Marcos

14 Ishqui punlla qꞌuipallami Pascua fiestapish, Levadura illaj tandata micuna fiestapish* callarigrirca. Chaipimi sacerdotecunata mandajcunapish, mandashcacunata quillcajcunapish* Jesusta juchachishpa huañuchingapaj ima shina japinata mashcacurcacuna. 2 Ashtahuanpish paicunaca: “Fiesta punllapica ama japishunchijchu. Ñataj gentecuna ñucanchij contra jatarishpa bullata ruranman” nircacunami.

3 Jesusca Betania llajtapi cashpaca lepra ungüimanta alliyashca Simonpaj huasipimi micucurca. Chaipimi shuj huarmica alabastro* botellapi achca valij, mishquijllata ashnacuj nardo* aceiteta apamurca. Cai aceiteca mana imahuan chagrushcachu carca. Chai huarmi cꞌuchuyashpaca botellata pꞌaquishpami Jesuspaj uma jahuapi aceitetaca churai callarirca. 4 Chaita ricushpami huaquincunaca pꞌiñarishpa paicunapura cashna ninacurcacuna: “¿Ima nishpataj cai mishquijllata ashnacuj aceitetaca yangamanta jichanyari? 5 Cai mishquijllata ashnacuj aceitetaca 300 denario* yalli cullquipi cꞌatushpa, chai cullquita pobrecunaman cushpachari alli canman carca” nircacuna. Chaimantami chai huarmihuanca achcata pꞌiñarircacuna. 6 Chaita ricushpami Jesusca cashna nirca: “Saquichij, ¿ima nishpataj cai huarmimantaca chashna rimanguichij? Paica ñucapajmi allita rurashca. 7 Pobrecunaca siempremi cancunahuan canga. Paicunataca ima horapish ayudai tucunguichijllami. Ashtahuanpish ñucaca mana siemprechu cancunahuan casha. 8 Cai huarmica pai imata rurai tucushcatami rurashca. Mishquijllata ashnacuj aceiteta ñuca cuerpopi churashpaca ñuca huañujpi pambangapajmi ña allichishca. 9 Cancunamanca mana llullanichu. Tucui cai pachapi, maipi cashpapish alli huillaicunata huillacushpaca, cai huarmi imata rurashcatapishmi huillangacuna. Chashnami cai huarmi imata rurashcataca yuyaringacuna” nircami.

10 Judas Iscarioteca, Jesusta entregangapajmi sacerdotecunata mandajcunata ricunaman rirca. Paica 12 apostolcunapuramantami carca. 11 Judas huillashcata uyashpami sacerdotecunata mandajcunaca achcata cushicushpa cullquita cungapaj saquirircacuna. Chai punllamantami Judasca contracunapaj maquipi Jesusta ima shina entreganata mashcacurca.

12 Levadura illaj tandata micuna fiesta callari punllapica, Pascuapi huañuchina animaltami huañuchijcuna carca. Chaipimi Jesusta catijcuna paipajman cꞌuchuyashpaca: “¿Pascua micuita micungapajca maipitaj allichichun munangui?” nircacuna. 13 Shina nijpimi Jesusca paipaj ishqui catijcunataca cashna nishpa cacharca: “Jerusalén llajtaman richij. Chaipimi puñupi yacuta apashpa ricuj shuj runa cancunahuan tupanga. Paihuan tupashpaca paita catishpa ringuichijlla. 14 Chai runa maijan huasiman yaicujpipish, huasiyuj dueñotaca: ‘Yachachijca: “Ñucata catijcunahuan Pascua micuita micungapajca, ¿maipitaj invitashcacunapaj cuartoca?” ninmi’ ninguichij. 15 Chashna nijpimi paica jahua pisopi shuj jatun cuarto ña allichishca tiyacujta ricuchinga. Chaipi Pascua micuita ñucanchijpaj allichigrichij” nircami. 16 Chaimi Jesusta catijcunaca Jerusalenman rircacuna. Paicuna chaiman chayashpaca tucuitami Jesús nishca shinallataj japircacuna. Chaipimi Pascua micuita allichircacuna.

