Lucas

24 Chai huarmicunaca semana callari punllami* manaraj achijyajpi Jesusta churashca jutcuman rircacuna. Paicuna allichishca mishquijllata ashnacuj qꞌuihuacunata apashpami rircacuna. 2 Chaiman chayashpaca jutcu pungupi churashca rumitaca anchuchishcatami ricurcacuna. 3 Paicuna yaicushpaca Amito Jesuspaj cuerpotaca mana japircacunachu. 4 Chai huarmicuna imata mana rurai tucushpa shayacujpimi ñapish ishqui runacunaca achijnicuj churanata churarishca paicunapaj ladopi ricurirca. 5 Chaita ricushpami huarmicunaca mancharishpa pambaman cumurircacuna. Chaipimi chai runacunaca cashna nircacuna: “¿Huañushcacunapaj chaupipica imamantataj causacuj runataca mashcacunguichijyari? 6 Paica mana caipichu, ñami causachishca cashca. ¿Galileapi cashparaj pai imata nishcataca manachu yuyaringuichij? 7 Runapaj Churitaca juchayujcunapaj maquipi churashpami caspipi clavashpa huañuchingacuna. Shinapish quimsa punlla huashaca causachishcami canga nircami” nircacuna. 8 Chaipimi paicunaca Jesús imata nishcata yuyarircacuna. 9 Jesusta churashca jutcumanta chai huarmicuna tigrashpaca 11 apostolcunamanpish, caishujcunamanpishmi tucuita huillarcacuna. 10 Apostolcunaman huillajcunaca María Magdalena, Juana, Santiagopaj mama María, paicunahuan caj shujtaj huarmicunapishmi carca. 11 Shinapish paicunaca chai huarmicuna huillashcataca mana crircacunachu. Paicunapaj yuyaipica yangata nicushca shinallami carca.

12 Ashtahuanpish Pedro jatarishpaca Jesusta churashca jutcumanmi callpashpa rirca. Cumurishpaca linohuan rurashca telallatami ricurca. Chaita ricushpaca imashi tucurca nishpami tapurishpa rirca.

13 Chai punllallatajmi Jesusta ishqui catijcunaca Emaús shuti uchilla puebloman ricurcacuna. Chai uchilla puebloca Jerusalenmanta casi 11 kilometrocuna* shinapimi. 14 Paicunaca tucui imalla tucushcatami parlanacushpa ricurcacuna.

15 Chashna parlanacushpa ricujpimi Jesusca cꞌuchuyashpa paicunahuan igual ri callarirca. 16 Shinapish paicunaca Jesusta ricushpapish mana rijsircacunachu. 17 Chaimi paica: “¿Ñanta shamucushpaca imatataj rimanacucurcanguichij?” nishpa tapurca. Chashna tapujpimi paicunaca llaquilla chaipi shayarircacuna. 18 Chaipimi Cleopas shuti runa cutichishpaca: “¿Shujtaj llajtamanta shamushpa Jerusalenpi canlla causacushpachu cai punllacunapi chaipi ima tucucushcataca mana yachangui?”* nirca. 19 Chashna nijpimi paica: “¿Imataj tucurcari?” nishpa tapurca. Chaipimi paicunaca cashna cutichircacuna: “¿Nazaretmanta Jesushuan ima tucushcataca manachu uyashcangui? Paica shuj profetami carca. Diospaj ñaupajpipish, gentecunapaj ñaupajpipish paipaj ruraicunahuan, rimashcahuanpishmi poderta charishcata ricuchirca. 20 Shinapish sacerdotecunata mandajcunapish, autoridadcunapishmi paitaca huañuchichun entregarcacuna. Chaimantami caspipi* clavarcacuna. 21 Ñucanchijca Israel llajtata pai quishpichichunmi shuyacurcanchij. Ashtahuanpish tucui chaicuna tucushcamantaca ñami quimsa punllacuna pasashca. 22 Shinallataj ñucanchijpuramanta huaquin huarmicuna huillashcata uyashpami mancharircanchij. Paicunaca Jesusta churashca jutcumanmi utca rircacuna. 23 Shinapish Jesuspaj cuerpotaca mana japishcacunachu carca. Ashtahuanpish angelcuna ricurishpami Jesús causarishcata huillan nishpa tigramurcacuna. 24 Chaimi ñucanchijhuan cajcunamanta huaquincunapish Jesusta churashca jutcuman rishpaca chushajllata ricurcacuna. Huarmicuna nishca shinallatajmi Jesustaca mana ricurcacuna” nircacunami.

