1 Reyes
13 Jeroboán sacrificiota rupachishpa cushnichingapaj altar cꞌuchupi shayacujpimi Diosta sirvij shuj runaca Jehová Dios mandajpi Judamanta Betelman shamurca. 2 Chai qꞌuipami Jehová Dios mandajpi altarpaj contra caparirca. Paica: “¡Altarlla, altarlla! Jehová Diosca: ‘¡Ricui! ¡Davidpaj huahua huahuacunamantaca Josías shuti shuj huahuami huacharinga! Paica cambaj jahuapimi adorana lugarcunapi* sirvij sacerdotecunata huañuchinga. Cambaj jahuapica gentecunapaj tullucunatami rupachinga’ ninmi” nircami. 3 Chai punllaca shuj señalta ricuchishpami paica: “Jehová Diosca cai señaltami huillashca: altarca chaupiringami, chai jahuapi tiyaj ushpapish* tsiraparingami”* nirca.
4 Diosta sirvij runa Betelpi tiyaj altarpaj contra caparijta uyashpami rey Jeroboanca altarmanta maquita anchuchirca. Chaimantaca chai runata maquihuan ricuchishpami: “¡Japichij!” nirca. Chai ratomi chutashca maquica chaquirishpa mana cuyuri tucurca. 5 Chai huashaca Jehová Dios mandajpi Diosta sirvij runa señalta cushca shinami altarca chaupirirca. Chai jahuapi tiyaj ushpapishmi* tsiraparirca.
6 Reyca Diosta sirvij runataca: “Cambaj Jehová Diosta rogaripai. Ñuca maqui alliyachun ñucamanta mañapai” nircami. Chaimi Diosta sirvij runaca Jehová Diosta rogarirca. Chaimantami reypaj maquica alliyashpa, ñaupa cashca shinallataj saquirirca. 7 Chai qꞌuipami reyca Diosta sirvij runataca: “Imallatapish micungui, jacu ñuca huasiman. Canmanca shuj regalotami cusha” nirca. 8 Pero Diosta sirvij runaca reytaca cashnami nirca: “Cambaj huasimanta chaupita cuna cajpipish canhuanca manataj rishachu. Cai lugarpica tandatapish manataj micushachu, yacutapish manataj ubyashachu. 9 Jehová Diosca: ‘Tandatapish ama micungui, yacutapish ama ubyangui, can maita shamushca ñantapish ama tigrangui’ nishpami mandarca” nircami. 10 Chaimi chai runaca Betelman shamushca ñanllatatajca mana tigrarca, shujtaj ñantami tigrashpa rirca.
11 Betelpica shuj yuyajlla profetami causacurca. Paipaj churicunaca pai maipi cashcaman rishpami Diosta sirvij runa chai punlla Betelpi imata rurashcata, reyman imata nishcatapish tucuita parlarcacuna. Chashna parlajpimi 12 paipaj yayaca: “¿Mai ñantataj rircari?” nishpa tapurca. Chashna tapujpimi paipaj churicunaca Judamanta shamuj, Diosta sirvij runa mai ñanta rishcata ricuchircacuna. 13 Chaimi paipaj churicunataca: “Burrota parejaichij” nirca. Paipaj churicuna burrota parejajpimi paica burropi tiyarirca.
14 Chai profetaca Diosta sirvij runatami catishpa rirca. Paitaca shuj jatun yura ucupi tiyacujtami japirca. Chai qꞌuipami paitaca: “¿Judamanta shamuj, Diosta sirvij runaca canchu cangui?” nishpa tapurca. Chashna tapujpimi chai runaca: “Ari, ñucami cani” nirca. 15 Yuyajlla profetaca: “Ñuca huasiman shamui, tandata micungui” nircami. 16 Pero chai runaca cashnami nirca: “Canhuanca mana tigrai tucunichu. Can invitashcatapish mana chasqui tucunichu. Cai lugarpica canhuanca tandatapish mana micui tucunichu, yacutapish mana ubyai tucunichu. 17 Jehová Diosca: ‘Tandatapish ama micungui, yacutapish ama ubyangui. Can maita shamushca ñantapish ama tigrangui’ nishpami mandarca” nircami. 18 Chaimi yuyajlla runaca: “Ñucapish can shinallataj profetami cani. Jehová Dios mandajpimi shuj ángel ñucamanca: ‘Tandata micuchun, yacuta ubyachun cambaj huasiman pushai’ nirca” nircami. (Paica umarcami). 19 Shina nijpimi paipaj huasipi tandata micungapaj, yacuta ubyangapaj paihuan tigrashpa rirca.
