2 Crónicas
33 Manasesca 12 huatacunata charishpami mandai callarirca. Paica 55 huatacunatami Jerusalenpi mandarca.
2 Manasesca Jehová Diospaj ñaupajpica mana allicunatami rurarca. Jehová Dios paipaj pueblo israelitacunapaj ñaupajmanta llujshichishpa cachashca llajtacuna shinallatajmi Manasesca millanana ruraicunata rurashpa causarca. 3 Paica paipaj yaya Ezequías urmachishca adorana lugarcunatami* cutin shayachirca. Baal dioscunapaj altarcunata, adorana postecunatapishmi shayachirca. Shinallataj intipaj, lunapaj, estrellacunapaj* ñaupajpi cumurishpami chaicunata sirvij carca. 4 Jehová Diosca “Jerusalenpica ñuca shutica huiñai huiñaipajmi canga” nishcami carca. Chaita yachashpapish Manasesca Jehová Diospaj huasipimi yanga dioscunapaj altarcunata rurarca. 5 Shinallataj Jehová Diospaj huasi ishqui patiocunapica jahua pachapi tiyaj intipaj, lunapaj, estrellacunapajpishmi altarcunata shayachirca. 6 Paica paipaj propio churicunataca Hinón pugru pambapimi ninapi rupachirca. Shinallataj magiata, brujianata,* adivinanatapishmi rurarca. Ashtahuanpish huañushcacunahuan parlajcunata, adivinocunatami nombrarca. Chashnami paica Jehová Diospaj ñaupajpica achca mana allicunata rurashpa paita pꞌiñachirca.
7 Shinallataj pai rurashca diostami Diospaj huasiman yaicuchirca. Diosca Davidman, paipaj churi Salomonmanca cashnami nishca carca: “Cai huasipipish, Jerusalenpipish ñuca shutitami huiñai huiñaipaj churasha. Jerusalentaca tucui Israelpaj familiacunamantami agllashcani. 8 Moisesmanta paicuna chasquishca ñuca imallata rurachun nishcacunata, mandamientocunata, tucui Leyta, ñuca tucui mandashcata alli cazujpica paicunapaj ñaupa yayacunaman cusha nishca allpamantaca israelitacunataca mana llujshichishpa cachashachu” nircami. 9 Manasesca Judapi causajcunatapish, Jerusalenpi causajcunatapishmi pandachishpa catirca. Chashnami paicunataca Jehová Dios israelitacunapaj ñaupajmanta llujshichishpa cachashca llajtacunata yalli millaita rurachishpa catirca.
10 Jehová Diosca Manasestapish, paipaj pueblotapishmi rimarca. Pero paicunaca mana cazurcacunachu. 11 Chaimi Jehová Diosca Asiria llajtamanta reypaj soldadocunata mandajcunata paipaj contra macanacunaman shamuchun saquirca. Manasestaca fierro ganchocunahuan japishpami aparcacuna. Shinallataj paitaca ishqui cobre cadenacunahuan huatashpami Babiloniaman aparcacuna. 12 Manasesca yallitaj llaquilla cashpami paipaj Jehová Diosta rogarirca. Paica paipaj ñaupa yayacunapaj Diospaj ñaupajpimi yallitaj humillarirca. 13 Manasesca Diostami mañashpa catirca. Diosca pai rogarishpa mañashcatami llaquishpa uyarca. Jerusalentapish pai cutin mandachunmi saquirca. Chaimi Manasesca Jehová Dios, verdadero Dios cashcata yachaj chayarca.
14 Chai qꞌuipaca Manasesca Davidpaj Llajta muyundij canlla ladopimi Pescado Pungu nishca lugarcama pircacunata rurarca. Chai pircacunaca inti huashicun lado Guihon pugyu pugru pambapimi carca. Shinallataj chai pircacunataca Pescado Pungumantaca chai llajta muyundijtami Ofel urcucama rurarca. Chai pircacunaca yallitaj jatunmi carca. Shinallataj Judapi tiyaj muyundijta pircashca tucui llajtacunapimi soldadocunata mandajcunata nombrarca. 15 Paica rurashcalla diosta Jehová Diospaj huasiman yaicuchishcatapish, shujtaj dioscunatapishmi anchuchirca. Urcupi caj Jehová Diospaj huasipipish, Jerusalén llajtapipish rurashca tucui altarcunatami anchuchirca. Chashnami tucui chai dioscunataca chai llajtamanta canllaman shitarca. 16 Shinallataj Manasesca Jehová Diospaj altartami allichirca. Chai altar jahuapimi Dioshuan alli tucungapaj sacrificiocunatapish, pagui ningapaj sacrificiocunatapish cui callarishpa Judá llajtapi causaj gentecunamanca israelitacunapaj Jehová Diosta sirvichij nirca. 17 Chaita rurajpipish gentecunaca adorana lugarcunapimi paicunapaj Jehová Diospajlla sacrificiocunata rurashpa caticurcacuna.
18 Manasespaj causaipish, paipaj Diosta mañashcapish, israelitacunapaj Jehová Diospaj shutipi parlaj profetacuna* huillashcacunapish Israel llajtamanta reycunapaj causaimanta parlashcapimi registrashca tiyacun. 19 Shinallataj pai mañashcapish, pai rogarishpa mañajpi Dios uyashpa cutichishcapish, tucui paipaj juchacunapish, pai mana cazushcapish, pai manaraj humillarishpa adorana lugarcunata shayachishcapish, adorana postecunata rurashcapish, rurashcalla dioscunapish profetacunapaj quillcashca shimicunapimi tucui quillcashca tiyacun. 20 Qꞌuipaca Manasesca huañurcami.* Paitaca paipaj huasi cꞌuchupimi pambarcacuna. Chai huashaca paipaj churi Amonmi catij rey tucurca.
21 Amonca 22 huatacunata charishpami rey tucurca. Paica ishqui huatacunatami Jerusalenpi mandarca. 22 Amonca paipaj yaya Manasés rurashca shinallatajmi Jehová Diospaj ñaupajpi mana allicunata ruraj carca. Paica paipaj yaya rurashca dioscunamanmi sacrificiocunata rurarca. Shinallataj paicunatami sirvirca. 23 Shinapish Amonca paipaj yaya Manasés, Jehová Diospaj ñaupajpi humillarishca shinaca mana humillarircachu. Ashtahuanpish paica yallitaj millaita rurashpami catirca. 24 Paipaj sirvijcunallatajmi paipaj contra jatarishpa paipaj propio huasillapitaj huañuchircacuna. 25 Pero chai llajtapi causaj gentecunaca Amonpaj contra tucui jatarijcunatami huañuchircacuna. Chai huashaca Amonpaj churi Josiastami catij rey cachun churarcacuna.