1 Crónicas
16 Davidca Diospaj Arcapajmi shuj carpa huasita allichishca carca. Chashnami Arcataca chai carpa huasiman yaicuchishpa chaipi churarcacuna. Diospaj ñaupajpipish rupachishca ofrendacunata, Dioshuan alli tucungapaj sacrificiocunatami curcacuna. 2 Davidca rupachishca ofrendacunata cushca qꞌuipa, Dioshuan alli tucungapaj sacrificiocunata cushca qꞌuipami gentecunataca Jehová Diospaj shutipi bendiciarca. 3 Shinallataj tucui israelitacunamanmi cada huarmiman, cada cꞌariman shuj redondolla tandata, palma yuramanta pꞌucushca frutahuan rurashca tortata, chaquishca uvacunahuan rurashca shuj tortatapish curca. 4 Davidca Jehová Diospaj Arca ñaupajpi sirvichunmi huaquin levitacunata agllarca. Paicunatami israelitacunapaj Jehová Diosta jatunyachichun,* pagui nichun, alabachunpish agllarca. 5 Asafca cantajcunata pushajmi carca. Cutin Zacariasca catij pushajmi carca. Cuerdata charij instrumentocunata, arpacunata tocajcunaca Jeiel, Semiramot, Jehiel, Matitías, Eliab, Benaya, Obed-Edom, Jeielpishmi carca. Asafca cimbalocunapimi tocaj carca. 6 Benaya, Jahaziel sacerdotecunapish Dioshuan ari ninacushca arca ñaupajpimi trompetacunata siempre tocajcuna carca.
7 Chai punllami Davidca Jehová Diosta pagui ningapaj punta cutin shuj cantota rurarca. Asafman, paipaj huauquicunamanpish ima shina cantanata yachachishpami Davidca cashna nirca:
8 “¡Jehová Diosta pagui nichijyari, paipaj shutita nishpa mañaichijyari,
pai imalla rurashcacunatapish gentecunaman huillaichijyari!
9 Cantaichijyari, cantashpa alabaichijyari,*
pai tucui sumaj rurashcacunamanta yuyaichijyari.*
10 Paipaj jucha illaj shutimanta tucui shunguhuan parlaichijyari.
Jehová Diosta mashcajcunapaj shungupish cushichishca cachun.
11 Jehová Diosta mashcaichijyari, paipaj fuerzata cuchun mañaichijyari.
Paipaj ayudataca siempre mashcashpa catichijyari.
12 Paipaj sumaj rurashcacunata yuyarichijyari,
paipaj milagrocunata, pai juzgashcacunatapish yuyarichijyari,
13 cancunaca Diosta sirvij Israelpaj huahua huahuacunami canguichij,
cancunaca Jacobpaj churicuna, paipaj agllashcacunami canguichij.
14 Paica ñucanchij Jehová Diosmari.
Pai imallata rurachun nishcacunaca tucui muyundij allpapimari can.
15 Pai rurashca ari ninacushcataca amataj cungarichijchu,
pai cusha nishcata siempre yuyarichijyari,
16 Abrahanhuan ari ninacushcata yuyarichijyari,
Isaac runahuan juramentota rurashcatapish yuyarichijyari,
17 chai juramentotaca leyta shinami Jacobpaj churarca,
Israelpaj ari ninacushcapish paicunapaj huahua huahuacunapajmi huiñaipaj canga.
18 Paica ‘Canaán allpacunatami cancunaman cusha. Chaica cancuna japina herenciami canga’ nircami.
19 Caitaca cancuna ashacunalla cajpimi chashna nirca,
ari, ashacunalla, shujtaj llajtapi causacujpimi chashna nirca.
20 Paicunaca llajtan llajtanmi purircacuna,
chꞌican chꞌican mandacun llajtacunapimi purircacuna.
21 Diosca paicunata pi llaquichichunca mana saquircachu.
Ashtahuanpish paicunamantami chai mandajcunataca sinchita rimarca.
22 Diosca: ‘Ñuca agllashcacunataca ama tuparinguichij,
ñuca profetacunatapish ima mana allitaca ama ruranguichij’ nircami.
23 ¡Tucui allpapi cajcuna Jehová Diosta cantaichijyari!
¡Pai ima shina quishpichishcatapish punllanta punllanta huillaichijyari!
24 Pai yallitaj jatun cashcata shujtaj llajtacunaman huillaichijyari,
pai sumaj rurashcacunata tucui pueblocunapurapi huillaichijyari.
