Lucas

18 Jesusca imamanta mana shaicushpa cutin cutin Diosta mañana cashcata yachachingapajmi shuj chꞌimbapuraita churashpa 2 cashna nirca: “Shuj llajtapica Diostapish mana manchaj, gentecunatapish mana respetaj shuj juezmi tiyarca. 3 Chai llajtallapitajmi shuj viuda huarmi tiyarca. Paica chai juezpajman cutin cutin rishpaca: ‘Ñucata llaquichij runamanta alli juzgashpa ayudahuai’ nishpami mañaj carca. 4 Chashna mañajpipish Juezca unitami paitaca mana ayudasha nishca carca. Shinapish qꞌuipamanca paipaj shungupica cashnami nirirca: ‘Diostapish mana manchanichu, gentecunatapish mana respetanichu, 5 ashtahuanpish cai viuda huarmica yallitajmi ñucata pꞌiñachicun. Ama cutin cutin shamushpa ñucata pꞌiñachishpa catichunca, alli juzgashpa paita ayudasha’ nirca” nircami. 6 Chaita nishca qꞌuipami Jesusca* cashnapish nirca: “¿Millai juez cashpapish pai imata nishcataca uyarcanguichijchu? 7 ¿Manachu Dioscarin pai agllashcacuna tutapish, punllapish caparishpa mañajpica, cashcata rurashpa paicunataca ayudanga? ¿Pacienciata charishcatapish manachu paicunamanca ricuchinga? 8 Ñucaca cashnami nini, Diosca cashcata rurashpami paicunataca utca ayudanga. Shinapish Runapaj Churi chayamujpica, ¿allpapica cashna shina feta charij gentecuna tiyangachu?” nircami.

9 Maijancunaca paicunalla alli runacuna cashcata yuyashpami shujtajcunataca imapajpish mana valijta shina ricujcuna carca. Paicunamanmi Jesusca cai chꞌimbapuraita churashpa cashna nirca: 10 “Ishqui runacunami Diospaj huasipi Diosta mañanaman rircacuna: shujca fariseomi carca, caishujca impuestocunata cobrajmi carca. 11 Chai fariseo runa shayarishpaca cashna nishpami paipaj shungupica mañarca: ‘Ñuca Dioslla, shujtajcuna shina mana cashcamantami canta pagui nini: ñucaca paicuna shina shuhuaj, cashcata mana ruraj, huainayaj..., cai impuestocunata cobraj runa shinallapish mana canichu. 12 Semanapica ishqui cutinmi ayunani. Ñuca tucui japishcacunamantapish cada chungamanta shujtami cuni’ nircami. 13 Ashtahuanpish impuestocunata cobraj runaca carullamanta, jahua pachatapish mana huichilla ricui tucushpami paipaj pechopi huajtarishpaca: ‘Ñuca Dioslla, ñucata llaquihuayari, ñucaca juchasapami cani’ nirca. 14 Cancunamanca cashnami nini, impuestota cobraj runami paipaj huasiman rishpaca fariseotapish yalli Diospaj ñaupajpica cashcata ruraj ricurirca. Maijanpish jatun tucujca pingaipi churashcami canga. Ashtahuanpish humilde cajca jatunyachishcami canga” nircami.

15 Gentecunaca huahuacunapaj jahuapi maquita churashpa Jesús bendiciachunmi paicunapaj huahuacunataca pushamurcacuna. Ashtahuanpish Jesusta catijcunaca sinchita rimashpami paicunataca jarcarcacuna. 16 Shinapish Jesusca huahuacunata paipajman pushamuchun mañashpami cashna nirca: “Huahuacuna ñucapajman shamuchun saquichij, paicunataca ama jarcaichijchu. Diospaj Gobiernoca cai huahuacuna shina cajcunapajmi. 17 Cancunamanca mana llullanichu. Maijanpish Diospaj Gobiernota shuj huahua shina mana chasquijca, chaimanca manataj yaicungachu” nircami.