25 Chashna nijpimi chai runaca: “¡Aij yuyai illaj, mana utca crij runacunalla! ¿Imamantataj profetacuna tucui huillashcataca mana cringuichijyari? 26 ¿Jatunyachishca cangapajca Cristoca manachu cai tucui llaquicunata apana carca?” nirca. 27 Chaita nishca qꞌuipaca Dios quillcachishcacunapi paimanta nishcatami tucuita intindichirca. Moisés quillcashcamanta callarishpaca tucui Profetacuna quillcashcatami intindichirca.

28 Paicuna ricushca uchilla pueblomanmi ña chayacurcacuna. Shinapish Jesusca ashtahuan caruman ricuj shinami tucurca. 29 Chaipimi paicunahuan saquirichun cutin cutin mañarcacuna. Paicunaca: “Intica huashicucunmari ñallami amsayagrin. Cai tutaca ñucanchijhuan saquiri” nircacunami. Chashna nijpimi paicunahuan saquiringapaj huasiman yaicurca. 30 Ña paicunahuan micucushpaca tandata japishpami Diosta mañarca. Chai huashaca tandata chaupishpami paicunaman curca. 31 Chaipimi paicunaca alli ricushpa Jesús cashcata rijsircacuna. Shinapish Jesusca paicunapaj ñaupajmantaca chingarircallami. 32 Chashna tucujpimi paicunapura parlanacushpaca: “¿Ñanta shamucushpa Dios quillcachishcacunata alli intindichijpica, manachu ñucanchij shungupica yallitaj cushicurcanchij?” nircacuna. 33 Chai ratomi jatarishcahuan paicunaca Jerusalenman tigrarcacuna. Chaipica 11 apostolcunatapish, paicunahuan tandanacushcacunatapishmi ricurcacuna. 34 Paicunaca: “¡Amito Jesusca causarishcatajmari. Paica Simonmanmi ricurishca!” nishpami parlanacucurcacuna. 35 Chaipimi Emaús uchilla pueblomanta tigramujcunaca ñanpi ima tucushcata huillarcacuna. Shinallataj tandata chaupijpi Jesusta ima shina rijsishcatapishmi parlarcacuna.

36 Chashna parlanacucujpimi Jesusca paicunapaj chaupipi ricurishpaca: “Sumaj causaita charichij” nirca. 37 Chashna nijpimi paicunaca yallitaj mancharishpa, shuj espirituta ricucushcata yuyarcacuna. 38 Chaimi Jesusca paicunamanca cashna nirca: “¿Imamantataj mancharinguichij? ¿Imamantataj cancunapaj shungupica caita chaita yuyacunguichij? 39 Ñuca maquicunatapish, chaquicunatapish ricuichij. Ñucallatajmari cani. Tuparishpa ñucata ricuichij, shuj espirituca aichatapish, tullutapish mana charinchu. Cancuna ricushca shinaca ñucaca aichayuj, tulluyujmi cani” nirca. 40 Chashna nishpaca paipaj maquicunata, chaquicunatapishmi ricuchirca. 41 Paicuna yallitaj cushicushpa, mancharinacushpa manaraj crijpimi Jesusca: “¿Micungapaj caipi imata charinguichijchu?” nishpa tapurca. 42 Chashna nijpimi paicunaca cusashca asha pescadota curcacuna. 43 Chashna cujpimi Jesusca japishpa paicuna ricucujpi micurca.

44 Chai qꞌuipami Jesusca: “Moisesman cushca leypi, Profetacuna quillcashcacunapi, Salmocunapipish ñucamanta quillcashcacunaca tucuimi pajtarinataj carca. Cai shimicunataca cancunahuan cashparajmi huillarcani” nirca. 45 Chaipimi Dios quillcachishcacunapi ima nishcata tucui intindichun paicunata ayudarca. 46 Paicunamanca cashnami nirca: “Quillcachishcapica cashnami nin: Cristoca llaquicunatami apanga. Huañushcacunapaj chaupimantapish quimsa punllapimi causaringa. 47 Shinallataj juchacunamanta perdonashca cangapaj arrepintirichunmi, Jerusalenmanta callarishpaca tucui llajtacunapi paipaj shutipi huillangacuna. 48 Cancunami caicunamantaca huillanguichij. 49 Ñuca Yaya cusha nishcatapish cancunamanmi cachasha. Shinapish jahua pachamanta poderta chasquingacama Jerusalenpi saquirichij” nircami.

50 Chai qꞌuipami Jesusca Jerusalenmanta llujshishpaca Betaniacama paicunataca pusharca. Chaipimi maquicunata alzashpa paicunata bendiciachun Diosta mañarca. 51 Paicunamanta chashna mañacushpaca Jesusca caruyarcallami. Paitaca Diosmi jahua pachaman aparca. 52 Chaita ricushpami paicunaca cungurishpa Jesusta alli nircacuna. Shinallataj achcata cushicushpami Jerusalenmanca tigrarcacuna. 53 Chashna tigrashpaca Diospaj huasipimi punllanta Diosta alabashpa catircacuna.