Lucas

11 Shuj cutinca Jesusca Diostami mañacurca. Diosta mañashpa tucuchijpimi paita catijcunamanta shujca: “Amito, Diosta mañanata yachachihuai. Bautizaj Juanpish paita catijcunamanca Diosta mañanatami yachachirca” nirca.

2 Chaimi Jesusca: “Diosta mañacushpaca cashna ninguichij: ‘Yaya, cambaj shutica jucha illaj nishca cachun. Cambaj Gobierno mandanaman shamuchunmi munanchij. 3 Punllanta minishtishca micunata* cada punlla cuhuai. 4 Shujtajcuna ñucanchijta mana allita rurajpi* ima shinami perdonanchij, chashnallataj ñucanchij juchacunatapish perdonahuai. Shinallataj ima mana alli ruraicunapi urmachunpish ama saquihuangui’” nirca.

5 Chai qꞌuipami Jesusca cashna nirca: “Caita yuyaichij, cancunapuramanta maijanca shuj amigotachari charinguichij. Chaupi tutata paipaj huasiman rishpaca: ‘Amigo, quimsa tandata mañachi, 6 ñuca amigomi carumanta ñuca huasiman shamushca. Shinapish paimanca imata mana carai tucunica’ ningachari. 7 Chashna nijpimi paica huasi ucumantaca: ‘Imamantataj chaupi tutataca shamunguiyari. Pungutapish ñami alli huichcarcani, ñuca huahuacunapish, ñucapish ñamari dormicunchij. Canman imata cungapajca mana jatari tucunichu’ ningachari. 8 Cancunamanca cashnami nini: amigo cashpapish ima mañashcata cungapajca chaupi tutataca mana jataringachu. Shinapish mana shaicushpa cutin cutin mañacushcamantami pai ima minishtishcata cungapaj jataringa. 9 Chaimanta cashnami nini: mañashpa catichij Diosca cungallami, mashcashpa catichij japinguichijmi, punguta huajtashpa catichij Diosca pascangallami. 10 Mañajpish chasquinmi, mashcajpish japinmi, punguta huajtajpajpish punguca pascashcami canga. 11 Cancunapuramantaca, ¿maijan yayataj cancunapaj huahua shuj pescadota mañajpica shuj culebrata cunguichijman? 12 Mana cashpaca, ¿shuj lulunta mañajpica shuj escorpionta cunguichijman? 13 Cancunaca millaicuna cashpapish cancunapaj huahuacunamanca allicunatami cunguichij. Jahua pachapi caj Yayacarin paita mañajcunamanca, ¿manachu paipaj espíritu santota* cunga?” nircami.

14 Chai qꞌuipaca Jesusca mana rimajta ruraj demoniotami* shuj runamanta llujshichirca. Chai demoniota llujshichijpimi mana rimaj runaca rimai callarirca. Chaimantami chaipi cajcunaca mancharishca saquirircacuna. 15 Shinapish chaipi cajcunamanta maijancunaca: “Paica demoniocunata mandaj Belcebú* poderta cujpimi demoniocunataca llujshichin” nircacunami. 16 Cutin shujtajcunaca Jesusta pandachishun nishpami Diospaj shutipi shuj milagrota rurachun mañarcacuna. 17 Paicuna imata yuyacushcata yachashpami Jesusca cashna nirca: “Maijan llajtapipish gentecuna paicunapurallataj macanacujpica chai llajta gobiernoca urmangami. Shinallataj maijan familiapi paicunapura pꞌiñanacushpaca mana tandalla causai tucungachu. 18 Shinallataj Satanaspish paillahuantaj macanacushpaca, ¿manachu pai mandacushcapish tucuringa? Shinaca ima nishpataj ñucataca Belcebupaj poderhuanmi demoniocunata llujshichingui ninguichijyari. 19 Belcebupaj poderhuan demoniocunata ñuca llujshichijpica, ¿cancunata catijcuna demoniocunata llujshichichunca pitaj poderta cunyari? Chaimantami cancunata catijcunaca cancuna pandaricushcata ricuchingacuna. 20 Shinaca Diospaj poderhuan* demoniocunata ñuca llujshichijpica cancuna cungashcapimi Diospaj Gobiernoca cancunapajman chayamushca. 21 Shuj sinchi runa macanacuna espadahuan, escudohuan alli allichirishpa paipaj huasita cuidajpica, pai imalla charishcacunataca pi mana shuhuai tucunchu. 22 Shinapish paita yalli sinchi runa shamushpami macashpa paitaca mishanga. Shinallataj pai imalla charishcacunata cuidangapaj macanacuna espadata, escudotapish quichushpami apanga. Chashnami shujtajcunahuan chaupinacungacuna. 23 Maijanpish ñuca lado mana tucujca ñucapaj contrami. Shinallataj maijanpish ñucahuan mana tandajca urata janajta tsirapashpa shitajmi.