20 Paicuna ña mesapi tiyacujpimi tigrachimuj profetaca Jehová Diosmanta shuj huillaita chasquirca. 21 Chaimantami yuyajlla profetaca Judamanta shamuj, Diosta sirvij runata sinchita rimashpa cashna nirca: “Jehová Diosca caitami nin: ‘Canca Jehová Dios mandashcataca mana cazushcanguichu. Jehová Dios imata rurachun nishcatapish mana pajtachishcanguichu. 22 Canca “Tandatapish ama micungui, yacutapish ama ubyangui” nijpipish cai lugarpi tandata micungapaj, yacuta ubyangapajmi tigrashcangui. Chaimantami cambaj huañushca cuerpotaca cambaj ñaupa yayacunapaj pambana jutcupica mana pambangacuna’ ninmi” nircami.
23 Cutin tigrachimuj yuyajlla profetaca Diosta sirvij runa yacuta ubyashca qꞌuipa, tandata micushca qꞌuipami burrota parejashpa curca. 24 Chaimi chai runaca chaimanta rircalla. Pero ñanta ricujpimi shuj león ricurishpa paita huañuchirca. Paipaj huañushca cuerpoca ñanpimi siricurca, burropish chai ladopimi shayacurca. Chai huañushca cuerpo ladopica leonpishmi shayacurca. 25 Huaquin runacuna chaita pasacushpami huañushca cuerpo ñanpi siricujta, chai ladopi shuj leonpish shayacujta ricurcacuna. Paicunami yuyajlla profeta causan llajtaman yaicushpa imata ricushcata parlarcacuna.
26 Tigrachimuj profeta chaita yachaj chayashpaca chai ratomi: “Diosta sirvij runamari. Paica Jehová Dios mandashcatami mana cazurca. Chaimantami Jehová Dios nishca shinallataj shuj león paita llaquichishpa huañuchichun Jehová Diosca saquishca” nirca. 27 Chaimi paipaj churicunataca: “Burrota parejaichij” nirca. Shina nijpimi paipaj churicunaca burrota parejarcacuna. 28 Pai rishpaca huañushca cuerpo ñanpi siricujtami japirca. Burropish, leonpish chai huañushca cuerpopaj ladopimi shayacurca. Leonca huañushca cuerpotaca mana micushcachu carca, burrotapish mana llaquichishcachu carca. 29 Chai profetaca Diosta sirvij runapaj cuerpota alzashpami paimanta huacangapaj, paita pambangapaj burropi apachishpa paipaj propio llajtaman aparca. 30 Yuyajlla profetaca paita pambana jutcupimi huañushca cuerpotaca churarca. Paimantaca: “¡Ñuca huauquilla, llaquimari!” nishpami huacarcacuna. 31 Chai runata pambashca qꞌuipami paipaj churicunataca cashna nirca: “Ñuca huañujpica Diosta sirvij runata pambashca lugarllapitaj pambanguichij. Ñuca tullucunataca paipaj tullucunahuan igual churanguichij. 32 Paica Jehová Dios mandajpimi Betelpi tiyaj altarpaj contra, Samariapi saquirij llajtacunapi caj adorana lugarcunapi tiyaj templocunapaj contra huillarca. Pai huillashca shimicunaca pajtaringatajmi” nircami.
33 Chashna tucushca qꞌuipapish Jeroboanca mana allicunata ruranataca mana saquircachu. Paica adorana lugarcunapi sirvichunmi yanga runacunata sacerdote cachun nombrashpa catirca. Pai munashca runata sacerdote cachun churashpaca: “Adorana lugarcunapi sirvichunca paitapish sacerdote cachun nombraichij” nijmi carca. 34 Jeroboanpish, paipaj huahua huahuacunapish cai juchata rurashcamantami llaquichishca, cai allpamanta tucuchishca carcacuna.