2 Crónicas
34 Josiasca pusaj huatacunata charishpami mandai callarirca. Paica 31 huatacunatami Jerusalenpi mandarca. 2 Josiasca Jehová Diospaj ñaupajpica allicunatami rurarca. Paica paipaj ñaupa yaya Davidpaj ejemplotami catirca. Paica alli ladomanpish, lluqui ladomanpish mana anchurishpami ima pandata mana rurarca.
3 Shinallataj Josiasca pusaj huatacunata mandacushpa, huahuaraj cashpami paipaj ñaupa yaya Davidpaj Diosta sirvi callarirca. Josiasca 12 huatacunata mandacushpami Judapi, Jerusalenpi adorana lugarcunata,* adorana postecunata, rurashcalla dioscunata, fierrota yacuyachishpa rurashca dioscunatapish anchuchirca. 4 Josiaspaj ñaupajpipish Baal dioscunapaj altarcunatami urmachircacuna. Chai jahuapi tiyaj inciensota rupachina altarcunatapishmi urmachirca. Shinallataj Josiasca adorana postecunata, rurashcalla dioscunata, fierrota yacuyachishpa rurashca dioscunatapish tucuitami ñutu allpata rurarca. Tucui chai ñutu allpataca sacrificiocunata rurashpa cujcuna maipimi pambashca carcacuna, chai jahuallapitajmi shitarca. 5 Paica sacerdotecunapaj tullucunatapish paicuna utilizashca altarllapitajmi rupachirca. Chashnami Josiasca Judamanta, Jerusalenmanta tucui rurashcalla dioscunata anchuchirca.
6 Shinallataj Manasespaj, Efrainpaj, Simeonpaj, Neftalipaj allpacunapi tiyaj llajtacunapipish, chai llajtacunapaj tucui muyundij shitashca allpacunapipish 7 altarcunatami urmachirca. Adorana postecunata, rurashcalla dioscunatapish tucuitami ñutu allpata rurarca. Tucui Israel allpapi inciensota rupachina tucui altarcunatapishmi urmachirca. Chai qꞌuipaca Jerusalenmanmi tigrarca.
8 Josiasca 18 huatacunata mandacushpami tucui Israel llajtapipish, Diospaj templopipish tucuita chuyayachirca. Chai huashaca paica Azaliaspaj churi Safantapish, llajtata mandaj Maaseyatapish, Joacazpaj churi registrador Joatapish paipaj Jehová Diospaj huasita cutin allichichunmi cacharca. 9 Paicunaca sacerdotecunata jatun mandaj Hilquiasta ricunaman rishpaca Diospaj huasiman apamushca cullquitami paiman curcacuna. Chai cullquitaca punguta cuidashpa sirvij levitacunami Manasespaj familiamanta, Efrainpaj familiamanta, Israelpaj caishuj familiacunamantapish tandashcacuna carca. Shinallataj Judapaj familiamanta, Benjaminpaj familiamanta, Jerusalenpi causajcunamantapishmi tandashcacuna carca. 10 Chai qꞌuipaca paicunaca chai cullquitaca Jehová Diospaj huasipi trabajota ricujcunamanmi curcacuna. Chai cullquihuanca Jehová Diospaj huasitami trabajadorcunaca allichircacuna. 11 Trabajocunata ricujcunaca artesanocunaman, obrerocunamanmi cullquita curcacuna. Paicunaca cai cullquihuanmi labrashca rumicunata, huasita jarcachun caspicunata randina carcacuna. Shinallataj Judá llajtamanta mandajcuna dañarichun saquishca huasicunata cutin vigacunahuan shayachichunpishmi cullquita curcacuna.
12 Trabajadorcunaca paicunapaj trabajotaca allimi rurarcacuna. Chai trabajadorcunata ricuchunpish levitacunatami churarca. Meraritacunamantaca Jáhat runata, Abdías runatami churarca. Cohatitacunamantaca Zacariasta, Mesulamtami churarca. Tocanata alli yachaj tucui levitacunaca 13 trabajadorcunatami* mandajcuna carca. Shinallataj tucui laya trabajota rurajcunatami ricujcuna carca. Huaquin levitacunaca secretariocuna, autoridadta charijcuna, punguta cuidajcunami carca.
14 Jehová Diospaj huasiman apamushca cullquita llujshichicushpami sacerdote Hilquiasca Jehová Diospaj Leyta quillcashca librota japirca. Chai librotaca Diosca paipaj pueblopajmi Moisesman cushca carca. 15 Chaimi Hilquiasca secretario Safán runamanca: “Jehová Diospaj huasipimari Leyta quillcashca librota japini” nircami. Chai huashaca paica Safán runamanmi chai librota curca. 16 Cutin Safán runaca chai librotaca reypajmanmi aparca. Paica: “Tucui canta sirvijcunaca can mingashcataca allimi pajtachicuncuna. 17 Paicunaca Jehová Diospaj huasipi tiyaj cullquita japishpami trabajota ricujcunamanpish, Diospaj huasipi trabajajcunamanpish curcacuna” nircami. 18 Chai qꞌuipaca Secretario Safán runaca reymanca: “Sacerdote Hilquiasmi cai librota cun” nishpami reypaj ñaupajpi liyi callarirca.