24 Shuj millai espíritu shuj runamanta llujshishpaca maipi causanata mashcashpami chaquishca pambacunata rin. Chashna mashcashpapish maipi causanataca mana japinchu. Chaimi millai espirituca: ‘Ñuca causacushca huasillamantaj tigrasha’ nin. 25 Chaiman chayashpaca pꞌichashca, sumajta allichishca huasitami japin. 26 Chaimi paitapish yalli ashtahuan millai canchis espiritucunata pushamushpa, chaipi yaicushpa causai callarincuna. Chashnami chai runaca ñaupatapish yalli millai tucun” nircami.

27 Jesús chashna nicujpirajmi gentecunapaj chaupimanta shuj huarmi sinchita caparishpaca: “¡Canta huachashpa chuchuchij huarmica cushicunmi!” nirca. 28 Chashna nijpimi Jesusca: “¡Mana, ashtahuanpish Diospaj shimita uyashpa cazujcunami cushicuncuna!” nirca.

29 Achca gentecuna paipaj muyundijpi tandanacujpimi Jesusca cashna yachachi callarirca: “Cai punllapi causaj millai gentecunaca shuj milagrota rurashpa ricuchichunmi munancuna. Shinapish ima milagrota mana ricungacunachu. Ashtahuanpish profeta Jonás ima tucushca milagrollatami ricungacuna. 30 Ima shinami profeta Jonasca ninivitacuna ricuchun jatarirca, chashnallatajmi Runapaj Churipish cai punllapi causaj gentecuna ricuchun jataringa. 31 Juicio Punllapica Saba llajtamanta reinapish,* cai punllapi causaj gentecunapishmi causaringacuna. Chai reinami cai punllapi causaj gentecuna mana allita rurashcataca ricuchinga. Salomón yachaisapa cajpimi, pai yachachishcata uyangapaj chai reinaca caru llajtamanta shamurca. Shinapish ¡ricuichij! Salomontapish yallimari caipica. 32 Juicio Punllapica Nínive llajtamanta gentecunapish, cai punllapi causajcunapishmi causaringacuna. Ninivemanta gentecunami cai punllapi causajcuna mana allita rurashcataca ricuchingacuna. Jonás huillajpimi Ninivepi causajcunaca paicunapaj juchacunamanta arrepintirircacuna. Shinapish ¡ricuichij! Jonastapish yallimari caipica. 33 Maijanpish shuj lamparata japichishpaca mana pacashpa churanchu. Canastahuanpish* mana tapanchu. Ashtahuanpish huasiman yaicujcuna luz achijyachicujta ricuchunmi shuj mesa jahuapi churan. 34 Cuerpopaj luzca cambaj ñahuimi. Cambaj ñahui alli cajllata ricujpica,* cambaj tucui cuerpomi achijlla can. Shinapish cambaj ñahui mana alli cajllata ricujpica* cambaj tucui cuerpomi amsa can. 35 Chaimanta canpi tiyashca luz ama amsayachun cuidaringui. 36 Cambaj tucui cuerpo achijlla cajpi, canpi ima amsa mana tiyajpica shuj lámpara achijyachij shinami tucui achijlla canga” nircami.

