1 Reyes
8 Chai punllacunapica Salomonca israelitacunata pushajcunatami* tandachirca. Paica familiacunata tucui pushajcunata, yayacunapaj familiacunata pushajcunatapishmi tandachirca. Paicunaca Jerusalenpimi rey Salomonta ricunaman shamurcacuna. Jehová Dioshuan ari ninacushca arcata Davidpaj Llajtamanta huichiyachingapajmi shamurcacuna. Chai llajtataca Sion nishpapishmi rijsincuna. 2 Israelmanta tucui cꞌaricunami Chuglla huasicunata rurana fiestapica rey Salomonpaj ñaupajpi tandanacurcacuna. Chai fiestaca etanim* nishca séptimo quillapimi carca. 3 Israelitacunata tucui pushajcuna shamujpimi sacerdotecunaca Arcata alzarcacuna. 4 Jehová Diospaj Arcata, tandanacuna carpa huasita, chai carpa huasipi tiyaj Diospajlla chꞌicanyachishca tucui cosascunatami huichiyachircacuna. Chaicunataca sacerdotecuna, levitacunami huichiyachircacuna. 5 Rey Salomonpish, paihuan tandanacungapaj cayashca tucui israelitacunapishmi Arca ñaupajpi carcacuna. Paicunaca Diosman cushpa huañuchishca ovejacunapish, huagracunapish yallitaj achca cashcamantami mana yupai tucurcacuna.
6 Chai qꞌuipami sacerdotecunaca Jehová Dioshuan ari ninacushca arcataca maipi churana cashcaman aparcacuna. Diospaj huasipi ashtahuan ucujman caj cuartoman apashpami querubincunapaj alas ucupi churarcacuna. Chai cuartoca Diospajlla ashtahuan chꞌicanyachishca ucumi carca.
7 Querubincunapaj alascunaca Arca jahuata chutashcami carca. Chashnami Arcatapish, caspicunatapish tapacurca. 8 Caspicunaca yallitaj largo cashcamantami chai caspicunapaj puntacunataca Diospajlla chꞌicanyachishca ucumanta ricunalla carca. Chai ucuca ashtahuan ucujman caj cuarto ñaupajpimi carca. Pero canllamantaca mana ricunallachu carca. Chaicunaca cunan punllacunacamami chaillapitaj can. 9 Arca ucupica ima shujtaj cosascunaca mana tiyarcachu, ishqui tabla rumicunallami tiyarca. Chai rumicunataca Moisesca Horebpi cashpami Arca ucupi churashca carca. Chaipimi Jehová Diosca israelitacunata Egipto llajtamanta llujshichishpa paicunahuan shuj ari ninacuita rurarca.
10 Diospajlla chꞌicanyachishca ucumanta sacerdotecuna llujshijpica Jehová Diospaj huasipica pꞌuyumi jundarca. 11 Sacerdotecunaca pꞌuyu tiyashcamantami sacerdotecuna shina sirvingapajca mana saquiri tucurcacuna. Jehová Diospaj huasipica Jehová Diospaj sumaj achijnicujmi jundarca. 12 Chaimi Salomonca cashna nirca: “Jehová Diosca yana amsa pꞌuyu chaupipimi causasha nircami. 13 Cambajca shuj sumaj huasitami rurashcani. Chaipi huiñaita causachunmi rurashcani” nircami.
14 Chai qꞌuipami reyca tigrarishpa, chaipi shayacuj tucui tandanacushca israelitacunata bendiciarca. 15 Salomonca cashnami nirca: “Israelitacunapaj Jehová Diosca alabashca cachun. Ñuca yaya Davidman paipaj shimihuan ari nishcatami paipaj maquihuan pajtachishca. 16 Paica: ‘Egipto llajtamanta ñuca pueblo Israelta llujshichishca punllamantami shuj huasita shayachishpa, chaipi ñuca shutita jatunyachichunca israelitacunapaj tucui familiacunamantaca ni shuj llajtata mana agllarcani. Pero cunanca ñuca pueblo Israelta mandachunca Davidtami agllashcani’ nircami. 17 Ñuca yaya Davidca israelitacunapaj Jehová Diospaj shutita jatunyachingapajmi shuj huasita shayachinata tucui shunguhuan munarca. 18 Pero Jehová Diosca ñuca yaya Davidtaca cashnami nirca: ‘Canca ñuca shutita jatunyachingapajmi shuj huasita ruranata tucui shunguhuan munarcangui. Cambaj shungupi chaita munanaca allimi carca. 19 Chashnapish huasitaca mana canchu shayachingui. Ashtahuanpish can charigrishca churimi ñuca shutita jatunyachingapaj shuj huasita shayachinga’ nircami. 20 Jehová Diosca pai ari nishcatami pajtachishca. Jehová Dios ari nishca shinami ñuca yaya Davidpaj randi rey tucushcani. Israel llajtata mandana jatun tiyarinapimi tiyarishcani. Shinallataj israelitacunapaj Jehová Diospaj shutita jatunyachingapajmi shuj huasita shayachishcani. 21 Chai huasipica Arcata huaquichingapajmi shuj lugarta allichishcani. Chai Arcapica ñucanchij ñaupa yayacunata Egipto llajtamanta llujshichishpa paicunahuan Jehová Dios ari ninacushca ishqui tabla rumicunami tiyacun” nircami.
