Josué
5 Jordán jatun yacu inti huashicun ladopi* saquirij tucui amorreo reycunapish, mama cucha cꞌuchupi caj Canaán llajtamanta tucui reycunapish Jehová Dios israelitacuna Jordán jatun yacuta pasachun, paicunapaj ñaupajpi ima shina chaquichishcatami uyarcacuna. Chaita uyashpami paicunaca mancharircacuna.* Shinallataj israelitacunahuan macanacungapajpish manchaitami charircacuna.
2 Chai tiempopimi Jehová Diosca Josuemanca: “Pedernal rumimanta cuchillocunata rurashpa israelita runacunata cutin circuncisionta rurai” nirca. 3 Chashnami Josueca pedernal rumimanta cuchillocunata rurashpa israelita runacunataca Guibeat-Haaralot* lugarpi circuncisionta rurarca. 4 Egipto llajtamanta llujshishca tucui runacunaca chaquishca pambapimi huañushcacuna carca. Egiptomanta llujshishca qꞌuipami paicunaca huañurcacuna. (Chai runacunaca macanacuiman rij runacunami* carca). Tucui paicuna huañushcamantami Josueca israelitacunata circuncisionta rurarca. 5 Egipto llajtamanta llujshishca runacunaca tucuicunami circuncisionta rurachishcacuna carca. Shinapish chaquishca pambapi huacharishca runacunaca ni maijan circuncisiontaca mana rurachishcachu carca. 6 Israelitacunaca 40 huatacunatami macanacuiman rij tucui runacuna chingaringacama chaquishca pambata purircacuna. Chai chingarishca runacunaca Egipto llajtamantami llujshishca carca. Paicunaca Jehová Dios nishcacunatami mana cazushcacuna carca. Jehová Diosca paicunamanca achca leche, achca miel tiyan allpataca mana nunca ricunguichijchu nishpami jurarca. Jehová Diosca chai allpatami ñucanchijman cuna cashcata ñucanchij ñaupa yayacunaman jurashca carca. 7 Chaimantami paicunapaj churicunata paicunapaj randi cai allpaman pushamurca. Paicunatami Josueca circuncisionta rurarca. Paicunami ñanpi circuncisionta mana rurachishcacuna carca.
8 Tucui israelitacunata circuncisionta rurachishca huashami tucui chaipi cajcunaca chai runacuna alliyangacama paicunapaj carpa huasicunapi saquirircacuna.
9 Jehová Diosca Josuemanca: “Cunanmi egipciocuna cancunata pingaipi churashcataca anchuchishcani”* nircami. Chaimantami cunancama chai lugartaca Guilgal* nishpa shutichincuna.
10 Israelitacunaca Guilgal llajtapimi paicunapaj carpa huasicunapi causashpa catircacuna. Punta quillapaj 14 punllapimi Jericó chaquishca pambapi, chishi ladopi Pascua fiestata rurarcacuna. 11 Pascua fiestata rurashca qꞌuipa chai punllallapitajmi israelitacunaca allpapi pꞌucushcacunata micui callarircacuna. Paicunaca levadura illaj tandata, camchashca granocunatami micurcacuna. 12 Allpapi pꞌucushcacunata micushca punllamantami maná shuti micunaca ña mana tiyarca. Israelitacunapajca maná shuti micuna ña mana ashtahuan tiyashcamantami chai huatamanta Canaán allpacunapi pꞌucushcacunata paicunaca micui callarircacuna.
13 Josueca Jericó cꞌuchulla llajtapi cashpami paipaj ñaupajpi shuj runa shayacujta ricurca. Chai runaca paipaj espadata huaquichinamanta llujshichishpami charicurca. Chaimi Josueca paipajman cꞌuchuyashpaca: “¿Canca ñucanchij partechu cangui? Mana cashpaca ¿ñucanchij contrachu cangui?” nishpa tapurca. 14 Chashna tapujpimi chai runaca: “Mana, ñucaca Jehová Diospaj jahua pacha soldadocunata pushajmi cani” nirca. Chaita uyashpami Josueca pambacama cumurishpa, cungurishpaca: “Ñuca amito, ¿canta sirvijmanca imatataj nina cangui?” nirca. 15 Jehová Diospaj jahua pacha soldadocunata pushajca Josuemanca: “Can sarucushca lugarca jucha illaj cashcamanta cambaj sandaliacunata anchuchi” nircami. Chashna nincami Josueca sandaliacunata llujshichirca.