Lucas
9 Jesusca paipaj 12 apostolcunata tandachishpami demoniocunata* llujshichichun, ungushcacunatapish alliyachichun poderta curca. 2 Chashnami paicunataca Diospaj Gobiernomanta huillachun, ungushcacunatapish alliyachichun cacharca. 3 Paicunata cachashpaca cashnami nirca: “Viajepajca ama imata apanguichij, tauna caspitapish, tandatapish, micunata apana bolsatapish,* cullquitapish,* mudaringapaj shujtaj churanatapish ama apanguichij. 4 Shinapish maijan huasiman yaicushpaca, chai llajtamanta rina horascama chaipi saquiringuichij. 5 Ashtahuanpish maipi cashpapish cancunata mana chasquishun nijpica, chai llajtamanta llujshishpaca, cancunapaj chaquicunamanta ñutu allpata chaspirishpa ringuichijlla. Chashnami paicunaca mana allita rurashcata yachangacuna” nircami. 6 Jesús chashna nijpimi paicunaca tucui uchilla pueblocunata rishpa alli huillaicunata huillashpa purircacuna. Shinallataj ungushcacunatapishmi alliyachircacuna.
7 Galilea llajtata mandaj* Herodesca* imalla tucucushcata yachaj chayashpami yallitaj sustarishca carca. Huaquincunaca Bautizaj Juanmi huañushcacunapaj chaupimanta causarishca nicurcacunami. 8 Shujtajcunaca Eliasmi nicurcacunami. Caishujcunaca ñaupa profetacunamanta shuj profetami causarishca nicurcacunami. 9 Chaimi Herodesca: “Ñuca mandajpimi Juantaca cungata pꞌitircacuna. Shinaca ¿cai runaca pitaj canyari? Tucuita ruracujtami paimantaca uyani” nirca. Chashna nirishpami Herodesca Jesusta ricuna yuyailla carca.
10 Apostolcuna tigramushpaca tucui imalla rurashcatami Jesusmanca parlarcacuna. Chai qꞌuipami Jesusca paicunalla cangapaj Betsaida nishca llajtaman paicunataca pusharca. 11 Paicuna chaiman rishcata achca gentecuna yachaj chayashpaca Jesusta catishpami rircacuna. Chaimi Jesusca cꞌuyaihuan chasquishpa Diospaj Gobiernomanta huillai callarirca. Ungüihuan cajcunatapishmi alliyachirca. 12 Ña chishiyamujpimi 12 apostolcuna Jesuspajman cꞌuchuyashpaca: “Shitashca ladopimi canchij. Cai gentecunataca micunatapish, maipi dorminatapish mashcagrichun uchilla pueblocunaman, cꞌuchulla campocunaman cachai” nircacuna. 13 Chashna nijpimi Jesusca: “Cancuna imallatapish caraichij” nirca. Chaimi paicunaca: “Ñucanchijca pichca tandata, ishqui pescadocunallatami charinchij, imata mana ashtahuan charinchijca. ¿Cai tucui gentecunaman carangapajca manachu ñucanchijllataj randinaman rina canga?” nircacuna. 14 Chaipica casi 5.000 cꞌaricunami carca. Chaimi Jesusca paita catijcunataca: “50 gentecunapura shinalla tiyarichun mandaichij” nirca. 15 Chashna nijpimi paicunaca Jesús mandashca shina tucuicunata tiyachircacuna. 16 Chai qꞌuipami Jesusca pichca tandata, ishqui pescadota japishpa jahua pachata ricushpa Diosta mañarca. Chai huashaca chaupishpami chaipi cajcunaman carachun paita catijcunaman curca. 17 Chashnami tucuicuna huijsa pajtata micushpa cushilla sintirircacuna. Chai qꞌuipaca Jesusta catijcunaca sobrashcacunataca 12 canastacunatami tandarcacuna.
