1 Reyes
9 Salomonca Jehová Diospaj huasitapish, reypaj huasitapish,* pai tucui imalla rurasha nishcatapishmi tucuchirca. Chaicunata tucuchijpimi 2 Jehová Diosca Gabaonpi ricurishca shinallataj Salomonmanca caihuanca ishqui cutin ricurirca. 3 Chaipimi Jehová Diosca cashna nirca: “Ñuca ñaupajpi can mañashcata, can rogarishcataca uyashcanimi. Can shayachishca cai huasitaca ñuca shutita huiñaipaj chaipi jatunyachichunmi agllashcani. Cai huasitaca siempremi ricusha, siempremi cuidasha. 4 Cambaj yaya David rurashca shinallataj canpish tucui shunguhuan, cashcata rurashpa ñuca ñancunapi catijpi, tucui ñuca mandashcata rurajpi, ñuca leycunata, ñuca imallata rurachun nishcacunata cazujpica 5 cambaj yaya Davidman nishca shinallatajmi ñucaca Israel llajtata can mandangapaj tiyarinataca huiñaipaj churasha. Paimanca: ‘Cambaj huahua huahuacunamanta shujmi Israel llajtata mandangapaj tiyarinapica siempre tiyaringa’ nircanimi. 6 Pero cancunapish, cancunapaj huahuacunapish ñucata sirvinata saquishpa, ñuca cushca mandamientocunata, leycunata mana cazushpa, shujtaj dioscunata sirvishpa paicunapaj ñaupajpi cungurijpica 7 israelitacunataca ñuca cushca allpamantami llujshichishpa cachasha. Ñuca shutita jatunyachingapaj shayachishca huasitapish shitashpami saquisha. Tucui llajtacunamanta gentecunami israelitacunataca pꞌiñashpa paicunamanta burlaringacuna. 8 Cai huasica rumi montonllami saquiringa. Cai huasi cꞌuchuta pasajcunaca tucuicunami mancharishpa ricushpa saquiringacuna. Paicunaca burlarishpami:* ‘¿Jehová Diosca imamantashi cai allpatapish, cai huasitapish chashna rurarca?’ nishpa tapungacuna. 9 Chaipica: ‘Paicunaca paicunapaj ñaupa yayacunata Egipto llajtamanta llujshichij paicunapaj Jehová Diostami saquircacuna. Shujtaj dioscunata catishpami paicunapaj ñaupajpi cungurishpa sirvircacuna. Chaimantami Jehová Diosca tucui cai llaquicunata cachashca’ nishpami cutichingacuna” nircami.
10 Rey Salomonca ishquindij huasicunatami shayachirca. Jehová Diospaj huasitapish, reypaj huasitapish 20 huatacunapimi tucuita shayachirca. 11 Tiro llajtata mandaj rey Hiramca rey Salomonmanca cedro caspicunata, enebro caspicunata, pai munashca tucui orotami cushca carca. Chaimantami rey Salomonca Galilea allpapi saquirij 20 llajtacunata Hiramman curca. 12 Chaimi Hiramca Tiromanta llujshishpa Salomón cushca llajtacunata ricunaman rirca. Pero chai llajtacunataca mana munarcachu.* 13 Paica: “¿Ñuca huauquilla, cai llajtacunaca imapajtaj valinyari?” nircami. Chaimantami cunan punllacama chai llajtacunataca Cabul Allpa* nishpa rijsincuna. 14 Hiramca rey Salomonmanca 120 talento* orotami cacharca.
15 Rey Salomonca Jehová Diospaj huasita, paipaj propio huasita, Miló* shuti lomata, Jerusalén pircacunata, Hazorta, Meguidota, Guezertapish shayachingapajmi sinchi trabajocunata rurachun cayashcacunata tandachirca. 16 (Egipto llajtata mandaj rey faraonca Guezerman huichiyashpami chai llajtata mishashpa japishca carca. Chai llajtata rupachishpami chaipi causaj cananeocunatapish huañuchishca carca. Chai llajtataca paipaj ushushimanmi shuj regalota shina curca.* Paipaj ushushica Salomonpaj huarmimi carca). 17 Salomonca Guézer llajtata, Bet-Horón Bajo llajtatami cutin shayachirca. 18 Shinallataj Baalat llajtata, chaquishca pambapi saquirij Tamar llajtatami cutin shayachirca. 19 Ashtahuanpish Salomonpaj granocunata huaquichina tucui llajtacunata, carretacunata shayachina llajtacunata, caballopi purijcunapaj llajtacunatami cutin shayachirca. Salomonca pai tucui shayachisha nishcatami Jerusalén llajtapi, Líbano llajtapi, pai mandacushca tucui llajtacunapi cutin shayachirca. 20 Chai llajtacunapica Israel pueblomanta mana caj huaquin gentecunami causacurcarajcuna. Paicunaca amorreocuna, hititacuna, perizitacuna, heveocuna, jebuseocunami carca. 21 Paicunapaj huahua huahuacunatami israelitacunaca mana tucuchi tucushcacuna carca. Paicunatami Salomonca esclavocuna shina sinchi trabajocunata rurachun tandachirca. Paicunaca cunancamami esclavocuna can. 22 Pero Salomonca israelitacunataca ni maijanta mana esclavota rurarcachu. Ashtahuanpish paicunaca paipaj macanacujcuna, paita sirvijcuna, mandajcuna, paita sirvij soldadocunami carca. Shinallataj paipaj carretacunata manejajcunata pushajcuna, paipaj caballocunapi purijcunata pushajcunami carca. 23 Salomonca pai ruracushca obrata ricuchunca 550 pushajcunamanmi mingarca. Paicunaca chai obrapi trabajaj gentecunata ricujcunami carca.
24 Faraonpaj ushushica Davidpaj Llajtamantami paipaj propio huasiman huichiyarca. Chai huasitaca Salomonmi rurashca carca. Chai qꞌuipaca Salomonca Miló shuti lomatami rurarca.
25 Salomonca huatapica quimsa cutinmi Jehová Diospaj rurashca altarpica rupachishca sacrificiocunata, Dioshuan alli tucungapaj sacrificiocunata cuj carca. Shinallataj Jehová Diospaj ñaupajpi caj altar jahuapimi sacrificiota rupachishpa cushnichij carca. Chashnami Diospaj huasita shayachinata tucuchirca.
26 Rey Salomonca Puca mama cucha uripi saquirij Elot cꞌuchullapi caj Ezión-Gueberpimi achca barcocunata* rurarca. Chaica Edom allpapimi carca. 27 Hiramca rey Salomonpaj sirvijcunahuan chai achca barcocunapi trabajachunmi paipaj propio sirvijcunata cacharca. Hiramta sirvijcunaca barcopi trabajangapaj experienciata charij runacunami carca. 28 Paicunaca Ofirman rishpami 420 talento orota apamushpa rey Salomonman entregarcacuna.