Romanos
9 Ñucaca Cristota catij cashcamantami mana llullani. Espíritu santo ñucata yuyachijpimi ñuca concienciaca cashna nishpa huillan: 2 ñuca shungupica achca llaquihuan, achca nanaihuanmi cani. 3 Cristota mana catij ñuca llajta huauquicunata ayudana cajpica paicunapaj randimi llaquichishca canata munaiman. 4 Paicunaca israelitacunami. Paicunatami Diosca paipaj huahuacuna cachun agllarca. Shinallataj paicunatami Diosca jatunyachishca. Paicunahuanmi ari ninacurca. Paicunallami Diostaca adorai tucurcacuna. Paicunamanmi Leytapish curca. Paicunamanmi imata cusha nishcatapish huillarca. 5 Paicunaca ñucanchij ñaupa yayacunapaj huahua huahuacunami. Paicunamantami Cristopish runa shina huacharirca. Tucuita mandaj Diosca huiñaipaj alabashca cachun. Chashna cachun.*
6 Shinaca ¿Dios nishca shimicunaca mana pajtarishcachu ni tucunchijchu? Mana. Ashtahuanpish Israelpaj huahuacunaca mana tucuicunachu israelitacuna can. 7 Paicunaca Abrahanpaj huahua huahuacuna cashpapish mana tucuicunachu Abrahanpaj huahuacuna can. Diosca Abrahanmanca: “Cambaj huahua huahuacuna* nishcaca Isaacmantami shamunga” nircami. 8 Shinaca mana Abrahanpaj tucui huahuacunachu Diospaj huahuacunataj can. Ashtahuanpish Dios cusha nishcamanta huacharishcacunami Abrahanpaj huahuacunataj can. 9 Diosca Abrahanmanca caitami cusha nirca: “Shamuj huataca cai punllacuna shinallatajmi shamusha. Chaipajca Saraca shuj cꞌari huahuatami charinga” nircami. 10 Ñucanchij ñaupa yaya Isaacpajta Rebeca gemelocunata chichujpipish chashnallatajmi tucurca. 11 Paicuna manaraj huacharijpi ima allitapish, ima mana allitapish manaraj rurajpimi Diosca maijanta agllanata ña huillarca. Diosca runacuna imata rurashcallamantaca mana agllanchu. Ashtahuanpish pai munashcatami agllan. 12 Diosmi Rebecamanca: “Punta churimi qꞌuipa churitaca sirvinga” nirca. 13 Quillcachishcapica: “Jacobtaca cꞌuyarcanimi, ashtahuanpish Esautaca pꞌiñarcanimi” ninmi.
14 Shinaca ¿imatataj nishunyari? ¿Diosca cashcata mana rurajmi can nishunchu? ¡Mana chashnachu! 15 Diosca Moisesmanca: “Maijantami agllani paimanmi cꞌuyaita ricuchisha. Shinallataj ñuca munashcamanmi llaquij cashcatapish ricuchisha” nircami. 16 Shina cajpica mana shuj runa munashcamanta o paipaj esfuerzomantachu Diosca agllan. Ashtahuanpish Diosca pai llaquij cashcamantami agllan. 17 Quillcachishcapi nishca shinaca Diosmi faraontaca: “Ñuca poderta ricuchingapaj, tucui muyundij allpapi ñuca shutita rijsichingapajmi cantaca causashpa catichun saquishcani” nirca. 18 Diosca pai munashcallamanmi llaquij cashcataca ricuchin. Shinapish shujtajcunataca rumi shungu tucuchun saquinllami.
19 Shinapish ñuca parlashcata uyashpaca: “¿Diosca ima nishpataj ñucanchij pandarishcacunallata ricunyari? ¿Paipaj munaitaca pipish jarcai tucunchu?” nishpachari tapungui. 20 Shinapish ¿yanga runa Diosta rimangapajca canca pitaj canguiyari? Allpa puñuca paita rurajtaca “¿Ima nishpataj ñucataca chashna rurarcanguiyari ni tucunchu?”. 21 ¿Manachu allpamanta imatapish rurajca chai allpa masallamantataj shuj puñutaca allipaj, caishuj puñutaca yangapajlla ruran? 22 Diospish chashnallatajmi ruran. Paica millai gentecunamanmi paipaj poderta, pai pꞌiñarishcatapish ricuchisha nin. Chashnapish tucuchishca cana gentecunahuan* pꞌiñarishca cashpapish paica achca pacienciatami ricuchin. 23 Diosca pai llaquishca gentecunaman* jatun cashcata ricuchingapajmi chashnaca rurarca. Paicunami paicunaman cungapaj allichishcataca japingacuna. 24 Chai cayashcacunaca ñucanchijmi canchij. Mana judiocunapurallamantachu cayarca. Ashtahuanpish shujtaj llajta gentecunatapishmi cayarca. 25 Oseas libropi huillachishca shinaca Diosca: “Ñuca pueblo mana cajpipish ‘ñuca pueblomi’ cangui nishami. Mana cꞌuyashca huarmitapish ‘ñuca cꞌuyashca huarmimi’ cangui nishami. 26 Maipimi paicunataca ‘Mana ñuca pueblochu canguichij’ nircani, chaillapitajmi paicunataca ‘causaj Diospaj huahuacunami canguichij’ nisha” nircami.
27 Shinallataj Isaiaspish Israelmantaca cashnami nin: “Israelpaj huahuacunaca mama cucha arena shina achcacuna cashpapish ashacunallami quishpiringacuna. 28 Jehová* Diosmi cai pachapi causajcunata juzganga. Paipaj juiciotaca ratomi tucuchinga” ninmi. 29 Isaiasca caitapishmi nirca: “Jahua pacha soldadocunata mandaj Jehová* Dios, ñucanchij huahua huahuacuna causachun mana saquishca cajpica ñucanchijca Sodoma llajta shina, Gomorra llajta shinami tucuiman carcanchij” nirca.
30 Shinaca ¿imatataj nishunyari? Shujtaj llajta gentecuna cashcata ruranata mana mashcacujpipish, feta charishcata ricuchishcamantami Diosca cashcata rurajcunata shina ricun. 31 Israelitacunaca leypi nishcata cazushpa, cashcata ruranata mashcacushpapish chai leytaca mana pajtachi tucurcacunachu. 32 ¿Imamantataj mana pajtachi tucurcacuna? Paicunapaj rurashcacunallahuan cashcata rurajcuna tucunatami yuyarcacuna. Ashtahuanpish feta charishcamanta cashcata rurajcuna canataca mana yuyarcacunachu. Chaimantami paicunaca “ñitcachij rumihuan ñitcarircacuna”. 33 Quillcachishcapica: “¡Ricuichij! Sionpica gentecunata ñitcachij rumita, urmachij jatun rumitami churani. Maijanpish chai rumipi feta churajca mana pingaipi saquiringachu” nircami.