2 Juan
1 Ñucaca ancianomi* cani. Dios agllashca huarmiman, paipaj huahuacunamanpishmi quillcani. Cancunataca tucui shunguhuanmi cꞌuyani. Mana ñucallachu cꞌuyani. Ashtahuanpish mana llulla yachachishcacunata rijsijcunapishmi cancunataca cꞌuyan. 2 Mana llulla ñucanchij shungu ucupi cashcamanta, chai mana llulla ñucanchijpi huiñaipaj cana cashcamantami cancunataca cꞌuyanchij. 3 Yaya Diospish, paipaj Churi Jesucristopish mana llulla yachaicunatami ñucanchijmanca cunga. Paicunapaj cꞌuyaitapishmi ricuchingacuna. Shinallataj yallitaj llaquij cashcatami ricuchingacuna. Ñucanchijtaca llaquingacunami, sumaj causaitapishmi cungacuna.
4 Ñucanchij Yaya mandashca shina cancunapaj maijan huahuacuna mana llullapi puricushcata yachashpami achcata cushicuni. 5 Cunanca agllashca huarmi caitami rogapani, caishuj chaishuj cꞌuyanacushunchij. (Shuj mushuj mandashcataca mana quillcanichu, ashtahuanpish callarimanta ñucanchij charishca mandashcatami quillcani). 6 Cꞌuyaica Yaya mandashca shina causashpa catinami. Paica cꞌuyaita siempre ricuchichunmi mandarca. Chai mandashcatami cancunaca callarimanta uyarcanguichij. 7 Cai pachapica achca pandachijcunami ricurishca. Paicunaca Jesucristo shuj runa shina shamushcataca mana crincunachu. Chaicunaca pandachijcunami can, anticristopishmi can.
8 Ñucanchij imallapi sinchita trabajashcata ama chingachingapaj cuidarichij. Chashnami Dios cancunapaj allichishca tucui bendicioncunata chasquinguichij. 9 Cristo yachachishcapi mana catishpa, llulla yachachishcacunata yachachijca Dioshuanca mana shuj shinalla canchu. Cristo yachachishcapi catijca Yayahuanpish, Churihuanpish shuj shinallami can. 10 Maijanpish cancunapajman shamushpa Cristo yachachishca shina mana yachachijpica cancunapaj huasipica ama chasquichijchu. Paitaca ama saludaichijchu. 11 Maijanpish paita saludajca paipaj mana alli ruraicunapimi chagrurin.
12 Cancunaman achcata quillcana cashpapish mana papelpi, tintahuan quillcasha ninichu. Ashtahuanpish cancuna yallitaj cushicuchunmi ñahui ñahui parlanacungapaj cancunata ricunaman rina yuyailla cani.
13 Dios agllashca cambaj ñañapaj huahuacunami saludocunata cachan.