1 Pedro
1 Ñucaca Jesucristopaj apóstol Pedromi cani. Caita chaita rishpa Ponto, Galacia, Capadocia, Asia, Bitinia llajtacunapipish causajcunamanmi quillcani. Cancunaca cai pachapica ashacamalla causajcunami canguichij. Shinallataj cancunataca Diosmi agllarca. 2 Paica jahua pacha Yayami. Pai ñaupaman yuyarishca shinami cancunataca agllarca. Paita cazuchun, Jesucristopaj yahuarhuan chuyayachingapajmi espíritu santohuan cancunataca jucha illajta rurarca:
Dios yallitaj llaquij cashcata cancunaman ashtahuan ricuchichun, sumaj causaitapish ashtahuan cuchunmi mañani.
3 Ñucanchij Amito Jesucristopaj Yaya Diosca alabashca cachun. Paica yallitaj llaquishcamantami huiñai huiñaicama esperanzata charichun ñucanchijtaca cutin huacharichirca. Cai esperanzataca huañushcacunapaj chaupimanta Jesucristo causarishcamantami charinchij. 4 Diosca cancunamanca mana tucuripaj, mana mapayashca, mana chingarij herenciatami cun. Cai herenciaca jahua pachapimi cancunapaj huaquichishca tiyacun. 5 Diosca cancuna feta charishcamanta quishpirichunmi paipaj poderhuan cuidacun. Cai quishpirinaca tucuri tiempopimi ricuchishca canga. 6 Chaimantami cancunaca asha tiempota chꞌican chꞌican llaquicunahuan llaquilla cashpapish achcata cushicunguichij. Shinapish chai llaquicunataca apanatajmi canguichij. 7 Cai llaquicunaca cancunapaj fe mashna sinchi cashcatami ricuchin. Chai femantami cancunaca Jesucristo ricurijpica alabashca, alli nishca, jatunyachishca canguichij. Cashna laya feca orotapish yalli ashtahuan valishcami can. Oroca ninapi rupachishca cashpapish chingarinllami. 8 Cancunaca Jesucristota mana nunca ricushca cashpapish paitaca cꞌuyanguichijmi. Cunan mana ricushpapish paipi feta charishcatami ricuchinguichij. Shinallataj mana huillai tucuipaj jatun sumaj cushicuihuanmi cancunaca achcata cushicucunguichij. 9 Cancunapaj feta ricuchishcamantami cushicushpa quishpiringuichij.
10 Profetacunaca chai quishpirinamantami callarishpa averiguarcacuna, tucuita tapurcacuna. Paicunaca Dios yallitaj llaquij cashcata cancunaman ricuchina cashcatami huillarcacuna. 11 Espíritu santomi Cristo llaquita apana cashcata, qꞌuipaca jatunyachishca cana cashcatapish ñaupaman huillashca carca. Chaimantami profetacunaca espíritu santo huillashca shina Cristohuan ima tucunata, ima hora pajtarinatapish ashtahuan averiguashpa catircacuna. 12 Diosca profetacunamanca paicuna huillacushca mana paicunapajllataj cashcata ashtahuanpish cancunapaj cashcatami yachaj chayachirca. Cunanca alli huillaicunata huillajcuna huillajpimi caicunamantaca uyashcanguichij. Alli huillaicunata huillajcunaca jahua pachamanta shamuj espíritu santo ayudajpimi chashna huillacuncuna. Angelcunapishmi caicunamantaca alli yachanata munancuna.
13 Chaimanta ima trabajopajpish cancunapaj yuyaita allichichij. Tucuita alli yuyaihuan ruraichij. Jesucristo ricurijpi Dios yallitaj llaquij cashcata cancunaman ricuchinata tucui shunguhuan shuyaichij. 14 Diosmanta manaraj yachashpaca mana alli munaicunatami charircanguichij. Cunanca cazuj huahuacuna cashcamanta chai mana alli munaicuna cancunata mandashpa catichunca ama saquichijchu. 15 Cancunata cayajca jucha illajmi. Pai shinami cancunapish tucui cancunapaj causaipi jucha illaj cana canguichij. 16 Dios quillcachishcapica: “Ñucaca jucha illajmi cani. Cancunapish jucha illajmi cana canguichij” ninmi.
17 Cada unopaj ruraicunamanta mana ñahuita ricushpalla juzgaj Yayata mañashpaca cai pachapi ashacamalla causashcacamaca Diosta manchashcata cancunapaj ruraicunahuan ricuchichij. 18 Cancunapaj ñaupa yayacuna saquishca yanga causaimantaca chingarijlla cullquihuan, chingarijlla orohuanca mana cacharichishca* carcanguichijchu. Chaitaca yachanguichijmi. 19 Ashtahuanpish achcata valij Cristopaj yahuarhuanmi cacharichishca carcanguichij. Cai yahuarca sano, ima mapa illajlla malta ovejapaj yahuar shinami can. 20 Diosca cai pacha manaraj tiyajpimi* Cristotaca agllashca carca. Shinapish cancunamantami paica cai tucuri punllacunapi ricurishca. 21 Cristomantami cancunaca Diospi cringuichij. Diosca paipi feta churachun, paipi shuyachunmi Cristotaca huañushcacunapaj chaupimanta causachishpa jatunyachirca.
22 Mana llulla yachachishcata cazushpami cancunaca chuyayachishca cashcanguichij. Chaimantami mana nij tucushpalla familia ucupi shina cꞌuyaita ricuchishcanguichij. Cunanca caishuj chaishuj shungumanta ashtahuan cꞌuyanacuichij. 23 Cancunaca ismujlla muyumantaca mana cutin huacharircanguichijchu. Ashtahuanpish mana ismuj muyumantami cutin huacharircanguichij. Huiñaita causaj Diospaj shimimantami chashna huacharircanguichij. 24 Dios quillcachishcapica: “Tucui runacunaca qꞌuihua shinallami. Paicuna sumaj cashcapish qꞌuihua sisa shinallami. Qꞌuihuaca chaquirinllami, sisapish urmanllami. 25 Shinapish Jehová* Diospaj shimica huiñaipajmi can” ninmi. Cai “shimica” cancunaman huillashca alli huillaicunami.