2 Timoteo
1 Diospaj munaimanta Cristo Jesuspaj apóstol Pablomi cani. Cristo Jesusmanta Dios cusha nishca causaita huillajmi cani. Cai cartataca 2 ñuca cꞌuyashca churi Timoteomanmi quillcani:
Yaya Diospish, ñucanchij Amito Cristo Jesuspish yallitaj llaquij cashcata, cꞌuyaj cashcata canman ricuchichun, sumaj causaitapish canman cuchun.
3 Diostami pagui nini. Paitaca ñucanchij ñaupa yayacuna shinallatajmi limpio concienciahuan sirvicuni. Tutapish, punllapish Diosta rogarishpa mañacushpaca cantaca siempremi yuyarini. 4 Can huacashcata yuyarishpami cushilla sintiringapaj cantaca ricunata munani. 5 Can mana nij tucushpalla feta ricuchishcatami yuyarini. Chai fetami callaripica cambaj abuela Loida, cambaj mama Eunicepish charirca. Canpish chai feta charishcatami alli yachani.
6 Chaimantami Dios cushca regalotaca ninata ashtahuan japichij shina mirachishpa catichun yuyachini. Chai regalotaca cambaj jahuapi ñuca maquicunata churajpimi chasquircangui. 7 Diosmanta shamuj espíritu santoca ñucanchijmanca manchana yuyaitaca mana curcachu. Ashtahuanpish poderta, cꞌuyaita, alli yuyaitami curca. 8 Amito Jesusmanta huillanataca ama pingaringui. Paimantami ñucaca prezupi cani. Ñucamantapish ama pingaringui. Chaipaj randica Diospaj poderpi confiashpa alli huillaicunamanta sufrina cajpica llaquicunata apailla. 9 Diosca ñucanchijta quishpichishpami jucha illajcuna cachun cayarca. Shinapish mana ñucanchij ruraicunamantachu cayarca. Ashtahuanpish paipaj quiquin munaimanta, pai yallitaj llaquij cashcamantami chashna cayarca. Paica achca huatacuna huashamanmi Cristo Jesusmanta yallitaj llaquij cashcata ricuchirca. 10 Shinapish cunanmi ñucanchijta Quishpichij Cristo Jesús ricurishcamanta Dios yallitaj llaquij cashcataca ashtahuan achijllata ricunchij. Cristo Jesusmi alli huillaicunamanta huañuita chingachishpa causaita ima shina charinata, mana chingarij cuerpota charinatapish ricuchirca. 11 Chai alli huillaicunata yachaj chayachichunmi ñucataca huillaj cachun, apóstol cachun, yachachij cachunpish Diosca agllarca.*
12 Tucui chaicunamantami llaquicunata apacuni. Shinapish mana pingarinichu. Ñuca crishca Diostaca rijsinimi. Ñuca paiman tucui ima mingashcata agllashca punllacama pai cuidana cashcataca allimi yachani. 13 Ñuca nishca alli yachaita catirai. Cristo Jesushuan shuj shinalla cashcamanta crishcatapish, cꞌuyaitapish ricuchishpa cati. 14 Ñucanchijpi caj espíritu santopaj ayudahuan canman mingashcata alli cuidangui. Caica yallitaj valishcami can.
15 Asia llajtamanta tucui runacuna ñucamanta caruyashcataca yachanguimi. Figelo, Hermógenes runacunapishmi caruyashcacuna. 16 Onesiforopaj huasipi cajcunata Diosca* yallitaj llaquij cashcata ricuchichun. Paica ñucataca cutin cutinmi animarca. Prezupi cadenacunahuan huatashca cajpipish ñucamantaca mana pingarircachu. 17 Ashtahuanpish Roma llajtaman chayashpaca mana shaicushpami ñucata japingacama mashcarca. 18 Agllashca punllapi Amito Jehová* Diosca paita llaquichun. Éfeso llajtapi pai ñucamanta tucui imallata rurashcataca canca ñami alli yachangui.