Lucas
15 Jesús ima nishcata uyangapajmi impuestota cobrajcunapish, juchayujcunapish tucuicuna paipaj muyundijpi tandanacurcacuna. 2 Chaita ricushpami fariseocunapish, mandashcacunata quillcajcunapish: “Cai runaca juchayujcunatapish alli chasquishpamari paicunahuan micun” nishpa huashalla rimacurcacuna. 3 Chaipimi Jesusca shuj chꞌimbapuraita churashpa paicunamanca cashna nirca: 4 “Shuj runaca 100 ovejacunata charishpa chaicunamanta shuj chingarijpica, ¿manachu 99 ovejacunata michicushcapi* saquishpa, chai chingarishca ovejata japingacama mashcanaman rinman? 5 Chai ovejata japishpaca cushicushpami paipaj rigra jahuapi aparinga. 6 Ña huasiman chayashpaca paipaj amigocunata, vecinocunata cayashpami: ‘¡Ñucahuan cushicuichij, chingarishca ñuca ovejatamari japimuni!’ ningami. 7 Cancunamanca cashnami nini, chashnallatajmi jahua pachapica shuj juchayuj runa arrepintirijpica arrepintirinata mana minishtij 99 cashcata rurajcunamantapish yalli ashtahuan cushicui tiyan.
8 Shuj huarmipish chunga dracma* cullquita charishpa chaimanta shujta chingachishpaca, ¿manachu lamparata japichishpa huasi ucuta pꞌichashpa, chai cullquita japingacama alli mashcanman? 9 Chai cullquita japishpaca paipaj amigacunata, vecinacunata cayashpami: ‘¡Ñucahuan cushicuichij, chingarishca dracma cullquitaca ñamari japini!’ ninga. 10 Cancunamanca cashnami nini, shuj juchayuj runa arrepintirijpica Diospaj angelcunapish chashnallatajmi cushicuncuna” nircami.
11 Jesusca caitapishmi nirca: “Shuj runaca ishqui churicunatami charirca. 12 Qꞌuipa churimi yayataca: ‘Yaya, ñuca japina herenciata ñucaman cuhuai’ nirca. Chashna nijpimi yayaca paicuna japina cashcata ishquindijman chaupishpa curca. 13 Asha punllacuna huashami, qꞌuipa churica tucuita tandashpa caru llajtaman rirca. Chaipimi maipishcachun causashpa, mana allicunata rurashpa pai japishca herenciataca tucui tucuchirca. 14 Chashna tucuita tucuchishca qꞌuipami chai llajtapica jatun yaricai tiyarca. Shina tucujpimi paipish micungapajca imata mana charirca. 15 Shinallataj chai llajtapi causaj shuj runatami trabajota cuchun mañagrirca. Chai runaca paipaj allpacunapi cuchicunata michinamanmi cacharca. 16 Chaipimi paica yaricaihuan huañucushpaca cuchicuna micucushca algarrobata micuiman yuyarca. Ashtahuanpish paimanca pi imata mana cararcachu.
17 Chaipimi paica ña yuyaita japishpaca cashna nirca: ‘¡Ñuca yayapaj huasipi trabajajcunaca achca micunatamari charincuna. Ñucaca caipica yaricaihuanmari huañucuni! 18 Cunanca jatarishpa ñuca yayapaj huasiman tigrashalla. Paitaca cashnami nisha: “Yayitu, jahua pacha Diospaj ñaupajpipish, cambaj ñaupajpipish juchallishcanimari. 19 Cambaj churi nishcallapish mana cai tucunichu. Cambaj trabajaj runata shinallapish chasquihuai” nisha’ nishpami yuyarirca. 20 Chashna yuyarishpaca paipaj yayapaj huasimanmi tigrarca. Pai caruta shamucujpirajmi yayaca paita ricushpa achcata llaquirirca. Chaimi paita tupanaman callpashpa rirca. Ña tupashpaca cꞌuyaihuanmi ugllashpa* mucharca. 21 Chaimi churica: ‘Yayitu, jahua pacha Diospaj ñaupajpipish, cambaj ñaupajpipish juchallishcanimari. Cambaj churi nishcallapish mana cai tucunichu’ nirca. 22 Chashna nijpimi yayaca paita sirvijcunataca cashna nirca: ‘Utca rishpa, chaquicama chayaj ashtahuan alli churanata apamushpa churachichij. Anillotapish, sandaliacunatapish churachichij. 23 Shinallataj huirayashca malta bizita apamushpa huañuchichij. Pai tigramushcamanta cushicushpa micungapaj. 24 Ñuca churica huañushcami carca, cutinmari causarishca. Chingarishcami carca, cunanca tigramushcamari’ nircami. Chashna nishpami yallitaj cushicui callarircacuna.
25 Chai runapaj punta churica chagrapimi carca. Chagramanta tigrashpa huasiman chayamucushpaca música tocacujtapish, bailacujtapishmi uyarca. 26 Chaita uyashpami sirvij runacunamanta shuj runata cayashpaca ima tucucushcata tapurca. 27 Shina tapujpimi chai sirvij runaca: ‘Cambaj huauqui allilla, sano tigramushcamantami cambaj yayaca, huirayashca malta bizita huañuchirca’ nirca. 28 Chashna nijpimi punta churica pꞌiñarishpa huasimanca mana yaicusha nirca. Chaipimi paipaj yaya llujshishpaca huasiman yaicuchun rogarca. 29 Chaimi churica yayataca cashna nirca: ‘¡Ricui! Cai tucui huatacunatami shuj sirvij runa shina cambaj trabajashcani. Can mandashcacunatapish siempremi cazushcani. Chashna rurajpipish ñuca amigocunahuan cushicushpa micungapajca shuj huahua chivollatapish mana cushcanguichu. 30 Ashtahuanpish cambaj churi, can charishcacunata huainayaj huarmicunahuan tucuchishpa* cutin tigramujpica huirayashca malta bizitami huañuchishcangui’ nircami. 31 Chashna nijpimi yayaca: ‘Ñuca huahualla, canca siempremi ñucahuan cashcangui. Tucui ñuca imalla charishcacunaca cambajmi. 32 Cambaj huauquica huañushcami carca, cutinmari causarishca. Chingarishcami carca, cunanca tigramushcamari. ¿Pai tigramushcamantaca manachu cushicuna canchij?’” nircami.