Josué

16 Josepaj huahua huahuacunapaj sorteashca allpacunaca Jericó ladopi saquirij Jordán jatun yacumantaca Jericó inti llujshin ladopi saquirij yacucunacamami carca. Jericó llajtamantaca chaquishca pambata huichiyashpami Betelpi saquirij urcucunacama chayarca. 2 Chai lindecunaca Luz llajta cꞌuchupi caj Betelmantaca Atarotpi caj arkitacunapaj lindecamami carca. 3 Chaimantaca inti huashicun ladoman caj jafletitacunapaj lindecamami uriyarca. Chashnami Bet-Horón Baja lindecama, Guezercama chayashpa mama cuchapi tucurirca.

4 Chashnami Josepaj huahua huahuacunaca paicunapaj allpacunata japircacuna. Paicunaca Manasespaj familia, Efrainpaj familiami carcacuna. 5 Efrainpaj huahua huahuacunamanta cada familiapaj lindecunaca caicunami carca. Paicunapaj inti llujshin ladopi caj lindeca Atarot-Addar llajtami carca. Bet-Horón Alta llajtacama, 6 Jatun mama cuchacamami* carca. Janaj ladoman caj lindeca Micmetatmi carca. Chai lindeca inti llujshin ladoman caj Taanat-Silota vueltata cushpaca inti llujshin ladopi caj Janóah lugartami pasarca. 7 Chai lindeca Janoahmanta uriyashpaca Atarotman, Naaramanmi chayarca. Chaimanta uriyashpaca Jericocamami chayarca. Jericomantaca Jordán jatun yacucamami chayarca. 8 Tapuahmanta inti huashicun ladopi caj Caná pugru pambacama chayashpaca mama cuchapimi tucurirca. Cai allpacunami Efrainpaj familiamanta cada familia japishca allpacuna can. 9 Efrainpaj huahua huahuacunaca shujtaj llajtacunatapish, chai llajtacunapaj uchilla pueblocunatapishmi japircacuna. Chai llajtacunaca Manasés herenciata japishca chaupipimi carca.

10 Pero Guézer llajtapi causaj cananeocunataca mana llujshichishpa cacharcacunachu. Cananeocunaca cunan punllacunacamami Efrainpaj familiapurapi causacuncuna. Paicunataca sinchi trabajocunata rurachunmi obligarcacuna.