Hechos

27 Italia llajtaman barcopi ñucanchij richun yuyarishpami Pablotapish, shujtaj prezucunatapish 100 soldadocunata mandaj Julio shuti runaman entregarcacuna. Julioca Augusto nishca soldadocunapuramantami carca. 2 Adramitio llajtamanta shuj barco ñalla rigrijpimi chaipi huichiyashpa rircanchij. Chai barcoca Asia llajta yacucunapi barcocuna shayarinacunamanmi chayana carca. Ñucanchijhuanca Macedoniapi saquirij Tesalonicamanta Aristarco shuti runapishmi ricurca. 3 Cayandij punllaca Sidón llajtamanmi chayarcanchij. Chaipimi Julioca Pablota achcata llaquishpa, paipaj amigocunata visitanaman richun saquirca. Chaimantami Pablopaj amigocunaca paita ayudarcacuna.

4 Sidonmanta barcopi rishpaca huaira yallitaj pꞌucucujpimi Chipre isla cꞌuchullata pasarcanchij. 5 Chai qꞌuipaca Cilicia, Panfilia llajtacuna tiyan mama cuchata rishpami Liciapi saquirij Mira llajtapi uriyarcanchij. 6 Chaipimi 100 soldadocunata mandaj Julioca Alejandriamanta Italiaman ricuj shuj barcota japishpa ñucanchijtaca chaipi huichiyachirca. 7 Achca punllacunata allimantalla rishpami Cnido llajtaman chayarcanchij. Chai llajtaman chayanaca sinchimi carca. Huaira jatarishpa jarcajpimi Salmone chꞌimbanijta pasashpa Creta isla cꞌuchullata rircanchij. 8 Chashna cꞌuchullata ricujpipish huaira achcata pꞌucujpimi barcota pushanaca sinchi carca. Chashnapish Lasea llajta cꞌuchullapi saquirij Bellos Puertos nishcamanmi chayarcanchij.

9 Achca punllacunami ña pasashca carca. Mama cucha yacuta rinapish ashtahuan sinchimi carca. Shinallataj ayunana punllapish* ñami pasashca carca. Chaimantami Pabloca cashna nishpa paicunataca yuyachirca: 10 “Amigocuna, cunan viajanaca mana alli cashcatami ricuni. Cunan viajashpaca barcoca yacupimi huashicunga, apacushca cargacunapish chingaringami, ñucanchijpish huañui tucunchijmi” nircami. 11 Shinapish 100 soldadocunata mandajca Pablo nishcata cazunapaj randica barcota manejajta, barcopaj dueñotapishmi cazurca. 12 Tamya punllacunata Bellos Puertospi saquirinaca mana allichu carca. Chaimi casi tucuicuna chaimanta rishpa tamya punllacunata barcocuna shayarina Fenicepi saquiringapaj ima shinapish chaiman chayashun nircacuna. Feniceca Creta islapimi saquirij carca. Fenicemanca inti llujshin ura ladomantapish, inti llujshin janaj ladomantapishmi barcocunaca chayajcuna carca.

13 Ura ladomanta huaira ashallata pꞌucujpimi paicunaca Fenicemanca chayashunllami yuyarcacuna. Chaimantami barcota charichina fierrocunata huichi tandashpa Creta isla cꞌuchullata rircacuna. 14 Shinapish ashata rishca huashallami euroaquilón shuti jatun huaira Creta islamanta jatarirca. 15 Chai huaira sinchita pꞌucushpa jarcajpimi barcotaca ñaupajman pushanata mana valircanchij. Chaimantami imata mana rurai tucushpa barcotaca huaira apashpa richun saquircanchij. 16 Chai qꞌuipaca Cauda shuti uchilla isla cꞌuchullatami rircanchij. Shinapish barco aisashpa ricushca uchilla canoata* japinaca sinchimi carca. 17 Chai canoata barcoman huichiyachishca qꞌuipami barco ama pꞌaquirichunca jatun huascacunahuan jahuamanta ucuman muyuchishpa huatarcacuna. Sirte* arena allpapi pambarinata manchashpami barcopaj telata* uriyachishpa huaira maita apashcata rircacuna. 18 Cayandij punllaca manchanai huaira caiman chaiman barcota cuyuchijpimi barcopi imalla apacushcacunataca yacupi shitai callarircacuna. 19 Ña quimsa punllacuna tucujpimi barcomanta huaquin huascacunata paicunapaj maquillahuantaj shitarcacuna.

