Efesios
1 Dios munashcamanta Cristo Jesuspaj apóstol Pablomi cani. Éfeso llajtapi caj jucha illaj huauquicunamanmi cai cartataca quillcani. Cancunaca tucui shunguhuanmi Cristo Jesusta caticunguichij:
2 Ñucanchij Yaya Diospish, Amito Jesucristopish yallitaj llaquij cashcata ricuchichun, sumaj causaitapish cancunaman cuchun.
3 Ñucanchij Amito Jesucristopaj Yaya Diosca alabashca cachun. Ñucanchijcuna Cristohuan shuj shinalla cajpimi Diosca paipaj espirituhuan jahua pachapi tucui laya bendicioncunata cushca. 4 Cristohuan shuj shinalla cachun, jucha illajcuna cachun, paipaj ñaupajpi tucui shunguhuan cꞌuyaita ricuchichunmi ñucanchijtaca cai pacha manaraj tiyajpi Diosca agllashca. 5 Shinallataj paipaj huahuacuna shina cachunmi Jesucristomanta ñucanchijtaca agllashca. Chaitaca pai nishca shina, pai munashca shinami ñaupamantapacha agllashca. 6 Gentecuna paita alabachunmi Diosca chashna rurarca. Diosca paipaj cꞌuyashca Churimantami yallitaj llaquij cashcata ñucanchijmanca ricuchirca. 7 Diosca yallitaj llaquij cashpami paipaj Churipaj yahuarhuan ñucanchijtaca randishpa cacharichirca. Chashnami ñucanchij juchacunata perdonarca.
8 Diosca tucui alli yachaita cushpa, tucui alli yuyaita cushpami yallitaj llaquij cashcata ñucanchijmanca ricuchishca. 9 Paica pai munashca shinami ñucanchijmanca pi mana yachai tucushcata yachachishca. Chai mana yachai tucushcami paipaj shungutaca cushichin. Paillatajmi chaita ruranata yuyarirca. 10 Diosca tucuita ima shina mandanatami yuyarirca. Chaimantami pai agllashca tiempopi jahua pachapi cajcunatapish, cai pachapi cajcunatapish Cristopi shuj shinallata tandachinga. Ari, paihuanmi ñucanchijca 11 shuj shinalla tandachishca canchij. Diospish pai cusha nishca herenciata japichunmi ñucanchijta agllarca. Paica imata rurashpapish pai munashca shinami ruran. Chaimantami ñucanchijtaca ñaupamanta pai munashca shina agllarca. 12 Ñucanchijmi Cristopi punta shuyajcuna canchij. Diosmi ñucanchijtaca ñaupamanta paita jatunyachichun, alabachun agllarca. 13 Cancunapish mana llulla shimicunata uyashca qꞌuipami Cristopi shuyarcanguichij. Chai mana llulla shimicunaca Dios cancunata quishpichina alli huillaicunami. Cristopi crishca qꞌuipami Diosca Cristomanta pai cusha nishca espíritu santohuan cancunataca sellarca. 14 Cai espíritu santomi Dios cusha nishca herenciata japina cashcata ricuchin. Diosca paipaj pueblota randishpa quishpichingapajmi chashna rurarca. Chashna rurashcamantami paica jatunyachishca canga.
15 Chaimantami ñucapish Amito Jesuspi cancuna feta charishcata uyashpa, shinallataj tucui jucha illaj huauquicunaman cꞌuyaita ricuchicujta uyashpaca 16 cancunamanta Diosta pagui nicunilla. Cancunamanta mañashpaca 17 ñucanchij Amito Jesucristopaj sumajyachishca Yaya Dios cancunaman alli yachaita cuchun, pai ricuchishcacunata intindichichun, paimanta tucuita yachachichunmi mañani. 18 Diosca cancuna ima shuyacushcata ricuchun, yachachunmi cancunapaj yuyaita pascashca. Shinallataj jucha illajcuna ima sumaj bendicioncunata japina cashcata yachachun, 19 Jesusta catijcunaman jatun poderta ricuchishcata yachachunmi chashna rurarca. Chai jatun podertaca pai rurashcacunapimi ricui tucunchij. 20 Chai poderhuan huañushcacunapaj chaupimanta Cristota causachishpami jahua pachapi paipaj alli ladopi tiyachirca. 21 Chashnami gobiernocunapaj, autoridadcunapaj, poderyujcunapaj, mandajcunapaj, tucui shuticunapaj jahuapi paitaca jatunyachirca. Mana cunan punllacunallapichu* chashna jatunyachinga, shamuj punllacunapipishmi chashna jatunyachinga. 22 Shinallataj Diosca tucuitami Cristopaj chaqui ucupi churarca. Tucui ima tiyashcacunata mandachunmi congregacionpi uma cachunpish churarca. 23 Congregacionca paipaj cuerpomi can. Chaimantami tucui imalla illashcata Cristomanta chasquin. Cristollatajmi tucui imalla illashcatapish cun.