2 Pedro
1 Ñucaca Jesucristopaj apóstol, paita sirvij Simón Pedromi cani. Cancunapish ñucanchij chasquishca shinallatajmi valishca mana llulla yachaicunata chasquishcanguichij. Ñucanchij Diospish, ñucanchijta Quishpichij Jesucristopish cashcata rurajcuna cashcamantami cai yachaicunataca ñucanchijman cushca. Cancunamanmi cai cartataca quillcani:
2 Diosmantapish, ñucanchij Amito Jesucristomantapish alli yachaita charishcamanta Diosca yallitaj llaquij cashcata cancunamanca ashtahuan ricuchichun, sumaj causaitapish ashtahuan cuchun. 3 Diosca paipaj jatun podermantami ñucanchijmanca causashpa catichun, tucui shunguhuan paita adorashpa causachun tucui ima minishtishcata gratis cushca. Chaicunataca Diosta alli rijsishcamantami chasquishcanchij. Paica jatun Dios cashcamanta, alli Dios cashcamantami ñucanchijta cayashca. 4 Chaicunamantami Diosca ñucanchijmanca valishca, jatun sumaj allicunata cusha nishca.* Chai cusha nishcacunamantami cancunapish cai millai mundopaj mana alli munaicunamanta quishpirishpa Dios shina espiritucuna tucunguichij.
5 Chaimanta achcata esforzarichij. Cancuna crishcapica alli canata mirachichij. Alli canapica yachaita mirachichij. 6 Yachaipica jarcarinata mirachichij. Jarcarinapica ahuantanata mirachichij. Ahuantanapica tucui shunguhuan Diosta adoranata mirachichij. 7 Tucui shunguhuan Diosta adoranapica familia ucupi shina cꞌuyaita ricuchinata mirachichij. Familia ucupi shina cꞌuyaita ricuchinapica cꞌuyaita mirachichij. 8 Tucui chaicuna cancunapi tiyajpi, cancunapi ashtahuan mirarijpica ñucanchij Amito Jesucristomanta alli yachaipica imata mana rurashpa, granota mana pꞌucuj shinaca mana canguichijchu.
9 Maijanpish caicunata mana charijca ciegomi* can. Luzta ama ricungapaj ñahuicunata huichcashca* cashcamantami chashna tucun. Shinallataj ñaupaman pai rurashca juchacunamanta chuyayachishca cashcatapishmi cungarishca. 10 Chaimanta huauquicuna Dios cayashcacunapurapi cangapaj, pai agllashcacunapurapi cangapaj ashtahuan esforzarishpa catichij. Caicunata ruranata mana saquishpaca crishcataca manataj saquinguichijchu. 11 Chashnami ñucanchijta Quishpichij Amito Jesucristopaj mana tucurij Gobiernopi yaicuna jatun bendicionta chasquinguichij.
12 Chaimantami cancuna ña yachajpipish, cancunapi caj mana llullapi sinchiyarishca cajpipish caicunamantaca siempre yuyachisha nini. 13 Cai carpa huasipi* cashparaj cancunata yuyachishpa rijchachina alli cashcatami yuyani. 14 Ñucanchij Amito Jesucristo yachaj chayachishca shinaca ñuca carpa huasita ñalla saquina cashcatami yachani. 15 Ñuca rishca huasha cancunallataj caicunamanta yuyarichunmi tucui ima pudishcata siempre ruracuni.
16 Ñucanchij Amito Jesucristopaj podermanta, pai tigramuna punllacunamanta* huillashpaca mana gentecunapaj yanga parlocunata catishpachu huillarcanchij. Ashtahuanpish ñucanchijllatajmi pai achijnicuj cashcataca ricurcanchij. 17 Paica Yaya Diosmantami alli nishca canatapish, jatunyachishca canatapish chasquirca. Chaicunataca Jatun Dios cai shimicunata nijpimi chasquirca. Diosca: “Caimi ñuca cꞌuyashca Churi. Paipimi ñucaca achcata cushicuni” nircami. 18 Ñucanchijmi jucha illaj urcupi paihuan cashpa jahua pachamanta cai shimicunata nishcata uyarcanchij.
19 Chaimantami Dios huillashca profeciacuna pajtarina cashcata tucui shunguhuan crinchij. Chai profeciacunaca cancunapaj shungupica (pacaringacama, lucero* ricuringacama) amsapi shuj lámpara achijyachicuj shinami can. Chai profeciacunataca alli ricuraichij. 20 Tucuimanta yallica, Dios quillcachishcamanta shuj profeciallapish runacunapaj yuyaimanta mana shamushcataca yachanguichijmi. 21 Shuj profeciataca runacunapaj munaimantaca nunca mana pi huillashcachu. Ashtahuanpish espíritu santo yuyachijpimi runacunaca Dios huillashcata huillarcacuna.