Nehemías

13 Chai punllaca tucuicunamanmi Moisés quillcashca librota liyircacuna. Chaipimi Diosta adorajcunapurapi ammonitacunata, moabitacunata manataj chasquina cashcata ricurcacuna. 2 Paicunaca israelitacunamanca tandatapish, yacutapish mana cushcacunachu carca. Chaipaj randica paicunata maldicichunmi Balaamman pagashcacuna carca. Pero ñucanchij Diosca chai maldicishcata cambiashpami bendiciarca. 3 Leypi ima nishcata tucuicuna uyashpaca shujtaj llajtamanta cajcunatami israelitacunapuramanta chꞌicanyachi callarircacuna.

4 Manaraj chashna rurajpica ñucanchij Diospaj huasipi huaquichina cuartocunata* cuidajca sacerdote Eliasibmi carca. Paica Tobiaspaj familiami carca. 5 Eliasibca shuj jatun huaquichina cuartotami Tobiasman cushca carca. Ñaupaca chai cuartopica grano ofrendata, olibanota, shujtaj cosascunatami huaquichijcuna carca. Shinallataj levitacunaman, cantajcunaman, punguta cuidajcunaman cuna cashca granocunata, llullu vinota, aceitetapishmi cada chungamanta shujta* cushcata huaquichijcuna carca. Chaipica sacerdotecunaman cushca ofrendatapishmi huaquichijcuna carca.

6 Babilonia llajtata mandaj rey Artajerjes 32 huatacunata mandacujpimi rey maipi cashcaman tigrarcani. Chaimi tucui chai tiempoca ña mana Jerusalenpi carcani. Shinapish asha tiempo qꞌuipaca tigrangapajmi reyta permisota mañarcani. 7 Jerusalenman chayashpaca Tobiaspaj ñaupajpi alli saquiringapaj Eliasib mana allita rurashcatami cuentata curcani. Paica Diospaj huasi patiopimi shuj huaquichina cuartota Tobiasman cushca carca. 8 Chaimi mana jahuallata pꞌiñarishpa Tobiaspaj imalla tiyashcacunataca huaquichina cuartomanta tucuita canllaman shitarcani. 9 Qꞌuipaca huaquichina cuartocunata pꞌichachunmi mandarcani. Chai qꞌuipami Diospaj huasipi tiyaj cosascunata, grano ofrendata, olibanotapish cutin chaipi huaquichircani.

10 Shinallataj levitacunaca paicuna japina cashcata mana japicushcatami yachaj chayarcani. Chashna mana japicushcamantami chaipi sirvij levitacunapish, cantajcunapish cada uno paicunapaj chagracunaman tigrashca carca. 11 Chaimantami catij mandajcunataca: “¿Diospaj huasitaca imamantataj shitashpa saquircanguichij?” nishpa sinchita rimarcani. Qꞌuipaca chaimanta rishcacunata tandachishpami paicuna sirvicushcaman cutin tigrachun mandarcani. 12 Judamanta tucui gentecunami chungamanta shujta cuna cashca granota, llullu vinota, aceitetapish huaquichina cuartoman aparcacuna. 13 Chaimantaca sacerdote Selemiasta, quillcaj* Sadocta, levitacunamanta Pedayatami huaquichina cuartocunata cuidachun churarcani. Paicunata ayudajca Hananmi carca. Hananca Zacurpaj churimi carca, Zacurca Mataniaspaj churimi carca. Tucui paicunaca confiaipaj runacunami carca. Paicunami paicunapaj huauquicunamanca cada unoman japina cashcata cuna carcacuna.

14 Ñuca Dioslla, ñucata yuyaripai. Caicunata rurashcatapish yuyaripai. Cambaj huasita cꞌuyashcatapish, chaipi canta sirvingapaj imallata rurashcatapish amataj cungaripaichu.

15 Chai punllacunapica gentecuna sabadopi vinota rurangapaj uvacunata sarucushcata, granocunata tandashpa burrocunaman apachicushcatami ricurcani. Shinallataj Jerusalenman vinota, uvacunata, higocunata, tucui laya granocunata sabadopi apamucushcatami ricurcani. Chaimantami chai punllapi micunacunata cꞌatunata saquichun advirtircani. 16 Shinallataj llajtapi causaj Tiromanta cajcunapishmi pescadocunata, tucui laya cꞌatunacunata apamushpa Judamanta gentecunaman cꞌatujcuna carca. Chaitaca Jerusalenpimi sábado punllapi cꞌatujcuna carca. 17 Chaimantami Judamanta pushajcunata sinchita rimashpaca cashna nircani: “¿Ima nishpataj sábado punllata yangapi churashpa cai jatun millaita ruracunguichijyari? 18 Cancunapaj ñaupa yayacunami chashna rurarcacuna. Chaimantami ñucanchij Diosca ñucanchijmanpish, cai llajtamanpish tucui cai llaquicunata cacharca. ¿Cunanca cancunachu sábado punllataca yangapi churacunguichij? ¿Chashna rurashpaca israelitacunahuan Dios ashtahuan pꞌiñarichunchu munanguichij?” nircanimi.

