca. 31 Eliasca 12 rumicunatami tandachirca. Chai rumicunaca Jacobmanta shamuj 12 familiacunatami ricuchirca. Jehová Diosca Jacobtami: “Cambaj shutica Israelmi canga” nishca carca. 32 Chai rumicunahuanca Jehová Diospaj shutita jatunyachingapajmi shuj altarta shayachirca. Chai altar muyundijtaca shuj zanjata rurashpami 22 libra* muyuta tarpuna shina espaciota saquirca. 33 Chai qꞌuipaca yantatami allichishpa churarca. Chai yanta jahuapica malta huagrata mirga mirgata pꞌitishpami churarca. Chaimantaca: “Chuscu pꞌunducunapi* yacuta jundachishpaca rupachina* ofrenda jahuapi, yanta jahuapi tallichij” nircami. 34 Chai huashami Eliasca: “Cutinllataj chashna ruraichij” nirca. Chaimi cutinllataj chashna rurarcacuna. Cutinmi paica: “Cutin chashna ruraichij” nirca. Chaimi shuj cutinhuan chashnallataj rurarcacuna. Quimsa cutinmi chashnallataj rurarcacuna. 35 Yacuca altar muyundijtami callpacurca. Eliasca zanjapipishmi yacuta jundachirca.
36 Chishi lado grano ofrendata cuna horasca profeta Eliasca altarman cꞌuchuyashpami cashna nirca: “Abrahanpaj, Isaacpaj, Israelpaj Jehová Dioslla. Israel llajtapi can Dios cashcatapish, ñuca canta sirvij cashcatapish, can mandajpi caicunata rurashcatapish cunan yachaj chayachuncuna. 37 ¡Jehová Dioslla, cutichihuayari! Cai llajta gentecuna can Jehová Dioslla Dios verdadero cashcata yachachun, paicunapaj shungupish cambajman tigrarichun can yuyaita cucushcata yachachun cutichihuayari” nircami.
38 Chaimi Jehová Diospaj nina jahua pachamanta uriyamushpaca rupachina ofrendatapish, yantatapish, rumicunatapish, ñutu allpatapish tucui millpurca. Zanjapi tiyaj yacutapish tucuimi lambirca. 39 Tucui gentecuna chaita ricushpaca chai ratomi pambacama cumurircacuna. Paicunaca: “¡Jehová Diosmari Dios verdadero! ¡Jehová Diosmari Dios verdadero!” nircacunami. 40 Chaimi Eliasca: “¡Baalpaj profetacunata japichij! ¡Shujllapish richunca ama saquichijchu!” nirca. Shina nijpimi chai profetacunataca chai rato japircacuna. Chaimi Eliasca Cisón larca yacuman uriyashpa paicunataca chaipi huañuchirca.
41 Chai qꞌuipami Eliasca Acabtaca: “Jatun tamyami ña uyarimucun. Chaimanta micunaman, ubyanaman huichiyailla” nirca. 42 Chaimi Acabca micunaman, ubyanaman huichiyarca. Cutin Eliasca Carmelo urcumanmi huichiyarca. Chaipimi cungurishpa pambaman tupajta cumurirca. 43 Chai qꞌuipami paita ayudajtaca: “Huichiyashpa mama cucha ladota ricupai” nirca. Chaimi paica huichiyashpa, ricushpaca: “Mana ima ricurinchu” nirca. Eliasca canchis cutinmi: “Tigrashpa ricugri” nirca. 44 Ña canchis cutin rishpami paita ayudajca: “¡Ricui! Mama cuchamantaca maqui shungu valilla uchilla pꞌuyumi huichiyacun” nirca. Chaimi Eliasca: “Acabpajman rishpa: ‘¡Cambaj carretata allichi! ¡Jatun tamya ama jarcachun uriyailla!’ nigri” nirca. 45 Chaicamaca cielopi yana pꞌuyu jundarishpa, huaira jatarishpami jatunta tamyarca. Cutin Acabca paipaj carretapimi Jezreelman rirca. 46 Pero Eliasca Jehová Diospaj maqui poderta cujpimi cinturapi ropata alli huatarishpa Jezreelman chayangacama callpashpa Acabta ñaupashpa rirca.