2 Corintios
10 Ñuca ima nishcata rurachunmi rogapani. Cancunata rimashpaca Cristo shinallatajmi humilde, llaquij cashcata ricuchini. Shinapish cancunapuramanta maijancunaca ñucanchijhuan cashpaca paica irquillami ricurin ninguichijmi. Cutin cartacunata quillcashpaca mana manchaj runa shinami can ninguichijmi. 2 Cai pacha gentecuna shina puricushcata ñucanchijmanta yuyacujcunaca ojala ñuca chayangapajca ña cambiashca cachun. Chashnami paicunataca mana sinchita rimana tucunga. 3 Ñucanchijca runacuna shina causashpapish, runacuna shinaca mana macanacunchijchu. 4 Ñucanchij macanacunacunaca mana cai pachamantachu. Ashtahuanpish Diosmi chai macanacunacunataca ñucanchijman cushca. Dios cushca tucuita rurai tucuj macanacunacunahuanmi alli pircashca shina jarcacujcunataca urmachi tucunchij. 5 Gentecunapaj panda yuyaicunatapish, Diosta ama rijsichun churashca jarcaicunatapishmi urmachicunchij. Cristota cazuchunmi tucui yuyaicunatapish carcelpi churaj shina churacunchij. 6 Mana cazuj runacunata castigangapajca listomi canchij. Cancuna tucuipi cazujcuna cashcata ricuchishca qꞌuipami chaitaca rurashun.
7 Cancunaca ñahuita ricushpallami juzganguichij. Maijanpish Cristopajmi cani nijca shuj cutinhuan caita yuyarichun: ñucanchijpish pai shinallatajmi Cristopaj canchij. 8 Amito Jesusca cancunata llaquichingapajca mana autoridadta curcachu. Ashtahuanpish cancunata animangapajmi autoridadta curca. Autoridadta cushcamanta ashallatapish jatun tucushpaca mana pingai tucuimanchu. 9 Caita nishpaca ñuca quillcashca cartacunahuanca mana cancunata manchachisha nicunichu. 10 Maijancunaca: “Pai quillcashca cartacunapica importante yuyaicunatami sinchita rimashpa quillcan. Shinapish caipi cashpaca yanga runa shinallamari, pai rimashcapish mana uyaipajmari” nincunami. 11 Caita nijcunaca caita alli yachachun. Cancunapajman chayashpaca ñucanchij cartapi quillcashca shinallatajmi rurashun. 12 Jatun tucushcacunahuanca mana chꞌimbapurarishun ninchijchu. Paicuna shinapish mana cashun ninchijchu. Paicunapaj yuyaipi ima alli cashcata ricushpami paicunapurallataj caishuj chaishuj juzganacuncuna. Chashnami paicunaca yuyai illaj cashcata ricuchincuna.
13 Ñucanchijca imata mana rurashcamantaca mana jatun tucushunchu. Ashtahuanpish ñucanchijca Dios mingashcata ruracushcallamantami jatun tucunchij. Diosmi ñucanchijtaca cancunapajmanpish cacharca. 14 Cancunapajman chayashpaca Dios imata mana mingashcataca mana rurarcanchijchu. Ashtahuanpish ñucanchijmi puntapica Cristomanta alli huillaicunata cancunaman huillarcanchij. 15 Ñucanchijca imata mana rurashcamanta o shujtajcuna rurashcamantaca mana jatun tucunchijchu. Shinapish cancunapaj crishcacuna huiñashpa catichunmi munanchij. Chashnami ñucanchij rurashca obraca cancunapurapi mirarishpa catinga. Chaipimi ñucanchijca ashtahuan rurai tucushun. 16 Ñucanchijca cancunamanta caru ladocunapimi alli huillaicunata huillanaman risha ninchij. Chashnami shujtajcuna imata rurashcamantaca mana jatun tucushun. 17 “Maijanpish jatun tucujca Jehová* Diosmanta jatun tucuchun”. 18 Jehová* Diosca pai jatunyachishca runatami chasquin. Ashtahuanpish paillataj jatun tucujtaca mana chasquinchu.