Romanos
16 Ñucanchij pani Febeta chasquichunmi cancunataca rogapani. Paica Cencreas congregacionpimi sirvicun. 2 Paitaca jucha illajcunata chasquij shinallataj Amito Jesuspaj shutipi chasquipaichij. Paica ñucatapish, shujtaj huauqui panicunatapishmi ayudashca. Chaimanta pai imalla minishtishcacunata cushpa ayudapanguichij.
3 Priscatapish, Aquilatapish ñuca partemanta saludapanguichij. Paicunaca Cristo Jesusta ñucahuan sirvijcunami. 4 Ñuca causaita* quishpichingapajmi casi huañurcacuna. Chaimantami ñucapish, shujtaj llajta congregacioncunamanta huauqui panicunapish pagui ninchij. 5 Paicunapaj huasipi tandanacuj huauqui panicunatapish* saludapaichij. Ñuca cꞌuyashca huauqui Epenetotapish saludapaichij. Paimari Asia llajtapica Cristota punta catijcunapuramanta can. 6 Mariatapish saludapaichij. Paica cancunamantami sinchita trabajashca. 7 Ñuca familiacunamanta Andronicotapish, Juniastapish saludapaichij. Paicunami ñucahuanca prezupi carcacuna. Apostolcunapish paicunataca allimi rijsincuna. Paicunaca ñucapaj ñaupami Cristota catijcuna tucurcacuna.
8 Ampliatotapish saludapaichij. Paica Amito Jesusta catij, ñuca cꞌuyashca amigomi. 9 Ñucanchijhuan Cristota sirvij Urbanotapish, ñuca cꞌuyashca amigo Estaquistapish saludapaichij. 10 Cristo alli nishca Apelestapish saludapaichij. Aristobulopaj huasipi cajcunatapish saludapaichij. 11 Ñuca familia Herodiontapish saludapaichij. Narcisopaj huasipi Amito Jesusta catijcunatapish saludapaichij. 12 Trifenatapish, Trifosatapish saludapaichij. Cai huarmicunaca mana shaicushpami Amito Jesuspaj trabajacuncuna. Ñucanchij cꞌuyashca pani Persidatapish saludapaichij. Paipish mana shaicushpami Amito Jesuspaj trabajashca. 13 Amito Jesús agllashca Rufotapish, paipaj mamatapish saludapaichij. Paipaj mamaca ñucapajpish mama shinami. 14 Asincritotapish, Flegontetapish, Hermestapish, Patrobastapish, Hermastapish, paicunahuan caj huauquicunatapish saludapaichij. 15 Filologotapish, Juliatapish, Nereotapish, Nereopaj panitapish, Olimpastapish, paicunahuan caj tucui huauquicunatapish* saludapaichij. 16 Caishuj chaishuj chuya shunguhuan muchashpa saludanacuichij. Cristopaj tucui congregacioncunami cancunataca saludancuna.
17 Cunanca huauquicuna, caitami rogapani. Chꞌicanyachij runacunata, shujtajcunata pandachij runacunatapish ricuraichij. Paicunaca cancuna yachashcacunamanta caruyashpami llullacunata yachachicuncuna. Chaimanta paicunamantaca caruyaichij. 18 Cai laya runacunaca ñucanchij Amito Cristota sirvinapaj randica paicunapaj munaillatami rurancuna. Paicunaca mishqui shimicunahuan, uyanalla shimicunahuanmi manaraj alli yachajcunapaj shunguta pandachincuna. 19 Cancuna Diosta cazujcuna cashcataca tucuicunami yachancuna. Chaimantami cancunamanta ñucaca cushicuni. Shinapish allita rurangapajca alli yachajcuna cachun, millaita rurangapajca imata mana yachajcuna shina cachunmi munani. 20 Sumaj causaita cuj Diosca ñallami Satanastaca cancunapaj chaqui ucupi churashpa sarunga. Ñucanchij Amito Jesusca yallitaj llaquij cashcata cancunaman ricuchichun.
21 Ñucahuan sirvij Timoteopishmi cancunaman saludocunata cachan. Shinallataj ñuca familiapura Luciopish, Jasonpish, Sosipatropishmi cancunamanca saludocunata cachan.
22 Ñucaca Pablo imata nishcata cai cartapi quillcaj Terciomi cani. Amito Jesuspaj shutipimi cancunataca saludani.
23 Ñucatapish, congregacionmanta tucui huauqui panicunatapish chasquij Gayopishmi cancunamanca saludocunata cachan. Cai llajtapaj mayordomo* Erastopish, paipaj huauqui Cuartopishmi saludocunata cachan. 24 *——
25 Alli huillaicunata ñuca huillashcamanta, Jesucristomantapish huillashcamantami Diosca cancunataca sinchiyachi tucun. Cai huillaicunatami Diosca gentecunaman ricuchishca. Diosca pi mana yachai tucushca huillaicunatami achca tiempota pacalla charicushca. 26 Shinapish cunanca pi mana yachashcatami ñucanchijman ricuchishca. Profetacuna quillcashcacunahuanmi ñucanchijman yachachishca. Paita crishpa cazuchunmi huiñaipaj causaj Diosca shujtaj llajta gentecunamanpish chaita huillachun mandashca. 27 Jesucristo imata rurashcamantaca Diostami jatunyachina canchij. Diosllami huiñaipaj alli yachaj can. Chashna cachun.*