Romanos
1 Cristo Jesusta sirvij Pablomi cancunamanca cai cartata quillcani. Ñucaca apóstol cangapaj cayashca, Diospaj alli huillaicunata huillangapajpish agllashcami cani. 2 Diosca paipaj chuya Quillcachishcacunapimi ñaupa tiempomanta cai alli huillaicunata cusha nishpa profetacunaman huillachirca. 3 Cai alli huillaicunaca paipaj Churimantami. Paica cai allpapica Davidpaj huahua huahuacunamantami huacharirca. 4 Shinapish Diosca paipaj espíritu santopaj poderhuan huañushcacunapaj chaupimanta causachishpami paipaj Churitaj cashcata ricuchirca. (Paimi ñucanchij Amito Jesucristo, 5 paimantami Diosca yallitaj llaquij* cashcata ñucanchijman ricuchirca. Jesusca tucui llajta gentecuna crishpa cazuchun, paipaj shutita jatunyachichunpishmi ñucataca apóstol cachun agllarca. 6 Cancunapish chai llajta gentecunapuramantami Jesucristota catingapaj cayashca canguichij). 7 Cai cartataca Roma llajtapi causaj Dios cꞌuyashca tucui huauqui panicunamanmi quillcani. Cancunaca jucha illaj cachun cayashcami canguichij:
Ñucanchij Yaya Diospish, Amito Jesucristopish yallitaj llaquij cashcata ricuchichun, sumaj causaitapish cancunaman cuchun.
8 Cancuna crishcataca tucui ladocunapimi gentecunaca parlancuna. Chaimantami puntapica tucui cancunamanta Jesucristopaj shutipi ñuca Diosta pagui nini. 9 Diospaj Churimanta alli huillaicunata huillashpami ñucaca Diosta tucui shunguhuan* sirvicuni. Cancunamantaca mana shaicushpami Diosta mañani. Ñuca chashna mañashcataca Diosca yachanmi. 10 Diospaj munai cajpica, cunantajca ima shinapish cancunata visitanaman ringapajmi Diosta mañacuni. 11 Ñucaman Dios cushca bendicionhuan cancunatapish sinchiyachingapajmi cancunata ricunata munacuni. 12 Ashtahuancarin tucuicuna ñucanchij crishcacunahuan caishuj chaishuj sinchiyachinacungapajmi cancunata ricusha nini.
13 Huauquicuna, caita yachachunmi munani. Ñucaca achca cutinmi cancunapajman rinata munarcani. Chai llajtapi causaj gentecunapish Jesusta catijcuna tucuchunmi, shujtaj llajtacunapi shinallataj yachachinaman rinata munarcani. Shinapish mana ri tucushcanichu. 14 Grecia llajta gentecunahuanpish, shujtaj llajta gentecunahuanpish,* yachaj gentecunahuanpish, mana yachaj gentecunahuanpish dibimi cani. 15 Chaimantami Roma llajtapi cancunamanpish alli huillaicunata huillanaman rinata munacuni. 16 Alli huillaicunata huillanataca mana pinganichu. Cai alli huillaicunaca quishpichingapaj Dios poderta charishcatami ricuchin. Chaimantami feta charijcunataca tucuicunata quishpichi tucun. Puntaca judiocunata, qꞌuipaca griegocunatapish. 17 Diospi feta churajcunaca alli huillaicunata uyashpami Diosca cashcata ruraj cashcata ricuncuna. Chashnami paicunapaj feta sinchiyachincuna. Quillcachishcapi nishca shinaca: “Cashcata rurajca feta charishcamantami causanga”.
18 Diosca jahua pachamantami mana cazuj gentecunata, cashcata mana ruraj gentecunata pꞌiñashcataca ricuchin. Paicunaca Diosmanta mana llullata gentecuna ama yachachunmi jarcancuna. 19 Diosca tucuitami paicunamanca alli ricuchishca. Chaimantami paicunaca Diostaca alli rijsina carcacuna. 20 Diosta mana ricui tucushpapish pai ima shina cashcataca cai pachata ima shina rurashcata ricushpa, pai imallata rurashcata ricushpami yachai tucunchij. Cai rurashcacunami paica Diostaj cashcata, huiñaipaj poderta charishcatapish ricuchin. Chaimantami paicunaca mana yachashcanchijchu nishpaca mana ni tucuncuna. 21 Chai gentecunaca Diosta rijsishpapish paitaca mana jatunyachircacunachu, ni mana pagui nircacunachu. Ashtahuanpish paicunapaj yuyaicunaca imatapish yangallata yuyashpa, paicunapaj shungupish chꞌahuanyashpami imata mana intindishcacuna.* 22 Chai gentecunaca yachajcuna canchij nishpapish yuyai illajmi tucushcacuna. 23 Huiñaita causaj* Diosta jatunyachinapaj randica huañujlla runacunaman rijchaj, pajarocunaman rijchaj, chuscu chaquihuan purij animalcunaman rijchaj, llucashpa purij animalcunaman rijchaj rurashcalla dioscunatami jatunyachishcacuna.
24 Chaimantami Diosca paicunapaj shungu munashca shina mapa ruraicunata rurashpa catichun saquishca. Chaimi paicunapaj cuerpohuanca pinganayai mapa ruraicunata rurashcacuna. 25 Paicunaca Diosmanta mana llullata crinapaj randica, llullacunatami crishcacuna. Shinallataj Tucuita Ruraj Diosta adoranapaj randica Dios rurashcacunallatami adorashcacuna. Diosllami huiñaipaj jatunyachishca cana can. Chashna cachun.* 26 Chaimantami Diosca paicunataca huainayana pinganai munaicunata rurachun saquishca. Huarmicunaca cꞌarihuan chayarinata saquishpami mana rurana cashcata rurashcacuna. 27 Cꞌaricunapish huarmihuan chayarinatami saquishcacuna. Chaimantami caishuj chaishuj chayarinata yallitaj munashpa cꞌaricunaca cꞌaricunapura millai mapata rurashcacuna. Chashna mapata rurashcamantami paicuna rurashca shinallataj llaquita aparcacuna.
28 Paicunaca Diostaca mana rijsisha nircacunachu. Chaimantami Diosca paicunataca millaita yuyashpa catichun saquirca. Chashna saquijpimi paicunaca mana rurana cashcata rurashpa catircacuna. 29 Chai gentecunaca cashcata mana rurajcuna, millaicuna, shujtajcunapajta munajcuna, mana allicunami carcacuna. Shinallataj envidiajcuna, huañuchijcuna, macanacujcuna, umajcuna, shujtajcunata llaquichijcuna, shimi cacharirishcacuna, 30 yangamanta juchachijcunami carcacuna. Diostapish pꞌiñajcunami carcacuna. Maipishcachun rimajcuna, jatun tucushcacuna, valishca tucushcacunami carcacuna. Mana allita ruranata yuyajcuna, yaya mamata mana cazujcuna, 31 imata nisha nishcata mana intindijcuna, ari nishcata mana pajtachijcuna, familiata mana cꞌuyajcuna, mana llaquijcunami carcacuna. 32 Diosca mana allita rurajcuna huañunataj cashcatami huillan. Chaita yachashpapish paicunaca mana allita rurashpami catincuna. Shinallataj shujtajcuna mana allita rurajta ricushpapish allimi nincunami.