2 Pedro
2 Shinapish ima shinami israelitacunapurapica llulla profetacuna tiyarca. Chashnallatajmi cancunapurapipish llulla yachachijcuna tiyanga. Paicunaca cancunapaj crishcata chingachingapajmi pacalla panda yachachishcacunata yachachingacuna. Paicunata randij dueñotapishmi mana chasquingacuna. Chashna rurashcamantami utca tucuchishca cangacuna. 2 Paicuna shinallatajmi achcacunaca millai ruraicunata mana pingashpa rurangacuna.* Paicunapaj culpamantami mana llulla ñanmantaca llaquichij shimicunahuan rimangacuna. 3 Shinallataj achcata charina munaimantami llulla shimicunata nishpa cancunata umangacuna. Shinapish Diosca ñaupamantami paicunata juzganata yuyarirca. Chai juicioca mana uniyacunchu. Ashtahuanpish paicunaca tucuchishcatajmi cangacuna.
4 Juchata ruraj angelcunataca Diosca mana perdonarcachu. Ashtahuanpish Tartaropimi* shitarca. Paicunataca juzgashca cangacamami yallitaj amsa jutcupi cadenacunahuan huatashpa shitarca. 5 Ñaupa punlla gentecunatapish Diosca mana perdonarcachu. Ashtahuanpish millai gentecunata tucuchingapaj yacu juilluta apamushpami cashcata ruranamanta huillaj Noetaca, caishuj canchis gentecunandij quishpichirca. 6 Shinallataj Sodoma, Gomorra llajtacunataca ushpayangacama tucui rupachishpami castigarca. Chashna rurashpami millai gentecunahuan ima tucunata ricuchirca. 7 Cashcata ruraj Lot runatapishmi quishpichirca. Paica mana alli gentecuna millai ruraicunata mana pingashpa rurajta* ricushpami yallitaj sustarishca carca. 8 Cai cashcata ruraj runaca chai mana alli gentecunapurapi causashpaca paicuna ima shina causajtami ricurca. Imata nishcatapishmi uyarca. Chaimantami cada punlla yallitaj llaquilla sintirirca. 9 Shinaca Jehová* Diosca tucui shunguhuan paita adoraj gentecunata llaquicunamanta ima shina quishpichinatami yachan. Cutin cashcata mana ruraj gentecunataca juicio punllapi tucuchingapajmi huaquichin. 10 Ashtahuantajca aicha munaicunahuan shujtajcunata mapayachijcunata, autoridadcunata pꞌiñajcunatami juicio punllapaj huaquichin.
Paicunaca pingai illaj, rumi shungu cashcamantami Dios alli nishcacunata llaquichij shimicunahuan rimanataca mana manchancuna. 11 Cutin angelcunaca paicunata yalli fuerzata, poderta charishpapish Jehová* Diosta respetashcamantami llaquichij shimicunahuan mana juchachincuna. 12 Chai runacunaca yuyai illaj animalcuna shina imatapish rurajcunami. Shinallataj japishpa tucuchishca cangapajmi huacharincuna. Paicunaca mana yachashcacunatami llaquichij shimicunahuan rimancuna. Chashna mana allicunata rurashcamantami Diosca tucuchinga. 13 Millai ruraicunata rurashcamantami castigashca cangacuna.
Punlla cajpipish paicunapaj aicha munaicunata rurashpa cushicunatami yuyancuna. Paicunaca mapayashca churana shinami can. Imapi mana allicunami can. Cancunahuan tandalla micucushpapish paicunapaj llulla yachachishcacunahuanmi pandachishpa cushicuncuna. 14 Paicunapaj ñahuicunapish huainayana munaihuan jundami can. Juchata ruranataca manataj saqui tucuncunachu. Shinallataj crishcapi mana sinchi cajcunatami inquitancuna. Paicunapaj shungupipish ashtahuan charina munaitami charincuna. Maldicishca huahuacunami can. 15 Alli ñanta saquishpami caruyashcacuna. Beorpaj churi Balaampaj ñantami catishcacuna. Paica pagota chasquinata yallitaj munashpami mana allita rurarca. 16 Shinapish allita mana rurashcamantami paita sinchita rimashcata uyarca. Mana rimaj burromi* gente parlashca shina parlashpa chai profeta yuyai illaj shina ruracushcata jarcarca.
17 Paicunaca chaquishca pugyucuna shinami. Sinchi huaira caiman chaiman apashca pꞌuyucuna shinami. Paicunapajca yallitaj amsa ucutami Diosca chꞌicanyachishca. 18 Paicunaca imata nishpapish valishca cashcata shinami parlancuna. Shinapish paicuna nishcacunaca yangallami. Millai ruraicunataca mana pingashpami rurancuna.* Gentecunatapish cutinllataj aicha munaicunata charichunmi inquitancuna. Mana allicunata ruranata cunanlla saquijcunatami cutin chaita rurachun chashna inquitancuna. 19 Chai millai runacunaca paicuna nishcata rurashpaca huatashcamanta cacharichishca shinami canguichij nincunami. Shinapish paicunallatajmi juchapi huatashca shina causancuna. Maijanpish paita mishachun saquijca paita mishajta sirvijmi tucun. 20 Paicunaca ñucanchijta quishpichij Amito Jesucristomanta alli yachashpami cai pachapaj mapa ruraicunamanta caruyarcacuna. Shinapish cutinllataj chai mapa ruraicunaman tigrajpica chai ruraicunami paicunataca mandan. Cunanca paicunaca callaripi ima shina cashcatapish yalli peormi tucuncuna. 21 Paicunaca cashcata rurana ñanmanta alli yachashca qꞌuipami paicuna chasquishca Dios mandashcamanta caruyashcacuna. Chaita ruranapaj randica chaicunata mana yachanami paicunapajca ashtahuan alli canman carca. 22 Paicunaca: “Allcuca pai shungu tigrashcallatatajmi* cutin tigrashpa micun. Armachishca cuchipish cutinmi lodopi singurin” nishca shimicuna cierto cashcatami ricuchincuna.