22 Chai qꞌuipami Salomonca tucui tandanacushca israelitacunapaj ñaupajpi, Jehová Diospaj altar chꞌimbapurapi shayarirca. Paipaj maquicunata jahua cieloman chutashpaca* 23 cashnami nirca: “Israelitacunapaj Jehová Dioslla, jahua pachapipish, cai allpapipish can shina Diosca pi mana tiyanchu. Canca can ari nishcataca pajtachinguimi. Canta sirvijcunamanpish cambaj mana tucurij cꞌuyaitami ricuchingui. Paicunaca tucui shunguhuanmi canta sirvicuncuna. 24 Canta sirvij ñuca yaya Davidman ari nishcatami pajtachishcangui. Cambaj shimihuanmi ari nircangui, chaitaca cunanmi cambaj maquihuan pajtachishcangui. 25 Israelitacunapaj Jehová Dioslla, cunanca canta sirvij ñuca yaya Davidman ari nishcata pajtachihuai. Paimanca: ‘Cambaj huahuacuna ñucata uyashpa, can rurashca shinallataj ñuca ñancunapi catijpica, cambaj huahua huahuacunamanta shujmi ñuca ñaupajpica Israel llajtata mandangapaj tiyarinapica siempre tiyaringa’ nircanguimi. 26 Israelitacunapaj Dioslla, cunanca canta sirvij ñuca yaya Davidman ari nishcata pajtachihuai.
27 Pero ¿Diosca cai allpapica causangachari? Jahua pachapish, jahua pachamanta jahuaman caj jahua pachacunapish can causachunca mana pajtanchu. ¡Ñuca shayachishca huasicarin maitashi pajtanga! 28 Cunanca ñuca mañashcata, ñuca rogarishcata alli uyahuai. Ñuca Jehová Dioslla, ayudachun rogarishcata uyahuai. Cunan cambaj ñaupajpi canta sirvij mañashcatapish uyahuai. 29 Canca ‘Cai huasipimi ñuca shutica jatunyachishca canga’ nircanguimi. Chaimanta canta sirvij cai huasita ricushpa mañajpi uyangapajca punllapish, tutapish cai huasita ricunataca ama saquihuanguichu. 30 Canta sirvij rogarishpa mañashcata, cambaj pueblo Israel cai huasita ricushpa rogarishpa mañashcatapish uyahuai. Can causacushca jahua pachamanta uyahuai. Uyashpa ñucanchijta perdonahuai.
31 Maijanpish shuj runata shujtaj runatami llaquichishca nishpa juchachijpica, chai juchachishca runaca chaita mana rurashcatachari juranga.* Pai jurashcata mana pajtachishpaca llaquipimi urmanga. Chashna jurashpa cai huasipi cambaj altar ñaupajman shamujpica 32 jahua pachamanta paita uyapangui, paita juzgapangui. Canta sirvijcunata juzgashpaca mana allita rurajtaca culpayuj* cashcata ricuchingui, pai mana allita rurashcaca paipaj jahuallapitaj urmachun. Cutin cashcata rurajtaca ima culpayuj mana cashcata ricuchingui, paitaca cashcata ruraj cashcamanta bendiciapangui.
33 Cambaj pueblo Israel cambaj ñaupajpi juchata rurashpa catishcamanta contracunapaj maquipi urmashpa cambajman cutin tigrarijpi, cambaj shutita jatunyachijpi, cai huasipi canta mañajpi, canta rogarijpica 34 jahua pachamanta uyapangui. Cambaj pueblo Israelpaj juchacunata perdonapangui, paicunapaj ñaupa yayacunaman can cushca allpaman cutinllataj tigrachimupangui.