18 Judiocunata mandaj shuj runami Jesustaca: “Alli Yachachij, ¿huiñai causaita chasquingapajca imatataj rurana cani?” nishpa tapurca. 19 Chashna tapujpimi Jesusca cashna nirca: “¿Imamantataj ñucataca Alli Yachachij ninguiyari? Allica pi mana tiyanchu, Diosllami allica. 20 Canca mandashcacunataca yachanguimi. Chaipica: ‘ama huainayangui,* ama huañuchingui, ama shuhuangui, ama llullashpa huillangui, cambaj yaya mamata respetangui’ ninmi” nircami. 21 Chashna nijpimi chai runaca: “Tucui chaicunatami huahuamantapacha cazushcani” nirca. 22 Chashna nijta uyashpami Jesusca: “Caita ruranami illanraj, can imalla charishcacunata cꞌatushpa, cullquitaca pobrecunaman cugri. Chashnami jahua pachapica yallitaj valishca charinacunata* charingui. Chaita rurashca qꞌuipaca shamui ñucata cati” nirca. 23 Shina nijta uyashpami chai runaca achcata charij cashcamanta yallitaj llaquirirca.

24 Jesusca chaita ricushpami cashna nirca: “¡Achca cullquita charijcunapajca Diospaj Gobiernopi yaicunaca sinchimi canga! 25 Shuj camellorajmi sirana aguja jutcutaca jahualla pasanga. Shinapish achcata charij runaca Diospaj Gobiernopica mana jahualla yaicui tucungachu” nircami. 26 Chaita uyajcunaca: “Shina cajpica, ¿pitaj quishpiri tucungari?” nircacunami. 27 Chaimi Jesusca: “Gentecunapajca caica sinchitajmari. Ashtahuanpish Diospajca imapish jahuallami” nirca. 28 Chaimi Pedroca: “Ricui, canta catingapajca imalla charishcacunatami ñucanchijca saquishcanchij” nirca. 29 Chashna nijpimi Jesusca paita catijcunataca cashna nirca: “Cancunamanca mana llullanichu. Maijanpish Diospaj Gobiernomanta paipaj huasita, huarmita, huauquicunata, yaya mamata, huahuacunata saquijca 30 cunan punllapica chaitapish yallimi chasquinga. Shamuj punllacunapicarin* huiñai causaitami chasquinga” nircami.

31 Chai qꞌuipami Jesusca paipaj 12 apostolcunata ladoman pushashpaca cashna nirca: “¡Ricuichij! Jerusalenmanmi huichiyacunchij. Chaipica Runapaj Churimanta profetacuna imalla quillcashcacunami tucui pajtaringa. 32 Paitaca shujtaj llajtacunamanta gentecunapaj maquipimi churangacuna. Chai gentecunami burlarishpa maipishcachun rimangacuna, chꞌucangacunapish. 33 Shinallataj azotishca qꞌuipami huañuchingacuna. Shinapish paica quimsa punllapimi causaringa” nircami. 34 Chashna nijpipish apostolcunapajca Jesús nishca shimicunaca pacashca shinami carca. Chaimantami caicunataca mana intindircacuna.

35 Jericó llajtaman Jesús chayacujpimi shuj mana ricuj runaca caridadta mañashpa ñan cꞌuchullapi tiyacurca. 36 Gentecuna chaita pasacujta uyashpami ima tucucushcata paica tapurca. 37 Chashna tapujpimi: “Nazaretmanta Jesusmi caita pasacun” nircacuna. 38 Chaimi mana ricuj runaca: “¡Davidpaj Churi Jesús, ñucata llaquihuayari!” nishpa caparirca. 39 Chashna caparijpimi ñaupashpa ricujcunaca upallai nishpa sinchita rimarcacuna. Shina nijpipish paica: “¡Davidpaj Churi, ñucata llaquihuayari!” nishpami ashtahuan sinchita caparirca. 40 Chaimi Jesús shayarishpaca chai runata pushamuichij nishpa mandarca. Chai runa cꞌuchuyajpica Jesusca cashnami tapurca: 41 “¿Imatataj canmantaca rurachun ningui?” nirca. Shina nijpimi mana ricuj runaca: “Amito, cutin ricungapaj ñucata ayudahuai” nirca. 42 Chashna nijpimi Jesusca: “Ña ricuilla. Canca feta charishcamantami alliyashcangui” nirca. 43 Jesús chashna nijpimi chai runaca ñapish ricui callarirca. Chai qꞌuipaca Diosta jatunyachishpami Jesusta catishpa ri callarirca. Chashna tucujta ricushpaca tucuicunami Diosta alabarcacuna.