1 Juan
2 Ñuca huahuacunalla, juchata ama rurachunmi caicunataca quillcani. Maijanpish juchata rurajpica shuj ayudajtami* charinchij. Paica Yaya Diospaj cꞌuchupi caj cashcata ruraj Jesucristomi. 2 Paica ñucanchij juchacunamanta Dioshuan alli tucujta ruraj sacrificiomi can. Shinapish mana ñucanchij juchacunallamanta, ashtahuanpish muyundij allpapi causaj gentecunapaj juchacunamantapish sacrificiomi can. 3 Paipaj mandashcacunata cazushpa catishpami paita rijsishcataca yachanchij. 4 Maijanpish “Paitaca rijsinimi” nishpapish pai mandashcacunata mana cazushpaca llullami, verdadtaca mana nicunchu. 5 Maijanpish Cristo nishcata cazushpaca tucui shunguhuan Diosta cꞌuyashcatami ricuchin. Ñucanchijpish pai nishcata cazushpaca paihuan shuj shinalla cashcatami ricuchishun. 6 Maijanpish paihuanmi shuj shinalla cani nijca pai causashca* shinallatajmi causashpa* catina can.
7 Cꞌuyashca huauquicuna, shuj mushuj mandashcataca mana quillcanichu. Ashtahuanpish callarimanta cancuna charishca ñaupa mandashcatami quillcani. Chai ñaupa mandashca shimitami cancunaca uyarcanguichij. 8 Chashnapish cancunamanca shuj mushuj mandashcatami quillcani. Chai mandashcatami paica pajtachirca. Cancunapish chashnallatajmi pajtachircanguichij. Amsaca ñallami tucurigrin. Cutin alli luzca ñami achijyachicun.
9 Maijanpish luzpimi cani nishpapish paipaj huauquita pꞌiñashpaca amsapirajmi can. 10 Maijanpish paipaj huauquita cꞌuyajca luzpimi catin. Paipajca ima ñitcarina rumi mana tiyanchu. 11 Shinapish paipaj huauquita pꞌiñajca amsapimi can, amsapimi purin. Amsa paipaj ñahuicunata mana ricujta saquijpimi maiman ricushcatapish mana yachan.
12 Ñuca huahuacunalla, paipaj shutimanta cancunapaj juchacuna perdonashca cashcamantami cancunamanca quillcani. 13 Yayacuna, cancuna callarimanta tiyajta rijsishcamantami cancunamanca quillcani. Jovencuna, cancuna Diablota* mishashcamantami cancunamanca quillcani. Huahuacuna, cancuna ñucanchij Yaya Diosta rijsishcamantami cancunamanca quillcani. 14 Yayacuna, cancuna callarimanta tiyajta rijsishcamantami cancunamanca quillcani. Jovencuna, cancuna sinchi cashcamanta, Diospaj shimipi crishcamanta, Diablota* mishashcamantapishmi cancunamanca quillcani.
15 Cai pachatapish, cai pachapi imalla tiyashcacunatapish ama cꞌuyaichijchu. Maijanpish cai pachata cꞌuyajca Yaya Diostaca mana cꞌuyanchu. 16 Cai pachapi imalla tiyashcacunaca mana Yaya Diosmantachu shamun. Ashtahuanpish cai pachamantami shamun. Chaicunaca: aicha munaicuna, ñahui ricushca munaicuna, imalla charishcacunahuan jatun tucunami. 17 Cai pachapish, cai pachapi tiyashca munaicunapish tucuringami. Shinapish Diospaj munaita rurajca huiñai huiñaitami causanga.
18 Huahuacuna, ashalla tiempomi illan. Cancunaca anticristo shamuna cashcatami uyarcanguichij. Cunanllatajmi achca anticristocuna ricurishca. Chaimantami ashalla tiempo illashcata yachanchij. 19 Paicunaca ñucanchijpuramantami llujshircacuna. Shinapish mana ñucanchijpuramantachu carcacuna. Ñucanchijpuramanta cashca cashpaca ñucanchijhuanmi saquirinman carcacuna. Shinapish mana tucuicuna ñucanchijpura cashcata ricuchunmi paicunaca llujshircacuna. 20 Diosca cancunataca paipaj poderhuanmi agllarca. Tucui cancunami mana llullataca yachanguichij. 21 Cancunamanca mana llullata mana yachashcamantaca mana quillcanichu. Ashtahuanpish chaita yachashcamantami quillcani. Ima llullapish mana llullamantaca mana shamunchu.
22 ¿Pitaj llullaj runaca? Maijanpish Jesusca mana Cristochu can nij runami llulla can. Chaimi anticristo.* Paimi Yaya Diostapish, Churitapish mana rijsinichu nin. 23 Churita mana rijsinichu nijca Yaya Dioshuanca mana shuj shinalla canchu. Ashtahuanpish Churita rijsijca Yaya Dioshuanpish shuj shinallami can. 24 Cancunaca callarimanta imata uyashcata rurashpa catichij. Callarimanta uyashcata rurashpa catishpaca cancunapish Churihuanmi shuj shinalla canguichij. Yaya Dioshuanpish shuj shinallami canguichij. 25 Ashtahuanpish paillatajmi ñucanchijmanca: huiñai causaita cusha nirca.
26 Caicunataca cancunata pandachisha nijcunamantami quillcani. 27 Diosca cancunataca paipaj poderhuanmi agllarca. Chai podermi cancunapi can. Chaimantami pi cancunaman yachachichunca mana minishtinguichij. Shinapish paipaj poderca ciertomi can, mana llullachu. Chai podermi tucuita cancunaman yachachicun. Cancunaman yachachishca shinallataj paihuan shuj shinalla catichij. 28 Cunanca ñuca huahuacunalla, paihuan shuj shinalla catichij. Chashnami pai ricurijpica mana manchashpa parlai tucushun. Shinallataj pai tigramuna punllacunapipish* pingarishpa mana paimanta caruyashunchu. 29 Cancunaca pai cashcata ruraj cashcataca yachanguichijmi. Chaimi maijanpish cashcata rurashpa catijca Diosmanta huacharishca cashcata yachanguichij.