17 Ña tutayamucujpimi Jesusca paipaj 12 apostolcunandij chaiman chayarcacuna. 18 Mesapi micushpa tiyacushpami Jesusca: “Cancunamanca mana llullanichu. Cancunamanta shujmi ñucataca contracunaman entreganga. Caipi ñucahuan micucujcunamanta shujmi chashna entreganga” nirca. 19 Chashna nijta uyashpaca yallitaj llaquirishpami caishuj chaishuj: “¿Ñucachu cani?” nishpa tapurcacuna. 20 Chaimi Jesusca: “12 apostolcunapuramanta ñucahuan platopi maquita churajmi ñucataca contracunaman entreganga. 21 Runapaj Churica Quillcachishcapi paimanta nishca shinami huañunga. Shinapish Runapaj Churita contracunaman entregaj runaca ¡aij imachari tucunga! Paica mana huacharishca cashpachari alli canman carca” nircami.

22 Chashna micucushpami Jesusca tandata japishpa Diosta mañarca. Chai huashami tandata chaupishpa paita catijcunaman cushpaca: “Japichij, micuichij caica ñuca cuerpotami ricuchin” nirca. 23 Copata japishpapish Diosta pagui nishpami paicunaman curca. Chai copamantami tucuicuna ubyarca. 24 Shinallataj Jesusca: “Caica ñuca yahuartami ricuchin. ‘Ñuca yahuarmi ari ninacushcata’ callarichinga. Chai yahuarca achca gentecunata quishpichingapajmi jichashca canga. 25 Cancunamanca mana llullanichu. Diospaj Gobiernopi mushuj vinota cancunahuan ubyangacama cunanmantapachaca cai vinotaca ña mana ashtahuan ubyashachu” nircami. 26 Chai qꞌuipaca Diosta alabangapajmi cantocunata* cantarcacuna. Chai huashami olivos yuracuna tiyan urcuman rircacuna.

27 Chaipimi Jesusca paicunamanca cashna nirca: “Tucuicunami ñucataca saquishpa ringuichij. Quillcachishcapica: ‘Michijtaca huañuchishami. Chaipimi ovejacunaca caita chaita ringacuna’ ninmi. 28 Shinapish Dios ñucata causachishca qꞌuipaca, cancunata ñaupashpami Galileaman risha” nircami. 29 Chashna nijpimi Pedroca. “Tucuicuna canta saquishpa rijpipish ñucaca manataj saquishachu” nirca. 30 Chaimi Jesusca: “Canmanca mana llullanichu. Cunan tutallatajmi gallo manaraj ishqui cutin cantajpi ñucataca quimsa cutin mana rijsinichu ningui” nirca. 31 Chashna nijpipish Pedroca: “Canhuan huañuna cashpapish, cantaca mana rijsinichu nishpaca manataj nishachu” nircami. Caishujcunapish chashnallatajmi nircacuna.