25 Jehová Diosca jatunmari, paica alabashca cana Diosmari.
Paica tucui shujtaj dioscunatapish yalli mancharina Diosmari.
26 Llajtacunapaj dioscunaca tucuicuna imapaj mana valinchu,
ashtahuanpish Jehová Diosmari jahua pachacunataca rurarca.
27 Paipaj ñaupajpica jatun canapish, yallitaj achijnicuj canapishmi tiyan.
Paipaj causanapica fuerzapish, cushicuipishmi tiyan.
28 Tucui cai allpapi caj familiacuna Jehová Diosta alabaichijyari,
paipaj podermanta, paipaj fuerzamanta Jehová Diosta alabaichijyari.
29 Jehová Diospaj shutita alabana cashca shinallataj alabaichijyari,
shuj regalota paipaj apamushpa paiman cꞌuchuyaichijyari.
Jehová Diostaca chuyayachishca sumaj churanahuan adoraichijyari.*
30 ¡Tucui allpa pachapi causajcuna manchaimanta paipaj ñaupajpi chujchuichijyari!
Paimi allpataca mana cuyuchipajta rurarca. Allpataca imapish mana cuyuchi tucungachu.
31 Jahua pachapish cushicuichijyari, cai allpapish cushicuichijyari.
Tucui llajtacunapurapi: ‘¡Jehová Diosca reymi tucushca!’ nishpa huillaichijyari.
32 Mama cuchapish, tucui chaipi tiyajcunapish huacaichijyari.
Allpapi tucui imalla tiyajcunapish cushicuichijyari.
33 Shinallataj tucui bosque yuracunapish Jehová Diospaj ñaupajpi cushicuihuan caparichijyari,
allpapi tucui causajcunata juzgangapajmari shamugrin.*
34 Pai alli cashcamanta Jehová Diosta pagui nichijyari.
Paipaj mana tucurij cꞌuyaica huiñai huiñaipajmari.
35 Cashna nichijyari: ‘Ñucanchijta quishpichij Dioslla,
tandachishpa quishpichiyari, shujtaj llajtacunamantapish quishpichiyari,
chashnami cambaj jucha illaj shutimanta cantaca pagui nishun,
yallitaj cushicuihuanmari cantaca alabashun.
36 Israelitacunapaj Jehová Diosca alabashca cachun,
huiñai huiñaipaj* alabashca cachun’ nichij” nircami.
Chashna nijpimi tucui gentecunaca “¡Chashna cachun!”* nircacuna. Shinami paicunaca Jehová Diosta alabarcacuna.
37 Davidca Asafta, paipaj huauquicunatapish Jehová Dioshuan ari ninacushca arcapaj ñaupajpi sirvichunmi saquirca. Paicunami Arcapaj ñaupajpica cada punlla imata rurana cashca shina rurashpa sirvijcuna carca. 38 Obed-Edompish, paipaj 68 huauquicunapish, Jedutunpaj churi Obed-Edompish, Hosapish punguta cuidajcunami carca. 39 Gabaón adorana lugarpimi* Davidca sacerdote Sadoctapish, paipaj compañero sacerdotecunatapish Jehová Diospaj carpa huasi ñaupajpi saquirca. 40 Paicunaca ofrendacunata rupachina altar jahuapimi tutamantapish, chishipish rupachishca ofrendacunata Jehová Diosman cungapaj chaipi carcacuna. Shinallataj Jehová Dios israelitacunaman Leypi quillcachishcata tucui pajtachingapajmi chaipi carcacuna. 41 Paicunahuanca Hemán, Jedutún, caishuj agllashca cꞌaricunapishmi Jehová Diosta pagui ningapaj chaipi carcacuna. Paicunaca Diospaj “mana tucurij cꞌuyai huiñai huiñaipaj cashcamanta” pagui nishpa cantangapajmi chaipi carcacuna. 42 Hemanpish, Jedutunpish trompetacunahuan, cimbalocunahuan, musicata tocana shujtaj instrumentocunahuanmi Diosta alabangapaj chaipi carcacuna. Jedutunpaj churicunapishmi pungupi carcacuna. 43 Chai qꞌuipaca tucui chaipi caj gentecunami paicunapaj huasicunaman tigrarcacuna. Cutin Davidca paipaj huasipi cajcunatami bendicianaman rirca.