18 Shuj punllaca Jesusca paillami Diosta mañacurca. Shina mañacujpimi paita catijcunaca paipajman cꞌuchuyarcacuna. Chaipimi Jesusca paicunataca: “¿Ñuca pi cashcatataj gentecunaca yuyancuna?” nishpa tapurca. 19 Shina tapujpimi paicunaca: “Huaquincunaca ‘Bautizaj Juanmi can’ nincunami. Caishujcunaca ‘Eliasmi can’ nincunami. Maijancunacarin ‘ñaupa profetacunamanta shuj profetami causarishca’ nincunami” nircacuna. 20 Shina nijpimi Jesusca: “Cutin cancunaca, ¿ñuca pi cashcatataj yuyanguichij?” nirca. Chaimi Pedroca: “Canca Dios cachashca Cristomari cangui” nirca. 21 Pedro chashna nijpimi Jesusca caitaca ñataj piman huillanguichijman nishpa mandarca. 22 Shinallataj Jesusca caitapishmi nirca: “Runapaj Churica achca llaquicunatami apanga. Autoridadcunapish,* sacerdotecunata mandajcunapish, mandashcacunata quillcajcunapishmi pꞌiñangacuna. Shinallataj runacunami huañuchinga, quimsa punllapimi paica causachishca canga” nircami.
23 Chai qꞌuipaca Jesusca tucuicunatami cashna nirca: “Maijanpish ñucata catisha nijca paipajllaca ña ama causachun. Ashtahuanpish punllanta paipaj quiquin llaquichina caspita* apashpa ñucata caticuchunlla. 24 Maijanpish quiquin causaita* quishpichisha nijca huañungami. Ashtahuanpish ñucamanta huañujca* causaringami. 25 Shuj runa cai pachapi tucui imalla tiyashcata charishpapish paillataj llaqui tucushpa mana cashpaca paipaj causaita chingachishpaca, ¿ima allitaj cangari? 26 Ñucamanta, ñuca yachachishcacunamantapish pingarijtaca Runapaj Churipish paipaj poderhuan, Yayapaj poderhuan, jucha illaj angelcunapaj poderhuan shamushpaca paimantapish pingaringami. 27 Shinallataj cancunamanca mana llullanichu. Caipi cajcunamanta maijancunaca Diospaj Gobierno ña mandacujta ricungacama manaraj huañungacunachu” nircami.
28 Chashna nishca qꞌuipaca pusaj punllacuna shinapimi Jesusca Pedrota, Juanta, Santiagotapish pushashpa Diosta mañangapaj urcuman huichiyarca. 29 Jesús Diosta mañacujpica paipaj ñahuica shujtaj layami tucurca. Paipaj churanapish yurajlla achijnicujmi tucurca. 30 Chaipica ñapishmi ishqui runacuna ricurishpa Jesushuan parlanacucurcacuna. Chai runacunaca Moisés, Eliasmi carcacuna. 31 Paicunaca achijnicuj ricurishpami Jesús cai pachamanta ima shina rinata, chaicuna Jerusalenpi pajtarinatapish parlanacui callarircacuna. 32 Pedropish, paihuan cajcunapish dorminaihuanmi huañucurcacuna. Ashtahuanpish alli rijcharishpaca Jesustaca achijnicujtami ricurcacuna. Jesuspaj ladopi ishqui runacuna shayacujtapishmi ricurcacuna. 33 Chai ishqui runacuna Jesusmanta caruyashpa ricujpimi Pedroca Jesustaca: “Yachachij, ¡caiman shamushcamantaca ñucanchijca cushillami canchij! Quimsa chugllacunata rurashun: shujtaca cambaj, caishujtaca Moisespaj, chaishujtaca Eliaspaj” nirca. Chashna nishpapish Pedroca imata nicushcatapish mana yacharcachu. 34 Pedro chashna nicujpirajmi pꞌuyu shamushpa paicunata taparca. Chai pꞌuyu tapajpimi paicunaca mancharircacuna. 35 Qꞌuipaca pꞌuyumanta rimashca uyarishpaca: “Caimi ñuca agllashca Churi. Paita uyaichij” nircami. 36 Chai rimashca uyaricujpirajmi Jesustaca pailla cashcata ricurcacuna. Paicuna imata ricushcataca chai punllacunapica piman mana huillashpami upalla saquirircacuna.
37 Cayandij punlla paicuna urcumanta uriyamujpica, achca gentecunami Jesustaca tupanaman shamurcacuna. 38 Chai gentecunapaj chaupimantami shuj runa caparishpaca: “¡Yachachij, ñuca churita ricushpalla mingui tucupai! Cai huahuallatamari charini. 39 ¡Ricui! Paitaca shuj millai espíritu japishpami ñapish caparichishpa, maipishcachun chujchuchishpa, shimimanpish puscuta shitachinlla. Achcata chugrichishpapish paimantaca manataj llujshisha ninchu. 40 Canta catijcunata chai millai espirituta llujshichichun rogajpipish paicunaca mana pudircacunachu” nircami. 41 Chashna nijpimi Jesusca: “¡Feta mana charij, millai gentecuna!* ¿Ima horacamataj cancunahuanca cashayari? ¿Ima horacamataj cancunataca ahuantashayari? Cambaj churita caiman pushamui” nirca. 42 Jesuspajman chai huambra cꞌuchuyacujpimi demonioca pambaman urmachishpa achcata chujchuchirca. Chaita ricushpami Jesusca chai millai espirituta sinchita rimashpaca, huambrata alliyachishpa paipaj yayaman curca. 43 Diospaj jatun poderta ricushpaca tucuicunami mancharircacuna.