32 Chai qꞌuipaca Getsemaní nishca huertamanmi chayarcacuna. Chaipimi Jesusca paita catijcunataca: “Diosta ñuca mañangacama, cancunaca caipi tiyacuichij” nirca. 33 Chashna nishca qꞌuipami Pedrota, Santiagota, Juantapish pushashpa rirca. Paicunahuan ricushpami Jesusca shungupi jatunta llaquiri callarirca. 34 Chaimi paica: “Ñuca shungupica* jatunta llaquirishpami huañucuni. Cancunaca caipi saquirichij, rijcharishca caichij” nirca. 35 Paicunamanta ashata caruyashpaca pambapi cungurishpami ima shinamanta chai llaquita mana apana cajpica, paimanta chai llaquita anchuchichun nishpa Diosta mañai callarirca. 36 Paica: “Abba,* ñuca Yayitu cambajca tucui imapish jahuallami. Cai copata ñucamanta anchuchihuai. Shinapish ñuca munashca shinaca ama rurapaichu, ashtahuanpish can munashca shina rurapai” nircami. 37 Jesusca paita catijcunapajman tigramushpaca paicuna dormicujtami japirca. Chaimi Pedrotaca: “Simón, ¿imamantataj dormicungui? ¿Manachu shuj ratollatapish rijcharishca saquiri tucurcangui? 38 Rijcharishca caichij. Juchapi ama urmangapajpish Diosta mañaraichij. Runaca allita ruranatami munan. Shinapish paipaj aichaca shaicurinllami”* nirca. 39 Chai qꞌuipaca cutinllatajmi Diosta mañanaman rirca. Chaipica ñaupaman ima shina mañashca shinallatajmi mañarca. 40 Jesús cutin tigramushpaca paita catijcuna dormicujtami japirca. Paicunaca yallitaj dorminaihuan huañucushcamantami dormirircacuna. Chaimantami paicunaca imata mana ni tucurcacuna. 41 Caihuanca quimsa cutin tigramushpami Jesusca paicunataca cashna nirca: “¡Cunanca dormina, samarina horasca mana canchu! ¡Ña ama dormichijchu! ¡Ricuichij! Runapaj Churita juchayujcunapaj maquipi entregana horasca ñami chayamushca. 42 Jatarichij, caimanta jacuchij. Ricuichijyari, ñucata entregagrijca ñamari chayamucun” nircami.

43 Jesús chashna nicujpirajmi 12 apostolcunamanta caj Judas runa chayarca. Paihuanca achca gentecunami espadacunahuan, caspicunahuanpish shamurcacuna. Chai gentecunataca sacerdotecunata mandajcuna, mandashcacunata quillcajcuna, autoridadcunapishmi* cachashcacuna carca. 44 Jesusta contracunapaj maquipi entregaj Judasca: “Maijantami ñuca muchani, chaimi canga. Paita japishpaca alli charirashpami pushana canguichij” nishpami señalta cushca carca. 45 Judas chayamushpaca Jesuspajman cꞌuchuyashcahuanmi: “¡Yachachij!”* nishpa mucharca. 46 Chaimi paicunaca Jesusta japishpa aparcacuna. 47 Ashtahuanpish chaipi cajcunamanta shujca paipaj espadata llujshichishpami sacerdotecunata jatun mandajpaj sirvijtaca rinrinta pꞌitirca. 48 Jesusca paita japinaman shamujcunataca cashnami nirca: “¿Shuhuata shinachu ñucataca espadacunahuan, caspicunahuan japinaman shamushcanguichij? 49 Ñucaca Diospaj huasipica punllantami yachachishpa cancunahuan carcani. ¿Imamantataj chaipica mana japircanguichij? Shinapish Dios quillcachishcacuna pajtarichunmi caica cashna tucushca” nircami.

50 Jesusta catijcunaca paita chaipi saquishpami tucuicuna miticushpa rircacuna. 51 Ashtahuanpish shuj jovenca alli lino churanata churarishcallami Jesusta caticurca. Paitapishmi japishun nircacuna. 52 Chaimantami chai jovenca lino churanata shitashcahuan lluchulla* callpashpa rirca.

