Romanos

4 ¿Ñucanchij ñaupa yaya Abrahanmantaca imatataj ni tucunchij? 2 Abrahanca pai rurashcacunamanta cashcata ruraj nishca cashca cashpaca, shujtajcunapaj ñaupajpimi jatun tucunman carca. Shinapish Diospaj ñaupajpica mana jatun tucunata valinmanchu carca. 3 ¿Dios quillcachishcapica paimantaca imatataj ninyari? Chaipica: “Abrahanca Jehová* Diospimi feta churarca. Chaimantami Diosca paitaca cashcata rurajta shina ricurca” ninmi. 4 Shuj trabajaj runaman pagashpaca paita yallitaj llaquishcallamantaca mana paganchu. Ashtahuanpish trabajashcamantami pai japina cashcata pagan.* 5 Ashtahuanpish shuj runaca imata mana rurashpachari Diospi feta churan. Diosca millai runata cashcata rurajta shina ricuj cashpami, chai runataca feta charishcamanta cashcata rurajta shina ricun. 6 Shuj runa leypi nishcata mana tucuita rurajpipish Diosca cashcata rurajta shinami paitaca ricun. Chaimantami chai runaca achcata cushicun. Chai cushicuj runamanta parlashpami Davidca: 7 “Mana allita rurajcunaca paicunata perdonashcamantami cushicuncuna. Juchata rurajcunapish paicunapaj juchacunata perdonashcamantami* cushicuncuna. 8 Shuj runaca paipaj juchacunata Jehová* Dios mana yuyarijpimi cushicun” nircami.

9 Shinaca ¿circuncisionta* rurachishcacunallachu cushicun? ¿Manachu circuncisionta mana rurachishcacunapish cushicun? Ñucanchijca: “Abrahantaca feta charishcamantami Diosca cashcata rurajta shina ricurca” ninchijmi. 10 Shinaca ¿ima horataj paitaca cashcata rurajta shina Diosca ricurca? ¿Circuncisionta ña rurachishca cajpi o manaraj circuncisionta rurachishca cajpi? Paitaca circuncisionta manaraj rurachishca cajpimi cashcata rurajta shina Diosca ricurca. 11 Diosca circuncisionta rurachichunmi Abrahantaca mandarca. Chai circuncisionca shuj sello* shinami carca. Chai selloca manaraj circuncisionta rurachishca cajpi, pai feta charishcamanta cashcata rurajta shina ricuchingapajmi carca. Chashnami Abrahanca circuncisionta mana rurachishcacuna cajpipish feta charijcunapaj yaya tucurca. Paicunatami Diospish cashcata rurajcunata shina ricun. 12 Abrahanca circuncisionta rurachishcacunapajpish yayami tucurca. Shinapish paica circuncisionta rurachishcacunapajlla yayaca mana canchu. Ashtahuanpish pai shinallataj feta charishcata ricuchij gentecunapaj yayami can. Ñucanchij ñaupa yaya Abrahanca circuncisionta manaraj rurachishca cashpami feta charishcata ña ricuchirca.

13 Abrahanpish, paipaj huahua huahuacunapish Dios cusha nishca mushuj pachataca mana leyta catishcallamantachu herenciata shina chasquina carcacuna. Ashtahuanpish feta charishcamantami Abrahantaca cashcata rurajta shina Diosca ricurca. Chashnami paica Dios cusha nishcata chasquirca. 14 Leyta catishcallamanta gentecuna Dios cusha nishcata japina cajpica feta charinaca imapaj mana valinmanchu. Abrahanman Dios cusha nishcapish imapaj mana valinmanchu. 15 Leyta mana pajtachijpica Diosca pꞌiñarinmi. Shinapish ley mana tiyajpica leytaca pi mana pꞌaquinmanchu.*

16 Feta charishcamantami Dios cusha nishcataca chasquinchij. Chaitaca yallitaj llaquij cashcamantami Diosca ñucanchijman cushca. Dios cusha nishcataca Abrahanpaj tucui huahua huahuacunami chasqui tucun. Leyta cazujcunallaca mana chasqui tucunchu. Ashtahuanpish Abrahán shina feta charishcata ricuchijcunapishmi chasqui tucun. Abrahanca tucui ñucanchijcunapaj yayami. 17 (Dios quillcachishcapipish: “Cantaca achca llajtacunapaj yaya cachunmi churashcani” ninmi). Abrahanca Diospaj ñaupajpimi feta charishcataca ricuchirca. Diosca huañushcacunata causachij, ima manaraj tiyashcatapish ña tiyashcata shina parlajmi. 18 Abrahanca huahuacunata mana chari tucushpapish feta charishcamantami achca llajtacunapaj yaya canata shuyacurca. Diosca Abrahantaca: “Chashnami cambaj huahua huahuacunaca achcacuna canga” nircami. 19 Abrahanca Diospi feta charinata mana saquishpapish paipaj cuerpo ña huañushca shina cashcatami cuentata curca (paica ñami casi 100 huatacunata charirca). Shinallataj paica Sarapish mayorlla cashcamanta huahuacunata mana chari tucushcatami* yacharca. 20 Paica feta charishcamantami Dios cusha nishcataca chaichu cunga o manachu cunga nishpa mana yuyarca. Ashtahuanpish paica feta charishcamantami sinchi tucurca. Chaimantami paica Diosta jatunyachirca. 21 Paiman cusha nishcata Dios pajtachinataj cashcatami tucui shunguhuan crirca. 22 Chaimi Abrahantaca feta charishcamanta “Diosca cashcata rurajta shina ricurca”.

23 Shinapish “Diosca cashcata rurajta shinami ricurca” nishca shimicunaca mana Abrahanpajllachu quillcashca carca. 24 Ashtahuanpish ñucanchijpajpishmi quillcashca carca. Ñucanchijpish ñucanchij Amito Jesusta huañushcacunapaj chaupimanta causachij Diospimi crinchij. Chaimantami paica ñucanchijtapish cashcata rurajta shina ricunga. 25 Jesusca ñucanchij juchacunamanta huañungapajmi entregashca carca. Shinallataj Diosca ñucanchijcuna cashcata ruraj cajta ricuchingapajmi Jesusta causachirca.