19 Chaimantaca manaraj amsayajpi, sábado punlla manaraj callarijpimi Jerusalén pungucunata huichcashpa sábado punlla tucuringacama ama pascachun mandarcani. Shinallataj ñucata ayudajcunatami sábado punllapi cꞌatuna cosascunata ama pi apamuchun pungucunata cuidachun churarcani. 20 Chaimantami comerciantecunapish, tucui laya cosascunata cꞌatujcunapish shuj o ishqui tutata Jerusalén canllaman pacarircacuna. 21 Paicunataca: “¿Imatataj caipica ruracunguichij? Pircacuna ñaupajpi cutin pacarinaman shamujpica a la fuerzami llujshichishpa cachasha” nishpami advirtircani. Chai punllamantami sabadopica ña mana shamujcuna carca.

22 Shinallataj levitacunataca chuyayarishpami catina canguichij, sábado punllata ama yangapi churachunpish pungucunata cuidanamanmi shamuna canguichij nircanimi. Ñuca Dioslla, ñucata yuyaripai. Caita rurashcatapish ama cungaripaichu. Canca achcata cꞌuyajmi* cangui, ñucata llaquihuayari.

23 Chai punllacunapica maijan judiocunaca Asdodmanta, Ammonmanta, Moabmanta huarmicunahuan cazarashcatami* ricurcani. 24 Paicunapaj huahuacunamanta chaupica Asdodmanta gentecuna parlashca shimitami parlarcacuna. Cutin caishuj chaupica shujtaj llajtacunamanta gentecunapaj shimitami parlarcacuna. Pero paicunamantaca judiocunapaj shimitaca ni maijan mana parlarcacunachu. 25 Chai judiocunataca maldicishpami sinchita rimarcani. Huaquin cꞌaricunataca macashpa, ajchamantami cꞌutsarcani. Shinallataj Diospaj shutipimi jurachircani. Paicunataca cashnami nircani: “Cancunapaj ushushicunataca paicunapaj churicunahuanca ama cazarachinguichijchu. Cancunapaj churicunatapish paicunapaj ushushicunahuanca ama cazarachinguichijchu. Cancunapish chai huarmicunahuanca ama cazaranguichijchu. 26 ¿Manachu chaita rurashcamanta Israelta mandaj rey Salomonca juchapi urmarca? Tucui llajtacunapi pai shina reyca mana tiyarcachu. Ñucanchij Diospish paita cꞌuyashcamantami tucui Israel llajtapi rey cachun churarca. Chashnapish paitaca shujtaj llajtamanta huarmicunami juchapi urmachirca. 27 ¿Cancunaca imamantataj cai jatun millaitaca rurarcanguichijyari? ¿Imamantataj shujtaj llajtamanta huarmicunahuan cazarashpa Diosta mana cazurcanguichijyari?” nircanimi.

28 Joiadaca sacerdotecunata jatun mandaj Eliasibpaj churimi carca. Joiadapaj churicunamanta shuj churica Bet-horonmanta Sanbalatpaj yernomi carca. Chaimantami paitaca ñuca ladomanta anchuchishpa cacharcani.

29 Ñuca Dioslla, paicuna imalla rurashcata yuyaringui. Paicunaca sacerdote shina sirvinatami mapayachishcacuna. Shinallataj sacerdotecunahuan, levitacunahuan ari ninacushcatami mapayachishcacuna.

30 Ñucaca tucuicunatami shujtaj llajtamanta gentecunapaj mana alli ruraicunamanta chꞌicanyachishpa chuyayachircani. Shinallataj sacerdotecuna, levitacuna cada uno paicuna sirvicushcapi imallata rurana cashcatami organizarcani. 31 Shinallataj yantata, punta pꞌucushca granocunata por turno apamuchunmi organizarcani.

Ñuca Dioslla, ñucata yuyarishpa bendiciapai.