2 Corintios
5 Ñucanchij cuerpoca cai pachapi shuj carpa huasi shinami can. Cai carpa huasi chingarina cashcataca yachanchijmi. Diosmi jahua pachapica mana nunca tucurij huasita cunga. Chai huasica runacunapaj maquihuan rurashca huasica mana canchu. 2 Cai pacha huasipi cashpaca llaquirishpami huacanchij. Ñucanchijca churanata churaricuj shinami jahua pachapi causana huasitaca churarinata munanchij. 3 Chashnami chai churanata churarishpaca ña mana lluchulla cashun. 4 Cai carpa huasipi cajcunaca yallitaj sustarishpami huacanchij. Mana cai huasita saquisha nishcamantachu chashna llaquirinchij. Ashtahuanpish jahua pachapi caj huasita chasquisha nishpami chashna sintirinchij. Chaipimi huiñai causaica huañujlla cuerpotaca chingachinga. 5 Chai causaipajca Diosmi ñucanchijtaca allichirca. Shinallataj paipaj espíritu santota cushpami shamuj punllacunapi bendicioncunata cunataj cashcata ricuchirca.
6 Chaimantami punllanta chaipi shunguta churashpa causacunchij. Cai cuerpopi causacushpaca Amito Jesusmanta carupi cashcataca yachanchijmi. 7 Ñucanchijca crishcatami caticunchij, ñahuihuan ricushcataca mana caticunchijchu. 8 Shinapish seguromi canchij. Ñucanchijca cai cuerpopica ña mana causashun ninchijchu. Ashtahuanpish Amito Jesushuanmi causanata munacunchij. 9 Shinaca paihuan causacushpapish, paihuan mana causacushpapish paipaj ñaupajpi alli ricuringapajmi esforzarishpa catinchij. 10 Tucuicunami juzgashca cangapajca Cristopaj ñaupajpi cashun. Chaipimi ñucanchij cuerpopi cashparaj allita rurashcata o mana allita rurashcatapish cada unota paica juzganga.
11 Ciertomi, Amito Jesusta manchana ima cashcata yachashpami, ñucanchij yachachishcata crichun gentecunaman huillashpa catinchij. Ashtahuanpish Diosca ñucanchijtaca allimi rijsin. Cancunapaj concienciapish ñucanchijta alli rijsichunmi munani. 12 Ñucanchijca cancunapaj ñaupajpica mana cutinllataj jatunyarisha ninchijchu. Ashtahuanpish ñucanchijmanta jatunyarishpa cancuna animarichunmi chashna ninchij. Chashnami cancunaca shungupi manapish ima cashpa, ñahui ricuillapi jatunyarijcunamanca cutichi tucunguichij. 13 Ñucanchijca loco shina imatapish rurashpaca Diospajmi rurarcanchij. Cutin alli yuyaihuan imatapish rurashpaca cancunapaj allipajmi rurarcanchij. 14 Cristo ñucanchijta cꞌuyashcamantami paitaca cazunataj canchij. Tucui gentecuna huañushcamantami shuj runaca tucuicunamanta huañurca. Chaitami ñucanchijca intindishcanchij. 15 Paica tucuicunamantami huañurca. Chaimantami causajcunaca ña mana paicunallataj cushicungapaj causana can. Ashtahuanpish paicunamanta huañushpa, causachishca cajta cushichingapajmi causana can.
16 Cunanmantaca pitapish ñahui ricushcallahuanca mana juzganchijchu. Shinallataj maijancunaca Cristotaca ñucanchij ñahui ricushca shinallami ñaupaca ricuj carcanchij. Shinapish cunanca mana chashna ricunchijchu. 17 Maijanpish Cristohuan shuj shinalla cajca Dios rurashca mushuj ruraimi. Ñaupaman tiyajcunaca chingarishcami. ¡Ricuichij! Cunanca mushuj ruraicunami tiyai callarishca. 18 Shinapish tucuimi Diosmanta shamun. Paica Cristomantami ñucanchijhuan alli tucurca. Paillatajmi shujtaj gentecunapish paihuan alli tucuchun ayudana obrata ñucanchijmanca curca. 19 Diosca Cristomantami gentecunapaj juchacunata ña mana yuyarishpa paicunahuanca alli tucurca. Paica paihuan alli tucuna huillaita huillachunmi ñucanchijmanca mingarca.
20 Ñucanchijca Cristopaj randi Diosmanta huillajcunami canchij. Diosca ñucanchijta cachashpa gentecunata rogacushca shinami can. Chaimantami Cristopaj randi ñucanchijca: “Dioshuan alli tucuichij” nishpa rogacunchij. 21 Cristoca ima juchata nunca mana rurarcachu. Shinapish Diosca ñucanchij juchacunamantami paitaca sacrificiota shina curca. Chaimantami ñucanchijca Diospaj ñaupajpica cashcata rurajcuna canchij.