35 Paicuna cambaj ñaupajpi juchata rurashpa catishcamanta jahua pacha huichcarishpa mana tamyajpi, paicuna cai huasita ricushpa canta mañajpi, cambaj shutita jatunyachijpi, humilde cachun can yachachishcamanta paicunapaj juchacunata saquijpica 36 jahua pachamanta uyapangui. Canta sirvijcunapaj juchata, cambaj pueblo Israelpaj juchata perdonapangui. Cambaj puebloman herenciata cushca allpapi tamyachipangui. Canmi paicunataca alli ñanpi catichun yachachingui.
37 Paicunapaj llajtapi yaricai tiyajpi, tucui laya ungüicuna tiyajpi, rupachij huaira tiyajpi, chagracuna chaquirijpi,* tucuita tucuchij achca langostacuna* tiyajpi, paicunapaj llajtacunamanta maijan llajtata contracuna muyundijta jarcajpi, ima shujtaj laya llaquicuna tiyajpi, ungüicuna tiyajpi, 38 shuj runallapish o tucui cambaj pueblo Israel cai huasiman paicunapaj maquicunata chutashpa imata mañajpi, imata rogarijpica (cada unomi paicunapaj shungupi ima llaquita apacushcataca yachan) 39 can causacushca jahua pachamanta paicunata uyapangui, paicunata perdonapangui, can imata yuyacushcatapish rurapangui. Canmi paicunapaj shungutaca alli rijsingui. Chaimanta cada uno rurashca shinallataj cungui (canllami cada unopaj shungu ima shina cashcataca alli yachangui). 40 Chashnami paicunaca ñucanchij ñaupa yayacunaman can cushca allpapi causangacama tucui punllacuna cantaca manchangacuna.
41 Shinallataj cambaj pueblo Israelpuramanta mana cashpapish shujtaj llajtamanta gentecuna cambaj shutimanta uyashpa, carumanta shamushpa 42 (paicunaca cambaj jatun shutimanta, cambaj poderyuj maquimanta, cambaj poderyuj rigramantami uyangacuna) cai huasita ricushpa canta mañajpica 43 can causacushca jahua pachamanta uyapangui. Shujtaj llajtamanta gentecuna mañashcataca tucuita rurapangui. Chashnami cambaj pueblo Israel rurashca shinallataj cai allpapi tiyaj tucui llajta gentecunaca cambaj shutita rijsishpa canta manchangacuna. Ñuca shayachishca cai huasi cambaj shutita jatunyachingapaj shayachishca cashcatapishmi yachangacuna.
44 Cambaj pueblo paipaj contracunahuan macanacunaman can cachashca ñanta rishpa, can agllashca llajtata, cambaj shutita jatunyachingapaj shayachishca huasita ricushpa canta mañajpica Jehová Dioslla, 45 paicuna mañashcata, paicuna rogarishcataca jahua pachamanta uyapangui, paicunata ayudapangui.
46 Cambaj pueblo Israel cambaj ñaupajpi juchata rurajpi (juchata mana rurajca ni pi mana tiyanchu) can paicunahuan pꞌiñarishpa contracunapaj maquipi entregajpi, paicunata mishajcuna caruman cashpapish, cꞌuchullaman cashpapish contracunapaj llajtaman prezuta shina apajpi, 47 shinapish prezuta shina apashca llajtapi cashpa yuyaita japishpa, cambajman cutin tigrarishpa, paicunata mishajcunapaj llajtapi cashpa ‘Juchatamari rurashcanchij, mana allitamari rurashcanchij, millaitamari rurashcanchij’ nishpa rogarishpa mañajpi, 48 shinallataj paicunata prezuta shina apashca contracunapaj llajtapi cashpa tucui shunguhuan, tucui almahuan* cambajman cutin tigrarijpi, paicunapaj ñaupa yayacunaman can cushca allpata, can agllashca llajtata, cambaj shutita jatunyachingapaj ñuca shayachishca huasitapish ricushpa canta mañajpica 49 paicuna mañashcata, paicuna rogarishcata can causacushca jahua pachamanta uyapangui, paicunata ayudapangui. 50 Shinallataj cambaj ñaupajpi cambaj pueblo rurashca juchata perdonapangui. Cambaj ñaupajpi rurashca tucui juchacunata perdonapangui. Paicunata mishajcuna llaquichunpish paicunamanca llaquina yuyaita cungui 51 (paicunaca cambaj pueblomari, cambaj herenciamari. Paicunataca fierrota yacuyachina hornomanta llujshichij shinami Egiptomanta llujshichircangui). 52 Canta sirvij rogarishcatapish, cambaj pueblo Israel rogarishcatapish alli uyahuayari. Paicuna cayajpica siempre uyahuayari. 53 Paicunataca cai allpapi tiyaj tucui pueblocunamantami cambaj herenciata shina chꞌicanyachircangui. Tucuita Mandaj Amito Jehová Dioslla, ñucanchij ñaupa yayacunata Egipto llajtamanta llujshichishpa canta sirvij Moisesman nishca shinallatajmi rurashcangui” nircami.