53 Jesusta japijcunaca sacerdotecunata jatun mandajpajmanmi paitaca pusharcacuna. Chaipica sacerdotecunata mandajcunapish, autoridadcunapish,* mandashcacunata quillcajcunapishmi tucuicuna tandanacushca carca. 54 Pedroca caru carullami sacerdotecunata jatun mandajpaj huasi patioman chayangacama catishpa rirca. Chaiman chayashpaca huasipi sirvijcunahuanmi nina cꞌuchullapi cunungapaj tiyarirca. 55 Sacerdotecunata mandajcunapish, tucui mandaj juezcunapish* Jesusta huañuchingapajmi maijanpish paimanta llullashpa huillachun mashcacurcacuna. Shinapish paita juchachingapajca imata mana japircacunachu. 56 Achcacunami llullashpa Jesuspaj contra huillarcacuna. Chashna huillashpapish cada unomi shujtaj shujtaj yuyaita nircacuna. 57 Maijancunacarin shayarishpami Jesuspaj contra llullashpa cashna nircacuna: 58 “‘Maquillahuan rurashca Diospaj huasita urmachishpaca, maquihuan mana rurashca shujtaj huasitaca quimsa punllacunallapimi shayachisha’ nijtami ñucanchijca uyarcanchij” nircacunami. 59 Caimanta huillashpapish paicunaca mana shuj yuyaillata nircacunachu.

60 Chaimi sacerdotecunata jatun mandajca paicunapaj chaupipi shayarishpaca: “¿Manachu imata ningui? ¿Canmanta cai runacuna imata juchachicujtaca manachu uyangui?” nishpa tapurca. 61 Chashna tapujpipish Jesusca mana imata nishpami upalla saquirirca. Chaimi sacerdotecunata jatun mandaj cutinllataj tapushpaca: “¿Canca Jucha illaj Diospaj Churi Cristochu cangui?” nirca. 62 Chaipimi Jesús cutichishpaca: “Ari, ñucami cani. Cancunaca Runapaj Churitaca poderta charij Diospaj alli ladopi tiyacujta, jahua pacha pꞌuyupi shamucujtami ricunguichij” nirca. 63 Chaita uyashpami sacerdotecunata jatun mandajca paipaj churanata lliquishpa cashna nirca: “¿Imapajtaj shujtaj testigocunataca minishtinchijyari? 64 Diosta yangamanta cꞌamishcataca cancunallatajmi uyashcanguichij. Chaimantaca ¿imatataj yuyanguichij?” nirca. Shina nijpimi tucuicuna: “Cai runaca huañunatajmi can” nircacuna. 65 Chashna nishpami maijancunaca chꞌucashpa, ñahuita tapashpa huajtarcacuna. Shinallataj paicunaca: “Profeta cashcata ricuchiyari, ¿pitaj cantaca huajtarca? ¡Huillai!” nircacunami. Ñahuipi huajtashca qꞌuipami carcelpi churaj runacunaca Jesusta pushashpa rircacuna.

66 Huasi patiopi Pedro cajpimi sacerdotecunata jatun mandajta sirvijcunapuramanta shuj huarmi shamurca. 67 Chai huarmica ninapi Pedro cunucujta ricushpami paita ricurashpaca: “Canpishmi Nazaretmanta chai Jesushuan purij carcangui” nirca. 68 Shina nijpimi Pedroca: “Paitaca manataj rijsinichu, imatapishchari nicungui, mana intindinichu” nirca. Chashna nishpaca huasi canlla pungumanmi llujshirca. 69 Chai sirvij huarmica Pedrota ricushpaca cutinllatajmi chaipi cajcunamanca: “Cai runapish paicunapuramantami can” nirca. 70 Chashna nijpipish paica cutinmi manataj rijsinichu nirca. Chai qꞌuipallami chaipi cajcunaca cutin Pedrotaca: “Canpish paicunapurallatajmi cangui. Galilea llajtamantami cangui” nircacuna. 71 Shina nijpimi Pedroca sinchita rimashpa: “Mana llullacunichu. Ñuca llullacujpica Dios llaquichichun. ¡Cancuna nicushca runataca manataj rijsinichu!” nirca. 72 Chashna nicujpimi ñapish shuj galloca caihuanca ishqui cutin cantarca. Chaipimi Pedroca Jesús imata nishcata yuyarirca. Jesusca: “Canca shuj gallo manaraj ishqui cutin cantajpimi ñucataca quimsa cutin mana rijsinichu ningui” nishca carca. Chaimantami Pedroca paipaj shungupi yallitaj llaquirishpa huacai callarirca.