1 Timoteo
5 Mayorlla cꞌaricunataca ama sinchita rimangui. Chaipaj randica shuj yayata shina cunangui. Ashtahuan joven cꞌaricunatapish huauquicunata shina cunangui. 2 Ñaupa huiñai huarmicunataca mamacunata shina cunangui. Cutin qꞌuipa huiñai huarmicunataca panicunata shina chuya shunguhuan cunangui.
3 Sapalla caj viudacunatapish* respetangui, cuidangui. 4 Shinapish maijan viuda huarmi huahuacunayuj, nietocunayuj cajpica paicunami puntapica paicunapaj familiata cuidana can. Chashnami Diosta tucui shunguhuan adoracushcata ricuchingacuna. Dibita pagacushca shinami paicunapaj yaya mamacunaman, paicunapaj abuelocunamanpish ima cuna cashcata cuna can. Chaita ruranami Diospaj ñaupajpica alli can. 5 Imata mana charij, sapalla caj viudaca Diospimi shunguta churan. Paica tutapish punllapish Diosta rogarishpa mañanataca mana saquinchu. 6 Shinapish aicha munaillata rurashpa causaj viudaca causacushpapish huañushca shinami can. 7 Paicunata* pi ama juchachichunca cai mandashcacunata yachachishpa cati. 8 Maijanpish paipaj quiquin familiata, ashtahuantajca paipaj quiquin huasipi causajcunata mana mantinijca crinatami huashaman saquishca. Paica Diospi mana crij runatapish yalli peormi can.
9 Viuda huarmipaj shutitaca shujlla cusapaj huarmi cashca cajpi, 60 yalli huatacunata charijllapimi listapica churana cangui. 10 Paica alli ruraicunata rurashcamanta alli nishcami cana can. Huahuacunata huiñachij, shujtajcunata cꞌuyaihuan chasquij, jucha illajcunapaj chaquicunata maillaj, llaquipi cajcunata ayudaj, tucui laya alli ruraicunata rurajmi cana can.
11 Cutin, joven viudacunapaj shuticunataca listapica ama churangui. Paicunaca Cristota sirvinapaj randica shuj cꞌarihuan canata munashpami cazaranata yuyarincuna. 12 Paicunaca puntaman ari nishcata* mana pajtachishcamantami juzgashca cangacuna. 13 Shinallataj qꞌuilla tucushpami huasin huasin rina costumbreta charincuna. Mana qꞌuillacunallachu tucuncuna, ashtahuanpish shujtajcunamanta yangata parlanata, shujtajcunapaj causaipi satirinata,* ima mana parlana cashcata parlanatami yachancuna. 14 Chaimantami joven viuda huarmicunataca cazarachun, huahuacunata charichun, paicunapaj huasita cuidachun munani. Chashnami contracunaca ñucanchijta mana yanga rimangacuna. 15 Maijan viudacunacarin alli ñanta saquishpami Satanasta catishcacuna. 16 Jesusta catij huarmi paipaj familiapurapi shuj viuda huarmita charishpaca, congregacionpaj ama shuj carga shina cachunmi, paillataj chai viuda huarmitaca ayudana can. Chashnami congregacionca imata mana charij, sapalla caj viudacunata* ayudai tucunga.
17 Congregacionta alli pushaj ancianocunaca shungumantami respetashca cana can. Paicunaca Diospaj shimita parlashpa, yachachishpa sinchita trabajashcamantami chashna respetashca cana can. 18 Dios quillcachishcapica: “Granota trillacushpaca huagrapi bozalta ama churangui” ninmi. Shinallataj: “Trabajaj runaca pagota japintajmi” ninmi. 19 Pipish shuj ancianopaj* contra imata juchachijpica ama uyangui. Shinapish ishqui o quimsa chashna juchachijpica uyanguilla. 20 Juchata rurashpa catijcunataca tucuicunapaj ñaupajpi sinchita cunangui. Chashna rurajpimi caishujcunapish juchata ruranata manchangacuna. 21 Diospaj ñaupajpi, Cristo Jesuspaj ñaupajpi, agllashca angelcunapaj ñaupajpimi manaraj imata rurashpa alli ricurashpa, shujllaman ama tucushpa cai mandashcacunata pajtachishpa catichun mandani.
22 Maijan runata nombrangapajca cambaj maquicunata ama nunca paipaj jahuapi rato churangui. Shujtajcunapaj juchapipish ama chagruringui. Chuya causaita charishpa catingui.
23 Huijsa nanaihuan cashcamanta, cada rato ungujlla cashcamantaca ama yacullata ubyaichu. Ashtahuanpish asha vinota ubyai.
24 Huaquin runacunapaj juchacunaca tucuicunapaj ñaupajpi ricunallami. Chaimi paicunataca chai rato juzgancuna. Cutin shujtaj runacunapaj juchacunaca qꞌuipa punllacunami yachaj chayarin. 25 Chashnallatajmi alli ruraicunaca tucuicunapaj ñaupajpi ricunalla can. Mana ricunalla alli ruraicunapish mana pacalla saquirinchu.