19 Reyca Leypi nishcacunata uyashcahuanmi paipaj churanata lliquirirca. 20 Chaimi reyca Hilquiasman, Safanpaj churi Ahicamman, Miqueaspaj churi Abdonman, secretario Safanman, reyta sirvij Asayaman caita mandarca: 21 “Richij, cancuna japishca libropi ima nishcata ñucamantapish, Israelpi, Judapi causajcunamantapish Jehová Diosta tapugrichij. Ñucanchij ñaupa yayacunaca Jehová Dios nishcacunataca mana cazushcacunachu. Chai libropi tucui imalla quillcashcacunatapish mana pajtachishcacunachu. Chaimantami Jehová Diosca yallitaj pꞌiñarishpa ñucanchijtaca llaquichinga” nircami.
22 Chaimi Hilquiasca rey cachashca runacunahuan profeta Huldá huarmita ricunaman rirca. Huldá huarmica Salumpaj huarmimi carca. Salumca Ticvapaj churimi carca. Ticvá runaca Harhaspaj churimi carca. Salumca shuj cuartopimi ropacunata cuidaj carca. Profeta Huldá huarmica Jerusalenpi saquirij Mushuj Barriopimi causaj carca. Paicunaca chaipimi Huldá huarmihuan parlanacurcacuna. 23 Huldá huarmica paicunamanca: “Israelitacunapaj Jehová Diosca cashnami nin: ‘Ñucata ricunaman cachaj runamanca cashna nichij: 24 “Caitami Jehová Diosca nin: ‘Cai llajtatapish tucuchishami. Chaipi causajcunatapish castigashami. Judá llajtamanta reypaj ñaupajpi liyishca libropi tiyacuj tucui maldicioncunatapishmi pajtachisha. 25 Cancunaca ñucatami saquishcanguichij. Shujtaj dioscunamanpish sacrificiocunata rupachishpami cushnichicunguichij. Chashnami cancunapaj tucui ruraicunahuan ñucata yallitaj pꞌiñachicunguichij. Chaimantami cai lugarhuan yallitaj pꞌiñarishpa nina sindirij shina pꞌiñarinataca manataj saquisha’ ninmi” ninguichij. 26 Pero Jehová Diosta tapunaman cachaj Judá llajtamanta reymanca cashna nichij: “Israelitacunapaj Jehová Diosca cashnami nin: ‘Canca chai quillcashcacunata uyashcahuanmi 27 cambaj shungupi llaquirircangui. Cai lugarmanta, caipi causajcunamanta imata nishcata uyashpaca cambaj Diospaj ñaupajpimi humillarircangui. Ñuca ñaupajpi humillarishpami cambaj ropatapish lliquirircangui. Ñuca ñaupajpipishmi huacarcangui. Chaimi ñucaca canta uyarcani. Ñuca, Jehová Diosllatajmi chashna nini. 28 Chaimantami cai lugartapish, chaipi causaj gentecunatapish ñuca llaquichigrishcataca cambaj ñahuicunaca mana ricunga. Chai llaquicunata mana ricushpami canca tranquilo pambashca cangui. Cantaca cambaj ñaupa yayacunahuanmi tandachisha’ ninmi”’” nircami.
Chaimi paicunaca Dios ima nishcataca reyman huillanaman rircacuna. 29 Reyca chaita uyashpami Judamanta, Jerusalenmanta tucui pushajcunata* tandanacuchun mandarca. 30 Chai qꞌuipaca rey Josiasca Jehová Diospaj huasimanmi Judá runacunahuan, Jerusalenpi causajcunahuan, sacerdotecunahuan, levitacunahuan huichiyarca. Tucui gentecunami jatuncunapish, uchillacunapish huichiyarcacuna. Dioshuan ari ninacushca librota Jehová Diospaj huasipi japishcatami Josiasca liyirca. 31 Reyca gentecunapaj ñaupajpi shayarishpami Jehová Diospaj ñaupajpi shuj ari ninacuita rurarca. Chaipimi paica Jehová Diosta sirvingapajpish, mandashcacunatapish, advertenciacunatapish, leycunatapish tucui shunguhuan, tucui almahuan* cazungapaj ari nirca. Shinallataj Dioshuan ari ninacushcata charij libropi nishcatapish pajtachingapajmi ari nirca. 32 Ashtahuanpish paica Jerusalenpi, Benjaminpi tucui cajcunatami ari nishcacunata pajtachichun animarca. Tucui Jerusalenpi causajcunaca paicunapaj ñaupa yayacunapaj Dioshuan ari ninacushca shinami rurai callarircacuna. 33 Josiasca israelitacuna maillapi causashca allpacunamantami tucui millanana rurashca dioscunata anchuchirca. Israelpipish tucuicuna paicunapaj Jehová Diosta sirvichunmi ayudarca. Josías causacujpirajca paicunapaj ñaupa yayacunapaj Jehová Diosta sirvinataca mana saquircacunachu.