20 Achca punllacunatami intitapish, estrellacunatapish mana ricurcanchij. Shinallataj manchanai huaira, tamya tiyashcamantami ña mana quishpirishunchu nishpa yuyarcanchij. 21 Barcopi rijcunaca achca punllacunatami ña mana micushcacuna carca. Chaimi Pabloca paicunapaj chaupipi shayarishpaca cashna nirca: “Amigocuna, ñuca consejotaca uyanami carcanguichij. Creta islamanta mana shamushca cashpaca, cai tucui llaquicunataca mana charinchijmanchu carca. Yacupipish mana imata shitanchijmanchu carca. 22 Shinapish cancunamanta shujllapish mana huañunguichijchu barcollami chingaringa. Chaimantami cancunataca ama manchaichijchu nini. 23 Ñucaca Diospajmi cani, paitami adorani. Tutaca Diospaj angelmi ñuca ladopi ricurirca. 24 Chashna ricurishpami ñucataca: ‘Pablo ama manchaichu. Canca Cesarpajmanmi chayana cangui. Diosca cantapish, barcopi canhuan ricujcunatapishmi quishpichinga’ nirca. 25 Chaimanta amigocuna ama manchaichijchu. Ñucaca Dios nishcataca crinimi. Diospaj ángel ñucaman nishca shinallatajmi pajtaringa. 26 Shinapish shuj isla cꞌuchullaman pushashpami barcotaca chaipi pambarichun saquina canchij” nircami.

27 Adria shuti mama cucha yacupimi 14 tutacunata caiman chaiman huaira apajpi puricurcanchij. Chaupi tuta cajpimi barcota purichijcunaca ña chaquishca allpaman chayacushcata sintircacuna. 28 Chaimi yacu jahuamanta ucu allpaman mashna charishcata midishpaca 36 metrocunata charishcata ricurcacuna. Chaimanta ashahuan rishpaca cutinllataj yacu jahuamanta ucu allpaman midishpaca casi 27 metrocunata charishcatami ricurcacuna. 29 Rumi jahuapi saquirinata manchashpami barcota charichina chuscu fierrocunataca barco huasha ladomanta shitarcacuna. Paicunaca ña pacarichunmi munarcacuna. 30 Barcota purichijcunaca chai barcota shitashpa rinatami yuyarcacuna. Chaimi barcota charichina fierrocunata ñaupaj ladomanta uriyachij tucushpa uchilla canoata mama cucha yacuman uriyachircacuna. 31 Chaimi Pabloca 100 soldadocunata mandajtapish, caishuj soldadocunatapish: “Cai runacuna barcopi mana saquirijpica cancunaca mana quishpiri tucunguichijchu” nirca. 32 Chashna nijpimi soldadocunaca canoata huatashca huascacunata pꞌitishpa canoataca yacupi cacharcacuna.

33 Ñalla achijyagrijpimi Pabloca tucuicunata imallatapish micuchun animai callarirca. Pabloca cashnami nirca: “Cancunaca ñami 14 punllacunata ima tucunata mana yachashpa shuyacushcanguichij. Imatapish mana micushcanguichijchu. 34 Cancunapaj allipajllatajmi imallatapish micuchun aconsejani. Cancunapaj umamantaca shuj ajchallapish mana chingaringachu” nircami. 35 Chashna nishca qꞌuipami Pabloca shuj tandata japishpa tucuicunapaj ñaupajpi Diosta pagui nishpaca, chaupishpa micui callarirca. 36 Chaita ricushpami tucuicuna animarishpaca imallatapish micui callarircacuna. 37 Chai barcopica 276 gentecunapurami* carcanchij. 38 Huijsa pajtata micushca qꞌuipaca barco pꞌanguilla tucuchunmi trigota mama cucha yacuman shitarcacuna.

39 Ña punllayajpica barcota purichijcunaca allpata ricushpapish maipi cashcata mana yacharcacunachu. Shinapish yacu cucha uripica arena allpa tiyashcatami ricurcacuna. Chaimi pudishpaca chaipi barcota shayachinata yuyarcacuna. 40 Chaimantami barcota charichina fierropaj huascacunata pꞌitishpa mama cucha yacuman urmachun saquircacuna. Barcota caiman chaiman purichij caspicunatapish cacharishpa, barcota purichij ñaupaj lado telatapish chutajpimi huairaca barcota yacu uri allpaman cꞌuchuyachi callarirca. 41 Mama cucha ucupi tandarishca achca arena allpahuan chocashpami barcoca chaipi pambarirca. Ñaupaj ladoca arena allpapi pambarishpami maiman mana cuyurirca. Cutin barcopaj huasha ladoca yacu sinchita huajtajpimi tucui pꞌaquiri callarirca. 42 Chashna tucucujpimi soldadocunaca prezu apacushcacuna yacupi nadashpa shujllapish ama miticugrichun huañuchishun nircacuna. 43 Shinapish 100 soldadocunata mandajca Pablota ama huañuchichun nishpami soldadocuna yuyacushcata rurachunca mana saquirca. Chaimantami nadanata yachajcunataca mama cucha yacuman saltashpa allpaman punta chayachun mandarca. 44 Cutin shujtajcunataca tablacunapi, barco pꞌaquirishca caspicunapi richunmi mandarca. Chashnami allpamanca tucuicuna alli chayarcacuna.