1 Reyes
14 Chai tiempopica Jeroboanpaj churi Abiasmi ungurca. 2 Chaimi Jeroboanca paipaj huarmitaca cashna nirca: “Jeroboanpaj huarmi cashcata ama cuentata cuchunca shujtaj laya ropata churarishpa Siloman ripai. Profeta Ahiyaca chaipimi can. Paimi ñucataca cai pueblota mandangapaj rey tucuna cashcata huillarca. 3 Chunga tandacunata, mishqui tandacunata, shuj tarro mielta apashpa paita ricunaman ri. Paimi huahua ima tucuna cashcata huillanga” nircami.
4 Jeroboanpaj huarmica pai nishcatami rurarca. Paica Siloman rishpami profeta Ahiyapaj huasiman chayarca. Ahiyaca yuyajlla cashcamantami paipaj ñahuicuna amsayajpi imata mana ricui tucurca.
5 Jehová Diosca Ahiyamanca: “Jeroboanpaj huarmica paipaj churi ungushca cajpimi canta tapunaman chaita shamucun. Ñucami ima nina cashcata huillasha. Pai chayamushpaca shujtaj laya ropahuanmi canga” nishpami huillashca carca.
6 Ña huasi pungupi chai huarmipaj chaquicuna sarujta uyashpami Ahiyaca: “Jeroboanpaj huarmi, yaicui. ¿Imamantataj shujtaj laya ropata churarishca cangui? Diosmi canman shuj llaquichij huillaita huillachun ñucaman mingashca. 7 Ri, Jeroboanta cashna nigri: ‘Israelitacunapaj Jehová Diosca caitami nin: “Ñuca pueblo Israelpuramantami paicunata pushaj cachun canta agllarcani. 8 Davidpaj huahua huahuacuna mandana gobiernota quichushpami canman curcani. Pero canca ñucata sirvij David shinaca mana cashcanguichu. Paica ñuca mandamientocunata cazushpa, ñuca ñaupajpi allicunallata rurashpami ñucataca tucui shunguhuan sirvirca. 9 Canca cambaj ñaupa mandaj reycunatapish yallimi mana allita rurashcangui. Shujtaj diostami rurarcangui. Fierrota yacuyachishpa dioscunata rurashpami ñucata pꞌiñachishcangui. Canca ñucatami saquishcangui. 10 ¡Chaimantami Jeroboanpaj huahua huahuacunamanca jatun llaquita cachasha! ¡Jeroboanpaj familiamanta tucui cꞌaricunatami mana difindiri tucujcunatapish, debilcunatapish Israelmanta tucui tucuchisha! ¡Majadata pꞌichaj shinami Jeroboanpaj huahua huahuacunataca pꞌichashpa tucuita anchuchisha! 11 Jeroboanpaj familiamanta cajcuna llajta ucupi huañujpica allcucunami micunga. Cutin campopi huañujcunataca jahuata volaj* animalcunami micunga. Jehová Diosmi chashna nishca” ninmi’ nigri.
12 Cunanca cambaj huasiman rilla. Cambaj llajtapi chaquita churajpica huahuaca chai ratomi huañunga. 13 Tucui israelitacunami paimanta huacashpa pambangacuna. Israelitacunapaj Jehová Diosca Jeroboanpaj huahua huahuacunamantaca paillapimi allita ruracushcata ricushca. Chaimantami Jeroboanpaj familiamantaca pailla shuj pambana jutcupi pambashca canga. 14 Israelitacunata mandaj cachunca Jehová Diosmi shuj reyta churanga. Chai punlla pajtajpica paimi Jeroboanpaj huahua huahuacunataca tucuchinga. Chai punllaca ñami pajtashca. 15 Jehová Diosca shuj carrizota yacu caiman chaiman cuyuchij shinami Israeltaca cuyuchinga. Paipaj ñaupa yayacunaman cushca allpamantami Israeltaca sapimanta anchuchishpa Éufrates jatun yacu caishuj ladota caita chaita cachanga. Adorana postecunata* rurashpa Jehová Diosta pꞌiñachishcamantami chashna ruranga. 16 Jeroboán juchata rurashpa, israelitacunatapish juchapi urmachishcamantami israelitacunataca shitashpa saquinga” nircami.
17 Chai qꞌuipaca Jeroboanpaj huarmica chaimanta rishpami Tirzaman chayarca. Paipaj huasi punguman chayajpica huahuaca huañurcallami. 18 Chai huañushca huahuata pambajpica tucui israelitacunami paimanta huacarcacuna. Profeta Ahiyaman Jehová Dios huillachishca shinami chai shimicunaca pajtarirca.
19 Jeroboanpaj causaipish, pai ima shina macanacushcapish, pai mandashcapish Israel llajtamanta reycunapaj causaimanta parlaj libropimi quillcashca tiyacun. 20 Jeroboanca 22 huatacunatami mandarca. Chai qꞌuipaca huañurcami.* Chaimantaca paipaj churi Nadabmi catij rey tucurca.
21 Cutin Salomonpaj churi Rehoboamca Judá llajtapimi rey tucushca carca. Rehoboamca 41 huatacunata charishpami rey tucurca. Paica Jerusalenpica 17 huatacunatami mandarca. Chai llajtatami Jehová Diosca paipaj shutita chaipi jatunyachichun tucui israelitacunapaj familiacunamanta agllashca carca. Rehoboampaj mamaca Ammón llajtamanta Naamá shutimi carca. 22 Judá llajtamanta gentecunaca Jehová Diospaj ñaupajpica mana allicunatami rurajcuna carca. Paicunapaj ñaupa yayacunatapish yallimi juchata rurashpa Diosta pꞌiñachircacuna. 23 Shinallataj tucui jatun lomacunapi, tucui pꞌangasapa yuracuna ucupimi adorana lugarcunata,* adorana pilarcunata, adorana postecunata rurashpa catircacuna. 24 Shinallataj chai llajtapica templopi huainayaj cꞌaricunami* tiyarca. Paicunaca israelitacunapaj ñaupajmanta Jehová Dios llujshichishpa cachashca shujtaj llajta gentecuna shinami millanana ruraicunata rurarcacuna.
25 Rey Rehoboam pichca huatacunata mandacujpimi Egiptomanta rey Sisacca Jerusalenta llaquichingapaj huichiyarca. 26 Jehová Diospaj huasimantapish, reypaj huasimantapishmi* valishca cosascunata aparca. Tucuitami aparca. Salomón rurashca oro escudocunatapishmi tucuita aparca. 27 Chaimi rey Rehoboamca oro escudocunapaj randica cobre escudocunata rurarca. Chaicunataca guardiacunata* mandajcuna cuidachunmi churarca, paicunaca reypaj huasi pungupi cuidajcunami carca. 28 Jehová Diospaj huasiman rey cada shamushcatami guardiacunaca escudocunata apashpa paihuan rijcuna carca. Chai qꞌuipaca guardiacunapaj cuartopimi cutinllataj huaquichijcuna carca.
29 Rehoboampaj causaipish, pai tucui imalla rurashcapish Judá llajtamanta reycunapaj causaimanta parlaj libropimi quillcashca tiyacun. 30 Rehoboamhuan Jeroboanhuanca siempremi macanacujcuna carca. 31 Qꞌuipaca Rehoboamca huañurcami. Paitaca paipaj ñaupa yayacunahuanmi Davidpaj Llajtapi pambarcacuna. Paipaj mamaca Ammón llajtamanta Naamá shutimi carca. Chaimantaca Rehoboampaj churi Abiyammi* catij rey tucurca.