54 Salomonca Jehová Diospaj altar ñaupajpimi cungurishpa, maquicunata jahua cieloman chutashpa Jehová Diosta mañanata tucuchirca. Chai qꞌuipami chaimanta jatarirca. 55 Ña shayarishpaca tucui tandanacushca israelitacunatami sinchita caparishpa cashna nishpa bendiciarca: 56 “Jehová Diosca alabashca cachun. Pai ari nishca shinallatajmi paipaj pueblo Israelmanca maipi samarinata cushca. Paita sirvij Moisesman huillashca shinallatajmi tucui allicunata cusha nishcataca pajtachishca. 57 Ñucanchij Jehová Diosca ñucanchij ñaupa yayacunahuan cashca shinallataj ñucanchijhuanpish cachun. Ñucanchijtaca ama saquichun, ama shitachun. 58 Paipaj tucui ñancunapi puringapaj, mandamientocunata, leycunata, pai imallata rurachun nishcacunata cazungapaj yuyaita cuchun. Chaicunata cazuchunmi ñucanchij ñaupa yayacunataca mandarca. 59 Jehová Diosta rogarishpa mañashca shimicunataca ñucanchij Jehová Diosca tutapish, punllapish ama cungarichun. Chashnami paita sirvijtapish, paipaj pueblo Israeltapish cada punlla ima minishtishcata cushpa ayudanga. 60 Cai allpapi tiyaj tucui llajta gentecunaca Jehová Dioslla Dios verdadero cashcatami yachangacuna. ¡Shujtaj Diosca mana tiyanchu! 61 Ñucanchij Jehová Diostaca cunan ruracushca shinallataj pai cushca leycunapi nishca shina causashpa, paipaj mandamientocunata cazushpa tucui shunguhuan sirvichij” nircami.
62 Rey Salomonpish, tucui israelitacunapishmi Jehová Diospaj ñaupajpi achca sacrificiocunata curcacuna. 63 Salomonca Jehová Dioshuan alli tucungapaj sacrificiocunatami curca. Paica 22.000 huagracunata, 120.000 ovejacunatami curca. Chashnami reypish, tucui israelitacunapish Jehová Diospaj huasita inagurarcacuna. 64 Chai punllaca reyca Jehová Diospaj huasi ñaupajpi caj chaupi patiotami chuyayachirca. Chaipimi paica rupachishca sacrificiocunata, grano ofrendacunata, Dioshuan alli tucungapaj sacrificiocunamanta huiratapish cuna carca. Jehová Diospaj huasi ñaupajpi caj cobre altarca yallitaj uchilla cashcamantami rupachishca sacrificiocunapajpish, grano ofrendacunapajpish, Dioshuan alli tucungapaj sacrificiocunamanta huirapajpish mana pajtarca. 65 Chai punllacunapimi Salomonca tucui israelitacunandij ñucanchij Jehová Diospaj ñaupajpi shuj fiestata rurarca. Chai fiestamanca yallitaj carumantami shamurcacuna. Lebó-Hamatmanta,* Egipto pugru pamba cꞌuchumantami achca gentecuna shamurca. Chai fiestaca canchis punllacunatami tiyarca, chai qꞌuipapish canchis punllacunahuanmi tiyarca. Totalca 14 punllacunatami tiyarca. 66 Fiesta tucurishca cayandij punllami* gentecunataca minchacama nishpa cacharca. Chai gentecunaca Jehová Dios paita sirvij Davidman, paipaj pueblo Israelman llaquij cashcata ricuchishcamantami reyta bendiciashpa, achcata cushicushpa, shungupipish contentarishpa paicunapaj huasiman rircacuna.