Mateo
1 Cai libroca Jesucristopaj* causaimantami parlan. Paica Davidpaj churi,* Abrahanpaj churimi carca.
2 Abrahanca Isaacpaj yayami carca.
Isaacca Jacobpaj yayami carca.
Jacobca Judapaj, paipaj huauquicunapaj yayami carca.
3 Judaca Perezpaj, Zerahpaj yayami carca. Paicunapaj mamaca Tamarmi carca.
Perezca Hezronpaj yayami carca.
Hezronca Rampaj yayami carca.
4 Ramca Aminadabpaj yayami carca.
Aminadabca Nahsonpaj yayami carca.
Nahsonca Salmonpaj yayami carca.
5 Salmonca Boazpaj yayami carca. Boazpaj mamaca Rahabmi carca.
Boazca Obedpaj yayami carca. Obedpaj mamaca Rutmi carca.
Obedca Jesepaj yayami carca.
6 Jeseca rey Davidpaj yayami carca.
Davidca Salomonpaj yayami carca. Salomonpaj mamaca Uriaspaj huarmimi carca.
7 Salomonca Rehoboampaj yayami carca.
Rehoboamca Abiaspaj yayami carca.
Abiasca Asapaj yayami carca.
8 Asaca Jehosafatpaj yayami carca.
Jehosafatca Jehorampaj yayami carca.
Jehoramca Uziaspaj yayami carca.
9 Uziasca Jotanpaj yayami carca.
Jotanca Acazpaj yayami carca.
Acazca Ezequiaspaj yayami carca.
10 Ezequiasca Manasespaj yayami carca.
Manasesca Amonpaj yayami carca.
Amonca Josiaspaj yayami carca.
11 Josiasca Jeconiaspaj, paipaj huauquicunapaj yayami carca. Paicunaca israelitacunata manaraj Babilonia llajtaman apajpimi huacharircacuna.
12 Babiloniaman apashca huashami Jeconiasca Sealtielpaj yaya tucurca.
Sealtielca Zorobabelpaj yayami carca.
13 Zorobabelca Abiudpaj yayami carca.
Abiudca Eliaquimpaj yayami carca.
Eliaquimca Azorpaj yayami carca.
14 Azorca Sadocpaj yayami carca.
Sadocca Aquimpaj yayami carca.
Aquimca Eliudpaj yayami carca.
15 Eliudca Eleazarpaj yayami carca.
Eleazarca Mattanpaj yayami carca.
Mattanca Jacobpaj yayami carca.
16 Jacobca Josepaj yayami carca. Joseca Mariapaj cusami carca. Mariamantami Jesusca huacharirca. Jesustami gentecunaca Cristo* nincuna.
17 Abrahanmanta Davidcamaca 14 yayacunami tiyarca. Cutin Davidmanta israelitacunata Babiloniaman apangacamaca 14 yayacunami tiyarca. Israelitacunata Babiloniaman apashcamanta Cristocamaca 14 yayacunami tiyarca.
18 Jesucristoca cashnami huacharirca: Paipaj mama Mariaca Josehuan cazarangapajmi ari nishca carca. Shinapish manaraj cazarashpami Diospaj espíritu santomanta chichu saquirirca. 19 Mariapaj cusa cana* Joseca cashcata rurajmi carca. Paica Mariata shujtajcunapaj ñaupajpi pingaipi ama churangapajmi pacalla paimanta divorciarinata* yuyacurca. 20 José chashna yuyashca qꞌuipami Jehová* Diospaj ángel muscuipi ricurishpaca: “Davidpaj churi José, Mariahuan cazaranataca ama manchaichu.* Paica Diospaj espíritu santomantami chichu saquirishca. 21 Paica shuj cꞌari huahuatami huachanga. Chai huahuataca Jesús* nishpa shutichingui. Paimi gentecunataca paicunapaj juchamanta quishpichinga” nircami. 22 Tucui caicunaca Jehová* Dios paipaj profetaman huillachishca pajtarichunmi chashna tucurca. 23 Chai profetaca: “¡Ricui! Cꞌarihuan manaraj chayarishca huarmimi chichu saquirishpa shuj cꞌari huahuata huachanga. Paitaca Emmanuel nishpami gentecunaca rijsingacuna” nircami. Emmanuel shutica “Diosca ñucanchijhuanmi can” nisha ninmi.
24 Joseca dormicushcamanta rijcharishpaca Jehová* Diospaj ángel mandashca shinami Mariahuan cazararca.* 25 Shinapish María huahuata huachangacamami Joseca paihuan mana chayarinacurca. Chai huahuataca Jesús nishpami shutichirca.