Pai rurashcata ricushpa tucuicuna mancharicujpimi Jesusca paita catijcunataca cashna nirca: 44 “Cai shimicunata alli uyaichij, amataj cungaringuichijchu. Runapaj Churitaca paita pꞌiñajcunapaj maquipimi churangacuna” nircami. 45 Shinapish Jesús imata nicushcataca paicunaca mana intindircacunachu. Paicunapajca pacashca shinami carca. Chai shimicuna ima nisha nishcatapishmi tapunata mancharcacuna.
46 Chai qꞌuipami Jesusta catijcunaca paicunamanta maijan ashtahuan jatun cashcata paicunapura rimanacui callarircacuna. 47 Paicunapaj shungupi imata yuyacujta yachashpami Jesusca shuj huahuata cayashpa paipaj cꞌuchupi churashpaca 48 cashna nirca: “Maijanpish cai huahua shina cajta ñuca shutipi chasquijca ñucatapishmi chasquin. Cutin ñucata chasquijca ñucata cachajtapishmi chasquin. Cancunapurapi maijanpish tucuicunamanta humilde cajmi, tucuicunata yalli jatun canga” nircami.
49 Chashna nijta uyashpami Juanca: “Yachachij, shuj runa cambaj shutipi demoniocunata llujshichicujtami ricurcanchij. Shinapish ñucanchijhuan mana purij cashcamantami paitaca jarcashun nircanchij” nirca. 50 Shina nijpimi Jesusca: “Ama jarcaichijchu. Maijanpish cancunapaj contra mana cajca cancunapurami” nirca.
51 Jahua pachaman rina punlla ña cꞌuchuyamucujpimi, Jesusca Jerusalenman rinataj cashcata yuyarirca. 52 Chaimantami paita catijcunamanta maijancunataca ñaupachishpa cacharca. Paicunaca Jesús maipi samarinata allichingapajmi Samariapi saquirij shuj uchilla puebloman yaicurcacuna. 53 Ashtahuanpish Jesús Jerusalenman rinataj cashcata yachashpami chaipi causajcunaca paitaca mana chasquishun nircacuna. 54 Chashna rurajta ricushpami Jesusta catij Santiagopish, Juanpish: “Amito, ¿jahua pachamanta nina shamushpa paicunata tucuchichun mañachun ninguichu?” nircacuna. 55 Chashna nijpimi Jesusca tigrarishpa paicunataca sinchita rimarca. 56 Chaimantami Jesuspish, paita catijcunapish shujtaj uchilla puebloman rircacuna.
57 Paicuna ñanta ricujpica shuj runami Jesustaca: “Can maiman rijpipish canhuanmi ñucaca risha” nirca. 58 Chashna nijpimi Jesusca: “Zorrocunapish causangapaj jutcuta charinmi. Jahuata purij pajarocunapish paicunapaj tazinta charinmi. Shinapish Runapaj Churica maipi samarinallatapish mana charinchu” nirca. 59 Qꞌuipaca shujtaj runatami Jesusca: “Ñucata cati” nirca. Jesús chashna nijpimi chai runaca: “Amito, ñuca yayataraj puntapica pambanaman richun saquihuai” nirca. 60 Chaimi Jesusca: “Huañushcacuna paicunapaj huañushcacunata pambachun saquilla. Ashtahuanpish canca tucui ladocunata rishpa Diospaj Gobiernomanta huillagri” nirca. 61 Chai qꞌuipaca shujtaj runapishmi: “Amito, ñucaca cantami catisha nini. Shinapish ñuca huasipi cajcunataraj, minchacama nimugrisha” nirca. 62 Shina nijpimi Jesusca: “Maijanpish yapucushpa huashaman tigrarishpa ricujca Diospaj Gobiernopica manataj yaicui tucungachu” nirca.