37 Jesús tucuita parlashca qꞌuipami shuj fariseo runaca micunaman paita invitarca. Chashna invitajpimi paica fariseopaj huasiman yaicushpa mesapi tiyarirca. 38 Shinapish micungapaj Jesús maquita mana maillajta* ricushpami fariseo runaca mancharirca. 39 Chaimi Jesusca:* “Fariseocuna, cancunaca copata, platotaca jahua ladollata maillashca shinami canguichij. Ashtahuanpish ucu shungupica shuhuana* yuyailla, millaita rurana yuyaillami canguichij. 40 ¡Yuyai illajcuna! ¿Manachu jahuata rurajca, ucutapish rurarca? 41 Pobrecunata ayudashpaca* shungumanta cuichij. Chashna rurashpaca tucuipimi limpio canguichij. 42 ¡Aij fariseocunalla! Cancunaca imachari tucunguichij. Mentata, rudata, shujtaj qꞌuihuacunatapish* cada chungamantaca shujtami cunguichij. Ashtahuanpish cashcata ruranata, Diosta cꞌuyanataca mana yuyaringuichijchu. Cada chungamanta shujta cushpapish caicunata pajtachinataca mana saquinachu carcanguichij. 43 ¡Aij fariseocunalla! Cancunaca sinagogacunapica* ashtahuan alli asientocunapimi tiyarinata munanguichij. Plazacunapipish shujtajcuna saludachunmi munanguichij. 44 ¡Aij cancunalla! Huañushcacunata pambashca mana ricurij* jutcucuna shinami canguichij. Gentecunaca chai jutcucuna jahuata purishpapish mana cuentata cuncunachu” nircami.

45 Chashna nijpimi Moisesman cushca leyta yachachijcunamanta shuj runaca: “Yachachij, chashna nishpaca ñucanchijtapishmari cꞌamicungui” nirca. 46 Shina nijpimi Jesusca cashna nirca: “¡Aij Moisesman cushca leyta yachachijcunalla! Cancunapish llashaj quipitami gentecunamanca apachinguichij. Shinapish cancunaca shuj dedollahuanpish chai quipitaca mana cuyuchinguichijchu.

47 ¡Aij cancunalla! Profetacunata pambashca jutcucunatami allichinguichij. Shinapish cancunapaj ñaupa yayacunami paicunataca huañuchircacuna. 48 Cancunapaj ñaupa yayacuna imata rurashcata alli yachashpapish cancunaca allimari ninguichijmi. Profetacunataca paicunami huañuchircacuna. Ashtahuanpish cancunaca chai huañuchishca profetacunapaj jutcucunatami allichinguichij. 49 Chaimantami Diosca yachaj cashcata ricuchishpa cashna nirca: ‘Ñucaca profetacunata, apostolcunatapishmi paicunapajmanca cachasha. Chaicunamanta maijancunataca huañuchingacunami, cutin shujcunataca catirashpami llaquichingacuna, 50 gentecuna causai callarishcamantapacha* tucui profetacunata huañuchishca yahuarmantaca cai punllapi causajcunami culpayuj canguichij. 51 Abelpaj yahuarmanta callarishpaca Zacariaspaj yahuarcamami culpayuj canguichij. Zacariastaca Diospaj huasi ñaupajpi, altar cꞌuchupimi huañuchircanguichij’. Ari, cancunamanca cashnami nini: cai punllapi causaj gentecunami paicunapaj yahuarmantaca culpayuj canguichij.

52 ¡Aij Moisesman cushca leyta yachachijcunalla! Cancunaca Diosmanta yachana llavetami gentecunataca quichushcanguichij. Chaimantami cancunallataj mana yaicurcanguichij, shujtajcuna yaicuchunpish mana saquinguichij” nircami.

53 Jesús chaimanta llujshijpica mandashcacunata quillcajcunapish, fariseocunapish achcata pꞌiñarishpami tucui laya tapuicunata rurai callarircacuna. 54 Pai imapi pandarijpi juchachingapajmi paicunaca chapacurcacuna.