Efesios

6 Huahuacuna, Amitohuan shuj shinalla cashcamanta cancunapaj yaya mamata cazuichij. Chaita ruranami Diospaj ñaupajpica alli can. 2 Dios mandashcapica: “Cambaj yaya mamata respetangui” ninmi. Chai mandashcahuanmi Diosca punta cutin: 3 “Chashna rurashpami alli causaita charingui. Cai allpapipish achca tiempotami causangui” nirca. 4 Yayacuna, cancunapaj huahuacunata ama pꞌiñachichijchu. Chaipaj randica Jehová* Dios cushca consejocunata yachachishpa, disciplinashpa* huiñachichij.

5 Sirvij runacuna, Cristota cazuj shinallataj manchaihuan, chujchuihuan, tucui shunguhuan cancunapaj amocunata cazuichij. 6 Shinapish shujtajcuna ricucujllapi, runacunapaj ñaupajpi alli saquiringaraicullaca ama cazuichijchu. Ashtahuanpish Cristota sirvijcuna shina cazuichij. Shinallataj tucui shunguhuan Diospaj munaita ruraichij. 7 Runacunata sirvicuj shinallaca ama ruraichijchu. Chaipaj randica Jehová* Diosta sirvicushca shina paicunataca cushicuihuan sirvichij. 8 Sirvij runapish, cacharichishca runapish ima allita rurashcamantaca Jehová* Diosmantami cutinllataj allicunata japinga. Chaitaca cancunaca allimi yachanguichij. 9 Amocuna, cancunapish cancunata sirvijcunataca ama manchachichijchu, tucuicunata igual trataichij. Paicunapish cancuna shinallatajmi jahua pachapica chai Amollatataj charincuna. Paipaj ñaupajpica tucuicunami igual canchij. Chaitaca yachanguichijmi.

10 Tucuripica Amitopaj poderta chasquishpa catichunmi animani. Paipaj poderca jatunmari. 11 Macanacungapaj Dios cushca tucui churanata churarichij. Chashnami Diablopaj millai trampacunapi ama urmangapaj cancunaca sinchi canguichij. 12 Ñucanchijca mana runacunahuanchu macanacucunchij. Ashtahuanpish cai amsa pachata mandajcunahuan, gobiernocunahuan, autoridadcunahuanmi macanacucunchij. Paicunaca jahua pachapi caj millai espiritucunami. 13 Shinaca macanacungapaj Dios cushca churanata tucui churarichij. Chashnami mana alli punllacuna chayajpica ahuantai tucunguichij. Shinallataj tucuita rurashca huashaca sinchi tucushpami catinguichij.

14 Chaimanta tucui mana llullataca cinturonta chumbillirishca shina alli churarichij. Cashcata ruranatapish pechopi fierro churanata churarij shina alli churarichij. 15 Sumaj causaimanta alli huillaicunata huillangapajpish cancunapaj chaquicunapica zapatocunata churarichij. Chashnami alli huillaicunata huillangapaj allichirishca canguichij. 16 Chai tucuita churarishca huashaca fetapish shuj jatun escudota japij shina chariraichij. Chai escudohuanmi Diablo* japichishca tucui flechacunata huañuchi tucunguichij. 17 Shinallataj cancunapaj umapica quishpirina cascota churarichij. Espíritu cushca espadatapish cancunapaj maquipi chariraichij. Chai espadaca Diospaj shimimi. 18 Chashnallataj espíritu santo yuyachishca shina punllanta Diosta mañaraichij. Shinallataj tucuimanta mañarashpa, rogarishpa catichij. Chaipajca rijcharishca caichij. Tucui jucha illajcunamantapish mañanataca amataj saquichijchu. 19 Pi mana yachai tucushca alli huillaicunata parlai callarijpi, alli shimicunahuan mana manchashpa huillangapaj Dios ayudachun ñucamantapish mañaichij. 20 Diosmi ñucataca alli huillaicunata huillachun cacharca. Chaimantami ñucaca cadenacunahuan huatashca cani. Cai alli huillaicunata huillana cashca shinallataj mana manchashpa huillangapaj ñucamanta Diosta mañapaichij.

21 Amito Jesusta alli sirvij cꞌuyashca huauqui Tiquicomi ñuca ima shina cashcata, ñuca imata ruracujtapish cancunaman tucuita huillanga. 22 Ñucanchij ima shina cashcata huillachun, cancunata cushichichunmi paitaca cancunapajman cachani.

23 Yaya Diospish, Amito Jesucristopish ñucanchij huauquicunamanca cꞌuyaita, feta, sumaj causaitapish cuchun. 24 Manataj tucurij cꞌuyaihuan ñucanchij Amito Jesucristota cꞌuyajcunamanca Diosca yallitaj llaquij cashcata ricuchichun.