1 Pedro
5 Ñucapish ancianomi cani. Cristo llaquicunata apashcataca ricurcanimi. Agllashcacuna jatunyachishca cajpica ñucapishmi paicunahuan jatunyachishca casha. Cancunapurapi tiyaj ancianocunataca caitami rogapani:* 2 cancunaman mingashca Diospaj ovejacunata michichij. Alli cuidajcuna shina sirvichij. Ama rurana cashcallamanta ruraichijchu. Ashtahuanpish Diospaj ñaupajpica tucui shunguhuan ruraichij. Mana allita rurashpa imata japina munaillahuanca ama ruraichijchu. Ashtahuanpish empeñohuan ruraichij. 3 Shinallataj Diospaj herencia cajcunataca ama amocuna shina mandaichijchu. Ashtahuanpish paicunapajca* ejemplo tucuichij. 4 Jatun michij ricurijpica cancunaca mana chingarij sumaj coronatami chasquinguichij.
5 Chashnallataj ashtahuan joven cꞌaricunaca ñaupa huiñai cꞌaricunata* cazuchun. Tucuicunallataj caishuj chaishuj humilde cashcata ricuchinacuichij. Diosca jatun tucushcacunahuanca mana cushicunchu. Ashtahuanpish humilde gentecunamanmi pai yallitaj llaquij cashcata ricuchin.
6 Chaimanta pai agllashca tiempopi cancunata jatunyachichunca poderta charij Diospaj maquipi humillarichij. 7 Cancunapaj tucui preocupacioncunataca paiman mingaichij. Paica cancunamanta sustarinmi. 8 ¡Alli yuyaiyuj caichij, chaparacuichij! Cancunata pꞌiñaj Diabloca shuj león huacaricuj shinami maijantapish millpusha nishpa cancunapaj muyundijta puricun. 9 Shinapish muyundij allpapi tucui huauquicuna chai llaquicunallatataj apacushcata yachashcamanta crishcapi sinchiyarishpa Diablopaj contra tucuichij. 10 Diosca tucui layami yallitaj llaquij cashcataca ricuchin. Paica Cristohuan shuj shinalla cachun, huiñaipaj jatunyachishca cachunmi cancunataca cayashca. Asha tiempota cancuna llaquicunata apashca qꞌuipami paillataj cancunataca tucuipi alli cajta ruranga. Paimi cancunataca sinchiyachinga. Paimi cancunataca ayudanga. Sinchi cimiento jahuapimi cancunataca churanga. 11 Diosca huiñaipaj poderyujmi. Chashna cachun.*
12 Diosta tucui shunguhuan sirvij huauqui Silvanomi* cancunaman cai cartata quillcangapaj ayudarca. Cancunata animangapaj, Dios yallitaj llaquij cashcata cancunaman ricuchishcata yachaj chayachingapajmi ishqui quimsa palabracunata quillcani. Dios yallitaj llaquij cashcata chasquishca qꞌuipaca chaipi catiraichij. 13 Babiloniapi caj panimi cancunamanca saludocunata cachan. Paipish cancuna shinallataj Dios agllashcami can. Ñuca churi Marcospishmi saludocunata cachan. 14 Caishuj chaishuj cꞌuyaihuan muchashpa saludanacuichij.
Cristohuan shuj shinalla cashcamanta tucui cancunaca sumaj causaita charichij.